Dipesalema 18:1-50
Go mokaedi. Pina e motlhanka wa ga Jehofa e bong Dafide a neng a e opelela Jehofa mo letsatsing le Jehofa a neng a mo golola ka lone mo seatleng sa baba ba gagwe botlhe le mo seatleng sa ga Saulo. O ne a re:+
18 Ke a go rata, wena Jehofa nonofo ya me.+
2 Jehofa ke lefika la me le kago ya me e e thata e bile ke Ene yo o nkgololang.+
Modimo wa me ke lefika+ la me, yo ke tshabelang kwa go ene,Thebe ya me le lonaka* lwa me lwa poloko,* lefelo la me la botshabelo le le sireletsegileng.*+
3 Ke biletsa kwa go Jehofa, yo o tshwanelwang ke go bakwa,Mme ke tla gololwa mo babeng ba me.+
4 Dikgole tsa loso di ne di mpofile thata;+Banna ba ba se nang mosola ba ba jaaka merwalela ya tshoganyetso ba ne ba ntshosa.+
5 Dikgole tsa Lebitla* di ne di mpofile;Loso lo ne lo mpeetse serai.+
6 Ke ne ka bitsa Jehofa fa ke le mo matshwenyegong,Ke ne ka nna ka goela kwa Modimong wa me ke kopa thuso.
O ne a utlwa lentswe la me a le kwa tempeleng ya gagwe,+Mme selelo sa me ke kopa thuso se ne sa fitlha mo ditsebeng tsa gagwe.+
7 Foo lefatshe le ne la simolola go tshikinyega le go reketla;+Metheo ya dithaba e ne ya roromaMme ya kgotlhokgotshega ka gonne Modimo a ne a galefisitswe.+
8 Mosi o ne wa tlhatloga o tswa mo marobeng a dinko tsa gagwe,Le molelo o o lailang o ne wa tswa mo molomong wa gagwe;+Go ne ga tswa magala a a tukang mo go ene.
9 O ne a dira gore magodimo a obege fa a ntse a fologa,+Mme lefifi le lentshontsho le ne le le ka fa tlase ga dinao tsa gagwe.+
10 O ne a palama tšheruba mme a tla a fofa.+
O ne a tla ka bofefo a le mo diphukeng tsa moya.*+
11 Foo o ne a ikhurumetsa ka lefifi,+Metsi a a lefifi le maru a mantshontsho+A ne a mo dikologile gotlhe fela jaaka tente.
12 Mo phatsimong e e fa pele ga gagweGo ne ga tswa sefako le magala a a tukang mo marung.
13 Go tswa foo, Jehofa o ne a simolola go duma a le kwa magodimong;+Mogodimodimo o ne a dira gore lentswe la gagwe le utlwiwe,+Go ne ga na sefako le magala a a tukang.
14 O ne a hula metswi ya gagwe mme a ba gasamisa;+O ne a latlhela legadima la gagwe mo go bone mme a ba tlhakanya tlhogo.+
15 Mme boalo jwa melatswana ya metsi* bo ne jwa bonala;+Metheo ya lefatshe e ne ya senoga fa o kgalema, wena Jehofa,E ne ya senolwa ke go tsubutla ga mohemo wa maroba a dinko tsa gago.+
16 O ne a otlolola seatla sa gagwe a le kwa godimo;O ne a ntshwara mme a nkgoga gore ke tswe mo metsing a a boteng.+
17 O ne a nkgolola mo mmabeng wa me yo o nonofileng,+Mo go ba ba ntlhoileng, ba ba neng ba nonofile go mpheta.+
18 Ba ne ba ntlhasela mo letsatsing la fa ke ne ke le mo masetlapelong,+Le fa go ntse jalo, Jehofa o ne a nkema nôkeng.
19 O ne a ntlisa mo lefelong le le sireletsegileng;*O ne a nkgolola ka gonne ke ne ke mo itumedisa.+
20 Jehofa o nnaya maduo ka gonne ke siame;+O a ntuela ka gonne ga ke na molato.*+
21 Gonne ke ikobela melao ya ga Jehofa ka metlha,E bile ga ke a dira selo se se bosula ka go latlha Modimo wa me.
22 Dikatlholo tsa gagwe tsotlhe di fa pele ga me;Ga nkitla ke itlhokomolosa melao ya gagwe.
23 Ke tla nna ke le yo o siameng fa pele ga gagwe,+E bile ke tla ithiba gore ke se ka ka dira molato ope.+
24 E kete Jehofa a ka ntuela go ya ka tshiamo ya me,+Go ya ka go tlhoka molato ga diatla tsa me fa pele ga gagwe.+
25 Fa motho a ikanyega, o mo direla ka boikanyegi;+Fa motho a se na molato, o dirisana le ene ka go tlhoka molato;+
26 Fa motho a le molemo, o mo direla se se molemo,+Le fa go ntse jalo, fa motho a tsietsa, wena o itshupa o le botlhale.+
27 Gonne o golola batho ba maemo a a kwa tlase*+Le fa go ntse jalo, o kokobetsa ba ba ikgodisang.*+
28 Gonne wena Jehofa, ke wena o tshubang lobone lwa me,O Modimo wa me yo o dirang gore lefifi le le ntikologileng le fetoge lesedi.+
29 Ka thuso ya gago nka kgona go tlhasela setlhopha sa dirukutlhi;+Ka maatla a Modimo nka kgona go tlola lobota.+
30 Sengwe le sengwe se Modimo wa boammaaruri a se dirang ga se na molato;*+Lefoko la ga Jehofa le itshekile.+
Modimo ke thebe mo go botlhe ba ba tshabelang mo go ene.+
31 Tota Modimo ke mang kwantle ga ga Jehofa?+
E bile lefika ke mang fa e se Modimo wa rona?+
32 Modimo wa boammaaruri ke ene yo o nnayang maatla,+Mme o tla tlhamalatsa ditsela tsa me.+
33 O dira gore dinao tsa me di nne jaaka tsa kgama;O nkemisa mo mafelong a a kwa godimo.+
34 O katisetsa diatla tsa me ntwa;Mabogo a me a kgona go oba bora jwa kopore.
35 O nnaya thebe ya gago ya poloko,+Seatla sa gago sa moja se a ntshegetsa,*Mme boikokobetso jwa gago bo dira gore ke nne mogolo.+
36 O direla dikgato tsa me tselana e e bulegileng;Dinao* tsa me ga di kitla di relela.+
37 Ke tla lelekisa baba ba me ke bo ke ba tshwara;Ga nkitla ke boa go fitlha ba fedisitswe.
38 Ke tla ba thubaganya gore ba se ka ba kgona go ema;+Ba tla wela ka fa tlase ga dinao tsa me.
39 O tla nnaya maatla gore ke ye tlhabanong;O tla dira gore baba ba me ba phutlhame ka fa tlase ga me.+
40 O tla dira gore baba ba me ba ntshabe,*Mme ke tla fedisa* ba ba ntlhoileng.+
41 Ba goa ba kopa thuso, mme ga go na yo o ba gololang;E bile ba goela kwa go Jehofa, mme ga a ba arabe.
42 Ke tla ba thuga gore ba nne boleta jaaka lorole mo phefong;Ke tla ba latlhela kwa ntle jaaka seretse mo mebileng.
43 O tla nkgolola mo bathong ba ba tshwayatshwayang diphoso.+
O tla ntlhoma gore ke nne tlhogo ya ditšhaba.+
Batho ba ke iseng ke tsamaye ke ba itse ba tla ntirela.+
44 Fa ba utlwa pego ka ga me ba tla inkobela;Batswakwa ba tla tla ba ikokobeditse fa pele ga me.+
45 Batswakwa ba tla kgobega marapo;*Ba tla tswa mo dikagong tsa bone tse di thata ba roroma.
46 Jehofa o a tshela! A go bakwe Lefika la me!+
A Modimo wa poloko ya me a godisiwe.+
47 Modimo wa boammaaruri o diragatsa pusoloso mo boemong jwa me;+O baya ditšhaba ka fa tlase ga me.
48 O mphalotsa mo babeng ba me ba ba galefileng;O ntsholeletsa kwa godimo ga ba ba ntlhaselang;+O nkgolola mo mothong yo o ratang thubakanyo.
49 Ke gone ka moo ke tla go galaletsang mo ditšhabeng Jehofa,+Mme ke tla opelela* leina la gago dipako.+
50 O dira ditiro tse dikgolo gore a boloke kgosi ya gagwe;*+O bontsha motlodiwa wa gagwe lorato lo lo sa kgaotseng,+O lo bontsha Dafide le losika lwa gagwe ka bosakhutleng.+
Dintlha Tse di Kwa Tlase
^ Bona Ditlhaloso Tsa Mafoko.
^ Kgotsa “mmoloki wa me yo o maatla.”
^ Kgotsa “kago ya me e e sireletsegileng.”
^ Kgotsa “Sheole.” Bona Ditlhaloso Tsa Mafoko.
^ Kgotsa “phefo.”
^ Kgotsa “mesele ya metsi.”
^ Kgotsa “lefelong le le bulegileng.”
^ Seheb., “ka gonne ke phepa.”
^ Kgotsa “ba ba bogisiwang.”
^ Seheb., “matlho a a ikgodisang.”
^ Seheb., “se itekanetse.”
^ Kgotsa “nnonotsha.”
^ Kgotsa “Manyengana.”
^ Kgotsa “O tla nnaya mekwatla ya baba ba me.”
^ Seheb., “didimatsa.”
^ Kgotsa “ba tla nyelela.”
^ Kgotsa “letsa mmino.”
^ Kgotsa “O tlisetsa kgosi ya gagwe diphenyo tse dikgolo.”
