Ditiro Tsa Baaposetoloi 1:1-26
1 Mo pegong ya ntlha e ke neng ka go e kwalela Theofilo, ke ne ka tlhalosa dilo tsotlhe tse Jesu a neng a di dira le tse a neng a di ruta+
2 go fitlha ka letsatsi le a neng a tseelwa kwa godimo ka lone,+ fa a sena go naya baaposetoloi ba a neng a ba tlhophile ditaelo a dirisa moya o o boitshepo.+
3 Fa a sena go boga, o ne a iponatsa mo go bone makgetlo a le mantsi, gore ba tle ba tlhatswege pelo gore eleruri o a tshela.+ Ba ne ba mmona malatsi a le 40, e bile o ne a bua ka Bogosi Jwa Modimo.+
4 Fa a kopane le bone, o ne a ba laela jaana: “Lo se ka lwa tswa mo Jerusalema,+ mme tswelelang lo letetse se Rara a se solofeditseng,+ e leng se lo neng lwa se utlwa mo go nna;
5 ka gonne Johane o ne a kolobetsa ka metsi, mme lona lo tla kolobediwa ka moya o o boitshepo+ mo malatsing a sekaenyana fela morago ga seno.”
6 Ka jalo, fa ba kopane, ba ne ba mmotsa ba re: “Morena, a o busetsa bogosi mo Iseraele gone jaanong?”+
7 O ne a ba raya a re: “Rara yo o kwa legodimong ke ene fela a nang le taolo ya go tlhoma nako ya gore dilo di tla direga leng, mme ga lo tlhoke go itse dinako tseo.+
8 Le fa go ntse jalo, lo tla amogela maatla fa moya o o boitshepo o tla mo go lona,+ mme lo tla nna basupi+ ba me mo Jerusalema,+ mo Judea yotlhe le Samarea,+ le go ya kwa dikarolong tse di kwa kgakalakgakala* tsa lefatshe.”+
9 Fa a sena go bua dilo tseno, o ne a tlhatlosediwa kwa godimo ba ntse ba lebile, mme leru le ne la mo sira ba bo ba sa tlhole ba kgona go mmona.+
10 Mme fa ba ntse ba lebile kwa loaping fa a ntse a tlhatloga, ka bonako fela banna ba babedi ba ba apereng diaparo tse ditshweu+ ba ne ba ema go bapa le bone
11 mme ba ba raya ba re: “Banna ba Galalea, ke ka ntlha yang fa lo eme lo lebile kwa loaping? Jesu yono, yo o ntseng a na le lona e bile a tlhatloseditswe kwa loaping, o tla tla ka tsela e e tshwanang le e lo mmoneng a ya kwa loaping ka yone.”
12 Go tswa foo, ba ne ba tswa mo Thabeng ya Lotlhware mme ba boela kwa Jerusalema.+ Thaba eo e ne e se kgakala le Jerusalema, e ne e ka nna sekgala sa kilometara e le nngwe fela.*
13 Fa ba sena go goroga, ba ne ba ya kwa ntlwaneng e e kwa godimo e ba neng ba nna mo go yone. E ne e le Petere a na le Johane le Jakobe le Anderea, Filipo le Thomase, Barotholomeo le Mathaio, Jakobe morwa Alefaeo, le Simone yo o tlhagafetseng, le Judase morwa Jakobe.+
14 Bano botlhe ba ne ba rapela ba sa kgaotse e bile ba le seoposengwe, mme ba ne ba na le basadi bangwe,+ Marea mmaagwe Jesu, le bomonnawe* Jesu.+
15 Mo malatsing ao, Petere o ne a ema mo gare ga bakaulengwe (palo ya* batho ba ba neng ba le teng e ne e le 120) a bo a re:
16 “Banna, bakaulengwe, moya o o boitshepo o ne wa tlhotlheletsa Dafide gore a porofete ka ga Judase,+ go ne go tlhokega gore lokwalo loo lo diragadiwe. Mme Judase e ne ya nna ene a kaelang ba ba neng ba tshwara Jesu.+
17 Gonne Judase e ne e le mongwe wa rona+ e bile o ne a na le seabe mo bodireding jono.
18 (Ka jalo, ene monna yono, o ne a duelelwa ditiro tsa tshiamololo tse a di dirileng mme a reka tshimo ka tuelo eo.+ O ne a wa ka tlhogo, mmele wa gagwe wa phatloga ka bogare* mme mateng a gagwe a tshologa.+
19 Batho botlhe ba ba nnang mo Jerusalema ba ne ba itse seno, mo e leng gore ka puo ya bone tshimo eo e ne ya bidiwa Akeledama, mo go rayang, “Tshimo ya Madi.”)
20 Gonne mo bukeng ya Dipesalema go kwadilwe go twe, ‘A lefelo le a nnang mo go lone e nne letlotla, mme dira gore go se nne le ope yo o nnang mo go lone’+ gape go kwadilwe go twe, ‘A tiro ya gagwe ya bolebedi e tsewe ke motho yo mongwe.’+
21 Ka jalo, go a tlhokega gore mo boemong jwa gagwe re tsenye mongwe wa banna ba ba neng ba tsamaya le rona mo nakong yotlhe ya fa Morena Jesu a ne a dira ditiro tsa gagwe* a na le rona,
22 go simolola ka nako ya fa a ne a kolobediwa ke Johane+ go fitlha ka letsatsi le a neng a tlhatlosediwa kwa godimo ka lone a tswa mo go rona.+ Monna yoo o tshwanetse go nna mosupi fela jaaka le rona re le basupi ba gore o tsositswe mo baswing.”+
23 Ka jalo, ba ne ba tlhopha banna ba le babedi, Josefa yo o bidiwang Baresabase, yo gape a neng a bidiwa Juseto, mmogo le Mathiase.
24 Go tswa foo ba ne ba rapela ba re: “Modimo wa rona Jehofa,* o itse dipelo tsa batho botlhe,+ re bontshe gore ke ofe wa banna ba babedi bano yo o mo tlhophileng
25 gore a tseye bodiredi jono le gore a nne moaposetoloi. Gonne Judase o ile a tlogela kabelo eno gore a itseele tsela ya gagwe.”+
26 Ka jalo, ba ne ba tshela bola,+ mme bola jwa supa Mathiase, mme o ne a tsenngwa* mo baaposetoloing ba bangwe ba ba 11.
Dintlha Tse di Kwa Tlase
^ Kgotsa “go ya kwa dikhutlong.”
^ Seger., “bokgakala jwa loeto lwa letsatsi la Sabata.” Seno ke sekgala se Bajuda ba neng ba letleletswe go se tsamaya ka letsatsi la Sabata.
^ Seger., “bomorwarraagwe.”
^ Kgotsa “boidiidi jwa.”
^ Kgotsa “wa phanyega mo gare.”
^ Seger., “a ne a tsena a bo a tswa.”
^ Bona Dintlha A5.
^ Kgotsa “balelwa,” go tewa gore o ne a tsewa fela jaaka baaposetoloi ba bangwe ba ba 11.
