Jobe 42:1-17
42 Foo Jobe o ne a araba Jehofa a re:
2 “Jaanong ke a itse gore o kgona go dira dilo tsotlheE bile ga go na sepe se o akanyang go se dira se se ka go palelang.+
3 O ne wa re, ‘Ke mang yono yo o thibelang kgakololo ya me a se na kitso?’+
Ka jalo ke ne ka bua, le fa go ntse jalo ke ne ke sa tlhaloganyeDilo tse di kgatlhang thata, tse ke sa di itseng.+
4 O ne wa re, ‘Tsweetswee reetsa, mme ke tla bua.
Ke tla go botsa, mme wena o mpolelele.’+
5 Ke utlwile fela go buiwa ka wena,Mme jaanong ke kgona go go bona ka matlho.
6 Ke gone ka moo ke busetsang mafoko a me morago,+Mme ke nna mo loroleng le mo meloreng go bontsha gore ke a ikwatlhaya.”+
7 Fa Jehofa a sena go bua mafoko ano le Jobe, Jehofa o ne a raya Elifase wa Motemane a re:
“Ke go galefetse, wena le ditsala tsa gago tse pedi,+ ka gonne ga lo a bua boammaaruri ka nna+ jaaka motlhanka wa me e bong Jobe a dirile.
8 Jaanong tsayang dipoo di le supa le diphelefu di le supa mme lo ye kwa motlhankeng wa me e bong Jobe, mme lo ntshe setlhabelo se se fisiwang. Mme motlhanka wa me Jobe o tla lo rapelela.+ Ruri ke tla amogela kopo ya gagwe* ya gore ke se ka ka lo otlhaela boeleele jwa lona, ka gonne ga lo a bua boammaaruri ka nna jaaka motlhanka wa me Jobe a dirile.”
9 Ka jalo, Elifase wa Motemane, Biledade wa Moshuha le Sofare wa Monaama ba ne ba tsamaya mme ba dira se Jehofa a neng a ba laetse gore ba se dire. Mme Jehofa o ne a reetsa thapelo ya ga Jobe.
10 Fa Jobe a sena go rapelela ditsala tsa gagwe,+ Jehofa o ne a fedisa mathata a ga Jobe+ a bo a dira gore a boe a atlege gape.* Jehofa o ne a mo naya dilo tse a neng a na le tsone pele, di menagane sebedi.+
11 Bomorwarraagwe le bokgaitsadie botlhe le batho botlhe ba e neng e le ditsala tsa gagwe+ ba ne ba tla kwa go ene mme ba ja le ene mo ntlong ya gagwe. Ba ne ba mo utlwela botlhoko ba bo ba mo gomotsa ka ntlha ya masetlapelo otlhe a Jehofa a neng a letlile gore a mo wele. Mongwe le mongwe wa bone o ne a mo naya madi le palamonwana ya gauta.
12 Ka jalo, Jehofa o ne a segofatsa Jobe go feta kafa a neng a mo segofaditse ka gone kwa tshimologong,+ mme Jobe o ne a nna le dinku di le 14 000, dikamela di le 6 000, dikgomo di le 2 000 le ditonki tse dinamagadi di le 1 000.+
13 Gape o ne a nna le bana ba bangwe ba basimane ba le supa le ba bangwe ba basetsana ba le bararo.+
14 O ne a bitsa morwadie wa ntlha a re Jemima, wa bobedi a mmitsa Kesia mme wa boraro a mmitsa Kerene-hapuke.
15 Mo lefatsheng leo lotlhe, go ne go se na basadi ba ba neng ba le bantle jaaka bomorwadia Jobe, mme rraabone o ne a ba naya boswa mmogo le bokgaitsadiabone.
16 Morago ga dilo tseno, Jobe o ne a tshela dingwaga di le 140, mme o ne a bona bana ba gagwe le ditlogolwana tsa gagwe: dikokomana di le nnê.
17 La bofelo Jobe o ne a swa, a sena go tshela botshelo jo boleele le jo bo kgotsofatsang.*
Dintlha Tse di Kwa Tlase
^ Seheb., “Ruri ke tla tsholetsa sefatlhego sa gagwe.”
^ Seheb., “Jehofa o ne a busetsa morago botshwaro jwa ga Jobe.”
^ Seheb., “a tsofetse e bile malatsi a gagwe a tletse.”
