Moreri 1:1-18
1 Mafoko a mophuthi,*+ morwa Dafide, yo e leng kgosi mo Jerusalema.+
2 Mophuthi a re, “Lefela la mafela!
Lefela la mafela! Sengwe le sengwe ke lefela!”+
3 Motho o boelwa ke eng mo tirong yotlhe ya gagwe ya bonatlaE a e dirang ka natla mo lefatsheng?*+
4 Kokomana e a feta, go bo go tla kokomana e nngwe,Mme lefatshe lone le tswelela le le gone* ka bosakhutleng.+
5 Letsatsi le a tlhaba,* le bo le phirima;Go tswa foo, le a itlhaganela le boela* kwa le yang go tlhaba gone gape.+
6 Phefo e ya kwa borwa e bo e dikologela kwa bokone;E tswelela e ntse e dikologa jalo; phefo e nna e dira medikologo ya yone.
7 Melatswana yotlhe* e elelela kwa lewatleng, le fa go ntse jalo, lewatle ga le tlale.+
Melatswana e boela kwa e neng e tswa gone gore e tle e elele gape.+
8 Dilo tsotlhe di a lapisa;Tota ga go na ope yo o ka kgonang go bua ka gone.
Leitlho le a bona mme ga le kgotsofale;E bile tsebe e a utlwa mme ga e kgotsofale.
9 Se se ntseng se le teng se tla tswelela se le teng,E bile se se dirilweng se tla dirwa gape;Ga go na sepe se sesha mo lefatsheng.*+
10 A go na le sepe fela se motho a ka buang ka sone a re: “Bona selo seno! Se sesha”?
Ga se bolo go nna teng bogologolo;Ga se bolo go nna teng pele ga motlha wa rona.
11 Ga go na ope yo o gopolang batho ba metlha ya bogologolo;Moragonyana go tla ba bangwe, mme le bone ba tla lebalwa ke ba ba tlang morago ga bone,Mme bao le bone ba tla lebalwa ke ba ba tlang morago ga bone.+
12 Nna mophuthi, ke ntse ke le kgosi ya Iseraele mo Jerusalema.+
13 Ke ne ka leka ka natla gore ke ithute ke bo ke senke ka botlhale+ sengwe le sengwe se se dirilweng mo lefatsheng,+ e leng tiro e e ngomolang pelo e Modimo a e neileng bomorwa batho e e dirang gore ba nne ba tshwaregile.
14 Ke ne ka bona ditiro tsotlhe tse di neng di dirwa mo lefatsheng,*Mme ke ne ka lemoga gore sengwe le sengwe e ne e le lefela, e le go lelekisa phefo.+
15 Se se sokameng ga se ka ke sa tlhamaladiwa,Le se se seyong ga se ka ke sa balwa.
16 Foo ke ne ka bua jaana mo pelong ya me: “Jaanong ke nnile le botlhale jo bogolo go feta ope fela yo o kileng a nna gone pele ga me mo Jerusalema,+ e bile pelo ya me e ne ya nna le botlhale jo bogolo le kitso e ntsi.”+
17 Ke ne ka leka ka natla gore ke itse botlhale le gore ke itse botsenwa,* le gore ke itse boeleele,+ mme seno le sone ke go lelekisa phefo.
18 Gonne botlhale jo bontsi bo tlisa matshwenyego a mantsi,Mo e leng gore ope fela yo o oketsang kitso o oketsa botlhoko.+
Dintlha Tse di Kwa Tlase
^ Kgotsa “mokokoanyi.”
^ Seheb., “ka fa tlase ga letsatsi.”
^ Seheb., “le eme.”
^ Kgotsa “phatsima.”
^ Kgotsa “le boa le fegelwa le ya.”
^ Kgotsa “Melatswana e e elelang mariga; Melatswana e e elelang ka dipaka tse di rileng.”
^ Seheb., “ka fa tlase ga letsatsi.”
^ Seheb., “ka fa tlase ga letsatsi.”
^ Kgotsa “boeleele jo bo feteletseng.”
