THUTO 10
O ka Itse Jang Gore Bodumedi Jwa Boammaaruri ke Bofe?
1. A go na le bodumedi bo le bongwe fela jwa boammaaruri?
“Itiseng mo baporofeting ba maaka.”—MATHAIO 7:15.
Jesu o ile a ruta balatedi ba gagwe bodumedi bo le bongwe fela, bodumedi jwa boammaaruri. Bo tshwana le tsela e e isang botshelong jo bo sa khutleng. Jesu o ile a re: Tsela eo e ‘bonwa ke ba le mmalwa fela.’ (Mathaio 7:14) Modimo o amogela fela kobamelo e e theilweng mo Lefokong la gagwe la boammaaruri. Baobamedi botlhe ba boammaaruri ba kopantswe ke tumelo e le nngwe.—Bala Johane 4:23, 24; 14:6; Baefeso 4:4, 5.
Leba bidio ya A Modimo o Amogela Tsela Nngwe le Nngwe E re Mo Obamelang ka Yone?
2. Jesu o ile a reng ka Bakeresete ba maaka?
“Ba bolela phatlalatsa gore ba itse Modimo, mme ba mo itatola ka ditiro tsa bone.”—TITO 1:16.
Jesu o ne a bolela gore baporofeti ba maaka ba tla senya Bokeresete. Ka fa ntle, ba bonala e kete ke baobamedi ba boammaaruri. Ba bolela gore dikereke tsa bone ke tsa boammaaruri. Mme o ka kgona go lemoga se tota batho bao ba leng sone. Jang? Kobamelo ya boammaaruri ke yone fela e e nang le Bakeresete ba mmatota ba ba lemogiwang ka dinonofo le ditsela tsa bone tse di molemo.—Bala Mathaio 7:13-23.
3. O ka kgona jang go lemoga baobamedi ba boammaaruri?
Ela tlhoko dintlha tseno tse tlhano tse di ba tlhaolang:
-
Baobamedi ba boammaaruri ba tlotla Baebele gonne e le Lefoko la Modimo. Ba leka ka natla go tshela ka melaometheo e e mo go yone. Ka jalo, bodumedi jwa boammaaruri bo farologana le bodumedi jo bo theilweng mo dikgopolong tsa batho. (Mathaio 15:7-9) Baobamedi ba boammaaruri ba tshela go dumalana le se ba se rutang.—Bala Johane 17:17; 2 Timotheo 3:16, 17.
-
Balatedi ba ga Jesu ba boammaaruri ba tlotla leina la Modimo e bong Jehofa. Jesu o ile a tlotla leina la Modimo ka go dira gore le itsiwe. O ne a thusa batho go itse Modimo a bo a ba ruta go rapelela gore leina la Modimo le itshepisiwe. (Mathaio 6:9) Mo lefelong le o nnang mo go lone, ke bodumedi bofe jo bo itsiseng batho ka leina la Modimo?—Bala Johane 17:26; Baroma 10:13, 14.
-
Bakeresete ba boammaaruri ba rera ka Bogosi jwa Modimo. Modimo o ile a romela Jesu go tla go rera dikgang tse di molemo tsa Bogosi. Bogosi jwa Modimo ke jone fela tharabololo ya mathata a batho. Jesu o ile a bua ka jone go fitlha a swa. (Luke 4:43; 8:1; 23:42, 43) O ile a re balatedi ba gagwe le bone ba tla rera ka Bogosi jono. Fa mongwe a tla go bua le wena ka Bogosi jwa Modimo, gantsi o a bo a tswa mo bodumeding bofe?—Bala Mathaio 24:14.
-
Balatedi ba ga Jesu ga se karolo ya lefatshe leno le le boikepo. Ba lemogiwa ka go se tseye karolo mo dipolotiking le mo dintweng tsa semorafe. (Johane 17:16; 18:36) Gape ga ba etse ditlwaelo le mekgwa e e sa siamang ya lefatshe leno.—Bala Jakobe 4:4.
-
Bakeresete ba boammaaruri ba ratana ka lorato lwa mmatota. Ba ithuta mo Lefokong la Modimo gore ba tshwanetse go tlotla batho ba ditso tsotlhe. Le fa badumedi ba maaka ba ile ba nna ba ema nokeng dintwa tsa semorafe, baobamedi ba boammaaruri bone ba gana go dira jalo. (Mika 4:1-3) Go na le moo, Bakeresete ba boammaaruri ba dirisa nako le dithoto tsa bone ka go rata, go thusa le go kgothatsa batho ba bangwe.—Bala Johane 13:34, 35; 1 Johane 4:20.
4. A o ka kgona go tlhaola bodumedi jwa boammaaruri?
Ke bodumedi bofe jo bo theileng dithuto tsotlhe tsa jone mo Lefokong la Modimo, jo bo tlotlang leina la Modimo le jo bo bolelang gore Bogosi jwa Modimo ke jone fela bo tla leretseng batho tharabololo? Ke setlhopha sefe se maloko a sone a ratanang e bile a tlhoile ntwa? O akanyang?—Bala 1 Johane 3:10-12.
