Jesu o sa tswa go boeletsa dintlha tse di amanang le thapelo, mme gone eno ga se yone kgang fela e batho ba mmotsang ka yone gape. Fa a ne a dira dikgakgamatso kwa Galalea, batho ba ne ba mo latofatsa ba re o dira seo ka maatla a a tswang kwa mmusing wa madimona. Gone jaanong o mo Judea, mme kgang eo e tsoga gape.

Fa Jesu a leleka ledimona mo monneng mongwe, le le dirang gore a se ka a bua, batho ba a gakgamala. Mme baganetsi ba gagwe bone ga ba gakgamale. Ba a mo latofatsa, ba re: “O leleka madimona ka maatla a a tswang kwa mmusing wa madimona e bong Belesebube.” (Luke 11:15) Ba bangwe bone ba batla bosupi jo bo oketsegileng jwa gore Jesu ke mang, ka jalo ba mo raya ba re a ba bontshe sesupo se se tswang kwa legodimong.

E re ka Jesu a lemoga gore ba batla go mo leka, o ba araba ka tsela e a ileng a araba baganetsi ba a ileng a kopana le bone kwa Galalea. O tlhalosa gore bogosi bongwe le bongwe jo batho ba jone ba lwantshanang bo a wa ka go bua mafoko ano: “Fa e le gore Satane o a itwantsha, bogosi jwa gagwe bo tla ema jang?” Go tswa foo o ba bolelela ka tlhamalalo a re: “Fa e le gore ke leleka madimona ka monwana wa Modimo, go raya gore Bogosi Jwa Modimo bo setse bo tlile mme ga lo ise lo bo lemoge.”—Luke 11:18-20, ntlha e e kwa tlase.

Fa Jesu a umaka “monwana wa Modimo,” batho ba ba mo reeditseng ba ka tswa ba akanya ka se se ileng sa direga pelenyana mo hisitoring ya Baiseraele. Batho ba ba neng ba direla mo ntlong ya ga Faro, ba ba ileng ba bona fa Moshe a ne a dira dikgakgamatso, ba ne ba goa ba re: “Ke monwana wa Modimo!” Melao e e Lesome e e neng e kwaletswe mo dikwalelong tse pedi tsa leje, le yone e ne e kwadilwe ka “monwana wa Modimo.” (Ekesodo 8:19; 31:18) Ka tsela e e tshwanang, “monwana wa Modimo” e leng moya o o boitshepo, ke one o o thusang Jesu gore a leleke madimona le gore a fodise balwetse. Ka jalo, Bogosi Jwa Modimo bo setse bo tlile mme baganetsi bano ga ba bo lemoge, ka gonne Kgosi ya Bogosi joo e bong Jesu, o na le bone foo e bile o dira dikgakgamatso.

Bokgoni jwa ga Jesu jwa go leleka madimona, ke bosupi jwa gore o na le maatla go feta Satane fela jaaka monna yo o nonofileng a ka ya kwa monneng yo o tshotseng dibetsa yo o disitseng ntlo ya segosi mme a bo a mo fenya. Jesu o boeletsa setshwantsho se a ileng a se dira sa monna yo ledimona le neng la tswa mo go ene. Fa monna yono a sa tlatse phatlha eo ka dilo tse di molemo, ledimona leo le tla boa le na le madimona a mangwe a le supa, mme a tla dira gore maemo a bofelo a motho yono a nne maswe go feta a ntlha. (Mathaio 12:22, 25-29, 43-45) Ke sone se se diregang ka setšhaba sa Iseraele.

Mosadi mongwe mo bareetsing o tlhotlheletsega go bua a re: “Go itumela mosadi yo o neng a go tshola le yo o neng a go anyisa!” Basadi ba Bajuda ba ne ba eletsa go ipona e le bommê ba ngwana yo e tla nnang moporofeti, segolobogolo Mesia. Ka jalo, mosadi yono a ka tswa a akanya gore Marea o itumetse ka gonne e le mmaagwe morutisi yo mogolo. Le fa go ntse jalo, Jesu o thusa mosadi yono gore a lemoge se tota se tlisang boitumelo ka go mo raya a re: “Nnyaa, go na le moo, go itumela ba ba utlwang lefoko la Modimo e bile ba le ikobela!” (Luke 11:27, 28) Le ka motlha, Jesu ga a ise a ke a laele batho gore ba tlotlomatse Marea. Boammaaruri ke gore mongwe le mongwe a ka itumela fa fela a direla Modimo ka boikanyegi, e seng ka gonne a itsane le motho mongwe yo o rileng kgotsa a fitlheletse dilo dingwe.

Jesu o kgalema batho ba ba batlang gore a ba bontshe sesupo se se tswang kwa legodimong, fela jaaka a ile a dira kwa Galalea. O ba bolelela gore ga ba kitla ba newa sesupo sepe ntle le “sesupo sa ga Jona.” Jona o ne a nna sesupo ka go nna malatsi a le mararo mo mpeng ya tlhapi le ka go rerela Baninife a le pelokgale mo ba ileng ba ikwatlhaya. Jesu o ba raya a re: “Mme bonang, sengwe se se botlhokwa go feta Jona se fano.” (Luke 11:29-32) Gape Jesu o feta Solomone, yo kgosigadi ya Sheba e neng ya tla go reetsa botlhale jwa gagwe.

Jesu o oketsa jaana: “Fa motho a sena go tshuba lobone, ga a lo beye mo lefelong le le fitlhegileng kgotsa a lo khurumetsa, mme o lo baya mo godimo ga setlhomo sa lobone.” (Luke 11:33) A ka tswa a kaya gore go ruta le go dira dikgakgamatso fa pele ga batho bano, go tshwana le go tshuba lobone go tswa foo o bo o le fitlha. E re ka ba sa kgone go tlhoma mogopolo mo dilong tse di siameng, ga ba tlhaloganye bokao jwa dithuto tsa gagwe le dikgakgamatso tse a di dirang.

Jesu o sa tswa go leleka ledimona mo monneng mongwe e bile o fodisitse monna yono gore a kgone go bua. Tiragalo eno e tshwanetse go tlhotlheletsa batho gore ba galaletse Modimo ba bo ba bolelele ba bangwe se Jehofa a se dirileng. Ka jalo, Jesu o tlhagisa mongwe le mongwe wa bone a re: “Ela tlhoko gore lesedi le le mo go wena ga se lefifi. Fa mmele otlhe wa gago o tletse lesedi go se na karolo epe ya one e e lefifi, o tla bo o tletse lesedi jaaka fa lobone lo go bonesetsa ka marang a lone.”—Luke 11:35, 36.