BOTLHALE bo botlhokwa thata. Fa e ne e se ka jone, re ne re ka dira diphoso tse dintsintsi tsa bomatla. Mme botlhale jwa boammaaruri bo ka bonwa kae? Mokwadi wa buka ya Diane o ne a akantse ka botlhale jwa Mmopi wa rona jo bo ka se lekanngweng le bope. Mo godimo ga moo, mo e batlang e le mongwe le mongwe a ka bona botlhale jwa Gagwe a dirisa buka nngwe e e kgethegileng, Baebele. Akanya ka dintlha tse di latelang:

• The World Book Encyclopedia ya re Baebele ke “buka e e anamisitsweng thata go gaisa tse dingwe mo hisitoring. E ranotswe gantsi le ka dipuo tse dintsi go feta buka epe fela e nngwe.” Gone jaanong Baebele e teng ka dipuo di ka nna 2 600, e feletse kgotsa bontlhanngwe jwa yone, mme seo se dira gore diperesente di feta 90 tsa batho ba kgone go nna le yone.

• Gape botlhale “bo ntse bo goela kwa godimo” ka tsela ya mmatota le go feta. Re bala jaana mo go Mathaio 24:14: “Dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe; mme go tswa foo bokhutlo [jwa lefatshe la gone jaanong] bo tla tla.”

“Dikgang tse di molemo” tseo ke botlhale jwa boammaaruri ka gonne di tlhalosa tharabololo e e botlhale ya Modimo ya mathata a batho—Bogosi jwa Gagwe. Bogosi joo ke puso ya Modimo e e tla busang lefatshe lotlhe—lefatshe le le lengwe le tla busiwa ke puso e le nngwe. (Daniele 2:44; 7:13, 14) Ka jalo, Jesu Keresete o ne a rapela a re: “A bogosi jwa gago bo tle. A thato ya gago e diragale le mo lefatsheng, jaaka kwa legodimong.”—Mathaio 6:9, 10.

Basupi ba ga Jehofa ba go tsaya e le tshiamelo go itsise Bogosi jwa Modimo mo dinageng di le 239! Ee, botlhale—botlhale jwa Modimo—bo a “tlhaeletsa” tota, le e leng “kwa botsenong jwa dikgoro.” A o a bo utlwa?