“Ka go tlogela taelo ya Modimo, lo ngangatlela ngwao ya batho.” —Mareko 7:8.

SE BAEBELE E SE BUANG

Batho ba tsholwa ba na le keletso ya go obamela Modimo. (Mathaio 5:3) Batho ba ile ba leka go kgotsofatsa keletso eo ka go tlhama madumedi a mantsi a a theilweng mo dikgopolong tsa batho e seng tsa Modimo.

Ka sekai, Baebele e bolela jaana ka batho ba ba neng ba le mo bodumeding bongwe jwa lekgolo la ntlha la dingwaga: “Ba na le tlhoafalo ka Modimo; mme e seng go ya ka kitso ya boammaaruri; gonne, ka ntlha ya go bo ba sa itse tshiamo ya Modimo mme ba batla go tlhoma ya bone, ba ne ba se ka ba ipaya mo taolong ya tshiamo ya Modimo.” (Baroma 10:2, 3) Fela jalo le gompieno, go na le madumedi a mantsi a a ‘rutang ditaelo tsa batho a re ke dithuto tsa motheo.’—Mareko 7:7.

“A re akanyetsaneng gore re tlhotlheletsaneng mo loratong le mo ditirong tse di molemo, re sa lese go phuthega mmogo ga rona.”—Bahebera 10:24, 25.

SE BAEBELE E SE BUANG

Bahebera 10:25 e dirisa mafoko a a reng “re sa lese go phuthega mmogo ga rona.” Mafoko ao a bontsha gore Modimo o batla gore batho ba phuthege e le setlhopha se se rulaganeng go mo obamela. A mme mongwe le mongwe yo o obamelang Modimo o ne a tla itirela tlhaloso ya gagwe ya gore Modimo ke mang le gore o batla eng? Nnyaa. Baebele ya re batho ba ba obamelang ka tsela e Modimo a e amogelang ba tshwanetse go ‘bua botlhe ka tumalano,’ mme ba “nne seoposengwe ka tsela e e tshwanetseng mo mogopolong o le mongwe fela le mo tseleng e le nngwe fela ya go akanya.” (1 Bakorintha 1:10) Ba ne ba tla rulaganngwa ka diphuthego mme ba ne ba tla ‘rata bakaulengwe botlhe’ mo lefatsheng lotlhe. (1 Petere 2:17; 1 Bakorintha 11:16) Go tlhokega kobamelo e e ntseng jalo e e seoposengwe le e e rulaganeng go itumedisa Modimo.

“Botlhe ba tla itse gore lo barutwa ba me ka seno, fa lo ratana.”—Johane 13:35.

SE BAEBELE E SE BUANG

Baebele e tshwantsha jaana go bontsha kafa ba ba mo bodumeding jwa boammaaruri ba ka lemogwang ka teng: “Lo tla ba lemoga ka maungo a bone. Le ka motlha batho ga ba ke ba kgetla morara mo mitlweng kgotsa difeige mo mesitlwasitlwaneng, ga ke re?” (Mathaio 7:16) Ga o tlhoke go nna moitse wa dimela gore o bone pharologanyo fa gare ga setlhare sa mofeige le lesitlwasitlwane; ka tsela e e tshwanang ga o tlhoke gore o bo o le moitse wa bodumedi go lemoga boammaaruri mo maakeng. Mangwe a maungo kgotsa matshwao a bodumedi jwa boammaaruri ke afe?

• Bodumedi jwa boammaaruri bo ruta boammaaruri jo bo tswang mo Lefokong la Modimo, Baebele. (Johane 4:24; 17:17) Ga bo a thewa mo difilosofing tsa batho.

• Bodumedi jwa boammaaruri bo thusa batho gore ba itse Modimo, go akaretsa le leina la gagwe, Jehofa.—Johane 17:3, 6.

• Bodumedi jwa boammaaruri bo bontsha gore mathata a batho a tla rarabololwa ke Bogosi jwa Modimo fela, e seng dipuso tsa batho. —Mathaio 10:7; 24:14.

• Bodumedi jwa boammaaruri bo kgothaletsa lorato lo lo se nang bogagapa. (Johane 13:35) Bo ruta batho go tlotla batho ba ditso tsotlhe, go dirisa nako ya bone le dithoto tsa bone ba thusa ba bangwe le go tila go nna le seabe mo dintweng tsa ditšhaba.—Mika 4:1-4.

• Bodumedi jwa boammaaruri bo ama tsela e motho a tshelang ka yone, ga se moetlo fela kgotsa tlwaelo. Maloko a jone a tshela go dumalana le se a se rerang.—Baroma 2:21; 1 Johane 3:18.

Basupi ba ga Jehofa, bagatisi ba makasine ono, ba leka go tlotla Modimo ka se ba se buang le ka tsela e ba itshwarang ka yone. Ke ka ntlha yang fa o sa ye kwa ba phuthegang gone kwa Holong ya Bogosi gore o ye go iponela seo ka bowena?