SE BATHO BA SE BUANG

Batho bangwe ba dumela gore ba ka dirisa diphologolo ka tsela epe fela e ba e batlang. Ba bangwe bone ba re diphologolo di tshwanetse go tshwarwa jaaka batho.

• Moithuti mongwe wa ditshwanelo tsa diphologolo a re diphologolo “ga di a tshwanela go jewa kgotsa go rekisiwa.” O tswelela ka go re: “Ga re a tshwanela go tshwara diphologolo jaaka e kete ke tsa rona.”

• Leona Helmsley yo o nang le madi a mantsi o ne a tlogelela ntša ya gagwe madi a a kana ka diranta di le 129 600 000 a bo a kwala wili ya gore fa e swa e fitlhwe go bapa le lebitla la gagwe.

Se o ka akanyang ka sone: Diphologolo di tshwanetse go tshwarwa jang?

SE BAEBELE E SE BUANG

Mmopi wa botshelo e bong Jehofa Modimo, o ne a raya batho a re ba “laole ditlhapi tsa lewatle le dibopiwa tse di fofang tsa magodimo le sebopiwa sengwe le sengwe se se tshelang se se tsamayang mo lefatsheng.” (Genesise 1:28) Go a utlwala go bo Modimo a tsaya batho ba le botlhokwa go feta diphologolo.

Seno se bonala mo mafokong a a tlang pele ga temana e e nopotsweng pelenyana. Baebele ya re: “Modimo a bopa motho mo setshwanong sa gagwe, a mmopa mo setshwanong sa Modimo; a ba bopa monna le mosadi.”—Genesise 1:27.

E re ka re bopilwe “mo setshwanong sa Modimo” re kgona go bontsha dinonofo tsa Modimo tse di jaaka, botlhale, tshiamiso le lorato. Gape batho ba amega ka tsela e ba bangwe ba itshwarang ka yone e bile ba na le keletso ya go obamela Modimo. Diphologolo ga di na bokgoni jono ka gonne ga di a bopiwa “mo setshwanong sa Modimo.” Ka jalo ga di ka ke tsa tshwarwa jaaka batho.

A seno se raya gore batho ba ka sotla diphologolo? Nnyaa.

• Mo Molaong o Modimo a o neileng Baiseraele, o ne a tlhomamisa gore diphologolo di a ikhutsa, di a fepiwa, di a tlhokomelwa le go sirelediwa mo kotsing.—Ekesodo 23:4, 5; Duteronome 22:10; 25:4.

“O dire tiro ya gago malatsi a le marataro; mme mo letsatsing la bosupa o emise, gore poo ya gago le esele ya gago di tle di ikhutse.”—Ekesodo 23:12.

SE BATHO BA SE BUANG

Batsomi bangwe le batshwaraditlhapi ba bolaya diphologolo mo metshamekong e le go itlosa bodutu fela. Bangwe ba ka dumalana le mokwadi wa ditlhamane wa Mo-Russia e bong Leo Tolstoy fa a re go bolaya diphologolo le go di ja ga “go a siama.”

SE BAEBELE E SE BUANG

Modimo o letla batho go bolaya diphologolo gore ba itshireletse kgotsa ba dire diaparo. (Ekesodo 21:28; Mareko 1:6) Gape Baebele ya re batho ba ka bolaya diphologolo gore ba di je. Genesise 9:3 ya re: “Phologolo nngwe le nngwe e e tsamayang e e tshelang e ka nna ya nna dijo tsa lona.” Tota le Jesu o ne a thusa barutwa ba gagwe go tshwara ditlhapi tse ba neng ba di ja moragonyana.—Johane 21:4-13.

Le fa go ntse jalo, Baebele ya re Modimo o “tlhoile ope fela yo o ratang thubakanyo.” (Pesalema 11:5) Ka jalo seno se bontsha gore Modimo ga a batle re gobatsa diphologolo kgotsa re di bolaya mo metshamekong re itlosa bodutu.

Baebele ya re Modimo o tsaya botshelo jwa diphologolo bo le botlhokwa.

• Baebele ya re ka nako ya popo “Modimo a dira sebatana sa naga sa lefatshe kafa mofuteng wa sone le seruiwa kafa mofuteng wa sone le phologolo nngwe le nngwe e e tsamayang ya lefatshe kafa mofuteng wa yone. Mme Modimo a bona fa go le molemo.”—Genesise 1:25.

• Baebele e bua jaana ka Jehofa: “O naya dibatana dijo tsa tsone.” (Pesalema 147:9) Modimo o bopile ditshedi le dimela tse dintsintsi gore re bone dijo le gore diphologolo di nne le lefelo la bonno.

• Kgosi Dafide wa kwa Iseraele o ne a rapela jaana: “O boloka motho le phologolo, wena Jehofa.” (Pesalema 36:6) Ka sekai, ka nako ya Morwalela Jehofa o ne a boloka batho ba le robedi le mefuta yotlhe ya diphologolo pele a senya batho ba ba boikepo.—Genesise 6:19.

Jehofa o rata diphologolo tse a di bopileng e bile o solofetse gore batho ba di tshware sentle.

“Mosiami o tlhokomela moya wa seruiwa sa gagwe.” —Diane 12:10.