HONDURAS ke lefoko le le kayang “Boteng” ka Se-Spain. Christopher Columbus a ka tswa a ile a le dirisa go tlhalosa metsi a a neng a le mo Lotshitshing Lwa Atlantic. Batho bangwe ba re leina Honduras le tswa mo tlhalosong eo.

Batho ba kwa Honduras ba dumela gore malapa a tshwanetse go dirisana mmogo le go ikanyega. Ka sekai, gantsi monna le mosadi ke bone ba ba dirang ditshwetso tsa botlhokwa tse di malebana le kafa madi a tshwanetseng go dirisiwa ka gone mo lelapeng kgotsa gore bana ba tla bona thuto e e ntseng jang.

Ba-Honduras ba bantsi ke ba-mestizo, bana ba motsadi wa Moyuropa le Mo-Honduras. Batho ba bangwe ba ba sa ntseng ba nna kwa Honduras ke Ba-Chortí. Bangwe ba batho ba ba nnang kwa Honduras jaaka Ba-Garifuna, ba tswa kwa dinageng di sele.

Ba-Garifuna ba tswa kwa Afrika e bile ke Ba-India ba Carib ba ba neng ba nna kwa setlhaketlhakeng sa  St. Vincent. Ka bo1797, Ba-Garifuna ba ne ba goroga kwa Islas de la Bahía (kgotsa kwa Ditlhaketlhakeng Tsa Bay). Moragonyana ba ne ba nna gaufi le Lotshitshi Lwa Caribbean lo lo kwa dinageng tse di mo Amerika Bogare. Fa ba le koo, ba ne ba anamela mo mafelong a mangwe a a mo Bokone le Bogare Jwa Amerika.

Ba-Garifuna ba rata go tantshetsa moribo wa modumo wa meropa ya logong lo lo thata. Ba apara diaparo tsa setso tse di mebalabala, ba rata dijo tse di jaaka ereba (kuku e kgolo e bile e le sephaphathi e e dirilweng ka modi wa semela se se bidiwang cassava) e bile ba rata go bala ditlhamane.

Go na le diphuthego tsa Basupi ba ga Jehofa di ka nna 400 kwa Honduras. Dipokano di tshwarwa ka Se-China sa Mandarin, Seesemane, Se-Garifuna, Puo ya Diatla ya Honduras, Se-Spain le ka Se-Miskito.