“Mpho nngwe le nngwe e e molemo le neo nngwe le nngwe e e itekanetseng e tswa kwa godimo, gonne e fologa e tswa kwa go Rara wa masedi a selegodimo.” (Jakobe 1:17) Temana eo e bua ka bopelotshweu jwa Rraarona yo o kwa legodimong e bong Jehofa Modimo. Le fa go ntse jalo, go na le mpho e kgolo go di gaisa tsotlhe tse Modimo a di neileng batho. Mpho eo ke eng? Mafoko a ga Jesu a a tlwaelegileng a a mo go Johane 3:16, a re naya karabo: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.”

Mpho ya Modimo ya Morwawe yo o tsetsweng a le esi, ke yone e kgolo go di gaisa tsotlhe ka gonne e dira gore rotlhe re kgone go gololwa mo boleong, mo botsofeng le mo losong. (Pesalema 51:5; Johane 8:34) Ga go na sepe se re ka se dirang ka borona fela go ikgolola mo bokgobeng joo. Le fa go ntse jalo, Modimo o ne a re naya se re se tlhokang gore re gololwe ka gonne o re rata thata. Jehofa Modimo o ne a naya batho ba ba mo ikobelang tsholofelo ya go tshelela ruri ka go ntsha Morwawe yo o tsetsweng a le esi e bong Jesu Keresete gore e nne thekololo. Totatota thekololo ke eng? Goreng e le botlhokwa? E bile e ka re tswela mosola jang?

Thekololo ke go rekolola kgotsa go reka gape sengwe se se latlhegileng kgotsa go se golola. Baebele ya re batsadi ba rona ba ntlha e bong Adame le Efa, ba ne ba se na boleo e bile ba na le tsholofelo ya go tshelela ruri mo lefatsheng la paradaise ba na le bana ba bone. (Genesise 1:26-28) Ka maswabi, ba ile ba latlhegelwa ke tshono eo ka gonne ga ba a ka ba ikobela Modimo mme seo se ne sa dira gore ba nne le boleo. Diphelelo e ne ya nna dife? Baebele e araba jaana: “Boleo bo ne jwa tsena mo lefatsheng ka motho a le mongwe le loso ka boleo, loso lo ne lwa anamela kwa bathong botlhe ka gonne ba leofile botlhe.” (Baroma 5:12) Adame ga a ka a fetisetsa botshelo jo bo itekanetseng mo baneng ba gagwe, o ne a fetisetsa boleo le ditlamorago tsa jone e leng loso.

Thekololo e tshwanetse go lekana le se se latlhegileng. Fa Adame a ne a tlola molao wa Modimo ka boomo, o ne a leofa mme seo se ne sa dira gore a latlhegelwe ke botshelo jo bo itekanetseng. Baebele ya re seo se ne sa dira gore bana ba ga Adame e nne makgoba a boleo le loso. Ka jalo, go ne go tlhokega setlhabelo sa motho yo o itekanetseng e bong Jesu, gore re kgone go gololwa bokgobeng. (Baroma 5:19; Baefeso 1:7) Thekololo e Modimo a re e neileng ka lorato, ke yone fela e dirang gore re nne le tsholofelo ya go itumelela tshono e Adame le Efa ba neng ba na le yone ya go tshelela ruri mo lefatsheng la paradaise.—Tshenolo 21:3-5.

Ga go pelaelo gore mpho ya Modimo ya thekololo ke e e di gaisang tsotlhe ka gonne e re naya tsholofelo ya go tshelela ruri. Gore re itumelele ‘mpho eno e e itekanetseng,’ a re boneng gore e dumalana jang le dilo tse re tlotlileng ka tsone mo setlhogong se se fetileng tse di dirang gore mpho e nne botlhokwa thata.

E kgotsofatsa dikeletso tsa rona. Re bopilwe re na le keletso ya go tshelela ruri. (Moreri 3:11) E re ka rona ka borona re sa kgone go kgotsofatsa keletso eo, thekololo e re thusa go dira jalo. Baebele ya re: “Gonne dituelo tse boleo bo di duelang ke loso, mme  mpho e Modimo a e nayang ke botshelo jo bo sa khutleng ka Keresete Jesu Morena wa rona.”—Baroma 6:23.

Ke se re se tlhokang. Batho ba ne ba ka se ntshe thekololo. Baebele ya re: “Ga go na le fa a le mongwe wa bone yo o ka gololang morwarraagwe, le fa e le go mo ntshetsa thekololo mo Modimong.” (Pesalema 49:7) Ka jalo, re ne re tlhoka thuso ya Modimo gore re kgone go gololwa mo bokgobeng jwa boleo le loso. Mme gone, Modimo o ne a re naya se tota re neng re se tlhoka ka go re golola “ka thekololo e e neng ya duelwa ke Keresete Jesu.”—Baroma 3:23, 24.

Re e neilwe ka nako e e siameng. Baebele ya re: “Fa re ne re sa ntse re le baleofi, Keresete o ne a re swela.” (Baroma 5:8) E re ka Modimo a re neile thekololo “fa re sa ntse re le baleofi,” seno se re bontsha sentle gore Modimo o re rata thata. Le fa re tshwanetse go itshokela ditlamorago tsa boleo, thekololo e re naya tsholofelo ya dilo tse di molemo tse di tla diragalang mo nakong e e tlang.

O e ntshitse ka lorato e bile a re akanyetsa. Baebele e re bolelela gore ke eng se se tlhotlheleditseng Modimo go ntsha Morwawe go nna thekololo: “Lorato lwa Modimo lo ne lwa bonadiwa ka seno mo go rona, ka gonne Modimo o ne a romela Morwawe yo o tsetsweng a le esi mo lefatsheng gore re bone botshelo ka ene. Lorato lo ka tsela eno, e seng gore re ratile Modimo, mme gore o re ratile.”—1 Johane 4:9, 10.

O ka bontsha jang gore o itumelela mpho eno e e di gaisang tsotlhe? Gakologelwa gore mafoko a ga Jesu a a mo go Johane 3:16 a re ba ba “dumelang” ke bone fela ba ba tla bolokiwang. Go ya ka Baebele, tumelo ke “go lebelela ka tlhomamisego dilo tse di solofetsweng.” (Bahebera 11:1) Gore re kgone go tlhomamisega jalo, re tlhoka go itse boammaaruri. Ka jalo, re go kgothaletsa gore o iphe nako ya go ithuta ka Jehofa Modimo, Monei wa mpho eno e e itekanetseng, le go itse gore o ka dira eng go itumelela botshelo jo bosakhutleng jo re bo solofetseng ka ntlha ya setlhabelo sa ga Jesu.

O ka ithuta dilo tseno ka go sekaseka tshedimosetso ya Baebele e e mo www.mt1130.com/tn. Basupi ba ga Jehofa ba ka itumelela go go thusa. Re tlhomamisegile gore fa o ntse o ithuta ka mpho eno e e di gaisang tsotlhe e bile e go tswela mosola, o tla tlhotlheletsega go bua jaana: “Ke leboga Modimo ka Jesu Keresete Morena wa rona!”—Baroma 7:25.