Kitso e e Dirang Gore re Nne Ditsala Tsa Modimo
Mmopi wa rona ga se maatla fela a a sa itseng sepe. O na le dinonofo tse di kgatlhang. O batla gore re mo itse gore re kgone go nna ditsala tsa gagwe. (Johane 17:3; Jakobe 4:8) Ke sone se a re bolelelang go le gontsi jaana ka botho jwa gagwe.
Mmopi wa Rona O na Le Leina
“E kete batho ba ka itse gore wena, yo leina la gago e leng Jehofa, wena o le esi o Mogodimodimo, o okametse lefatshe lotlhe.”—DIPESALEMA 83:18.
Baebele e ruta gore Jehofa ke ene fela Modimo wa boammaaruri. O bopile dilo tsotlhe gape ke ene fela a tshwanelwang ke gore re mo obamele.—Tshenolo 4:11.
Jehofa ke Modimo yo o Lorato
“Modimo ke lorato.”—1 JOHANE 4:8.
Jehofa o dirisa Baebele le dilo tse a di bopileng go re bontsha dinonofo tsa gagwe. Nonofo e a itsegeng ka yone ke lorato. Sengwe le sengwe se a se dirang se tlhotlhelediwa ke lorato. Fa re ithuta ka ene re feleletsa re mo rata.
Jehofa ke Modimo yo o Itshwarelang
“O Modimo yo o ikemiseditseng go itshwarela.”—NEHEMIA 9:17.
Jehofa o a itse gore ga re a itekanela. Ka jalo, ‘o ikemiseditse go [re] itshwarela.’ Fa re kopa gore a re itshwarele, re bo re tlogela go dira dilo tse di sa siamang, o tla re itshwarela. —Dipesalema 103:12, 13.
Jehofa o Batla Gore re mo Rapele
“Jehofa o gaufi le botlhe ba ba mmitsang . . . O utlwa selelo sa bone sa go kopa thuso.”—DIPESALEMA 145:18, 19.
Jehofa ga a batle gore re dire meetlo e e rileng kgotsa gore re dirise ditshwantsho fa re mo obamela. O reetsa dithapelo tsa rona jaaka batsadi fa ba reetsa bana ba bone.
Tse Dingwe Tse O ka Di Kgatlhegelang
DIKARABO TSA DIPOTSO TSA BAEBELE
A Modimo ke Maatla Fela A a Se Nang Maikutlo?
Baebele ya re Modimo o bopile dilo tsotlhe, mme gone, a o a amega ka rona?
DIKARABO TSA DIPOTSO TSA BAEBELE
A Modimo o Tla Intshwarela?
Utlwa gore Baebele ya re o ka dirang gore Modimo a go itshwarele.
