GO DUMELWA gore bogologolo dinonyane tsa lewatle tse di bidiwang di-arctic tern, di kile tsa fofa dikilometara di le 35 200 go tswa kwa kgaolong ya Arctic go ya kwa Antarctica di bo di boa. Le fa go ntse jalo, dipatlisiso tsa bosheng di bontsha gore dinonyane tseno di kgona go fofela kgakala thata.

Dinonyane di le mmalwa di ne tsa tsenngwa didirisiwa tse di kgonang go bala gore dinonyane tseo di fofela bokgakala jo bo kae. Didirisiwa tseno tse di kgatlhang e bile di le motlhofo thata di ne tsa bontsha gore dingwe tsa dinonyane tseno di ne tsa fofa dikilometara di ka nna 90 000—sekgala se seleele thata go gaisa sa diphologolo tsotlhe tse di kileng tsa fuduga. Nonyane nngwe e ne ya fofa dikilometara di ka nna 96 000! Goreng sekgala se dinonyane tseno di se fofang se oketsegile?

Go sa kgathalesege gore dinonyane tseno tsa lewatle di simolotse kae loeto lwa tsone, ga di tseye tsela e e tlhamaletseng fa di fuduga. Jaaka go bontshitswe mo setshwantshong se se fa godimo, di dirisa tsela ya mmala o o pududu fa di fofa mo Lewatleng la Atlantic. Ka ntlha yang? Dinonyane tseno di thusiwa ke diphefo tsa mo lewatleng.

Dinonyane tsa lewatle di tshela dingwaga di ka nna 30 mme mo dingwageng tseo di kgona go fofa dikilometara di le dimilione di feta 2,4. Seo se lekana le go ya kwa ngweding makgetlo a le mararo kgotsa a le manê! Mmatlisisi mongwe o ne a re: “Se nonyane eno ya digerama di le 100 e kgonneng go se dira, se a gakgamatsa.” Buka ya Life on Earth: A Natural History ya re, e re ka gantsi dinonyane tseno di fudugela kwa mafelong a go leng selemo thata kwa go one, di bona “letsatsi le lentsi ngwaga le ngwaga go gaisa dibopiwa tsotlhe.”