1, 2. Tlhalosa se Jesu a neng a se direla baaposetoloi ba gagwe ba ba ikanyegang morago ga go keteka Tlolaganyo le bone ka 33 C.E.

KE BOSIGO jwa Nisane 14 mo ngwageng wa 33 C.E. Jesu le ditsala tsa gagwe ba sa tswa go keteka Tlolaganyo e e ba gopotsang kafa Modimo a neng a golola borraabonemogologolwane mo bokgobeng ka gone kwa Egepeto. Le fa go ntse jalo, barutwa ba gagwe ba ba ikanyegang ba tlile go bona “kgololo [e kgolo thata] ya bosakhutleng.” Mo letsatsing le le latelang, Moeteledipele wa bone yo o se nang boleo o tlile go bolawa ke baba ba gagwe. Mme gone, tiragalo eno e e setlhogo e ne e tla dira gore batho ba segofadiwe. Madi a ga Jesu a a tsholotsweng a ne a tla dira gore batho ba gololwe mo boleong le mo losong.—Baheb. 9:12-14.

² E le go tlhomamisa gore ga re lebale thulaganyo eno e e lorato, Jesu o ne a tlhoma tiragalo e ntšha e e neng e tla ketekiwa ngwaga le ngwaga, e e neng e tla emisetsa Tlolaganyo. O ne a dira seno ka go ngathoganya senkgwe se se sa bedisiwang, a bo a se naya baaposetoloi ba gagwe ba ba ikanyegang ba ba 11 mme a bo a re: “Seno se kaya mmele wa me o ruri o tla ntshiwang mo boemong jwa lona. Nnang lo dire seno e le go nkgopola.” O ne a dira se se tshwanang ka senwelo sa beine e khibidu a bo a re: “Senwelo seno se kaya kgolagano e ntšha ka ntlha ya madi a me, a a tla tshololelwang lona.”—Luke 22:19, 20.

3. (a) Morago ga loso lwa ga Jesu, go ne ga nna le phetogo efe e kgolo? (b) Re tshwanetse go ipotsa dipotso dife malebana le thapelo ya ga Jesu e e kwadilweng mo go Johane kgaolo 17?

³ Kgolagano ya bogologolo ya Molao e e neng e le fa gare ga Modimo le Baiseraele ba tlholego e ne e tloga e fela. E ne e tlile go emisediwa ke kgolagano e ntšha magareng ga ga Jehofa le balatedi ba ga Jesu ba ba tloditsweng. Jesu o ne a tshwenyegile thata ka gore setšhaba seno se sesha sa semoya se ne se tla tlhokomelwa jang. Iseraele wa tlholego o ne a kgaogane ka bodumedi le ka tsela ya mmatota e bile go se na tsholofelo, mme seno se ne se dira gore leina la Modimo le kgobiwe thata. (Joh. 7:45-49; Dit. 23:6-9) Jesu o ne a eletsa gore balatedi ba gagwe ba farologane le Baiseraele  bao ka gore bone ba nne seoposengwe, gore ba kgone go dirisana mmogo e le gore leina la Modimo le galalediwe. Ka jalo, Jesu o ne a dira eng? O ne a rapela thapelo e e itumedisang e motho mongwe le mongwe a ka nnang le tshiamelo ya go e bala. (Joh. 17:1-26; bona setshwantsho se se kwa tshimologong ya setlhogo seno.) Fa re ntse re sekaseka thapelo eno, re ka ipotsa gore, “A Modimo o ne a araba thapelo eo ya ga Jesu?” Gape re tshwanetse go itlhatlhoba mme re ipotse gore, “A ke dira dilo go dumalana le yone?”

4, 5. (a) Ke eng se re se ithutang mo tseleng e Jesu a neng a simolola thapelo ya gagwe ka yone? (b) Jehofa o ne a araba jang kopo e e malebana le isagwe ya ga Jesu?

⁴ Jesu o bua le barutwa ba gagwe go fitlha e nna bosigogare, a ba naya kitso e e molemolemo e e tswang kwa Modimong. Go tswa foo, o lelalela kwa legodimong a bo a rapela jaana: “Rara, nako e tlile; galaletsa morwao, gore morwao a tle a go galaletse, fela jaaka o mo neile taolo mo nameng yotlhe, gore, ka ga palo yotlhe ya ba o ba mo neileng, a tle a ba neye botshelo jo bo sa khutleng. . . . Ke go galaleditse mo lefatsheng, ka ke weditse tiro e o e nneileng go e dira. Jalo jaanong wena Rara, nkgalaletse gaufi le wena ka kgalalelo e ke neng ke na le yone gaufi le wena pele lefatshe le nna gone.”—Joh. 17:1-5.

⁵ Ela tlhoko dilo tse di neng di tla pele mo go Jesu mo tseleng e a neng a simolola thapelo ya gagwe ka yone. Selo sa konokono se Jesu a neng a amegile ka sone e ne e le gore Rraagwe yo o kwa legodimong a galalediwe, mme seno se tsamaisana le kopo ya gagwe ya ntlha e e mo thapelong ya gagwe ya sekao e e reng: “Rara, a leina la gago le itshepisiwe.” (Luke 11:2) Sa bobedi se Jesu a neng a amegile ka sone ke dilo tse barutwa ba gagwe ba neng ba di tlhoka, gore “a ba neye botshelo jo bo sa khutleng.” Morago ga foo, Jesu o ne a kopa se a neng a se tlhoka, a re: “Rara, nkgalaletse gaufi le wena ka kgalalelo e ke neng ke na le yone gaufi le wena pele lefatshe le nna gone.” Jehofa o galaletsa Morwawe yo o ikanyegang ka go mo naya se se fetang se a neng a se kopa, ka go dira gore a nne le “leina le le molemolemo go gaisa” la baengele botlhe.—Baheb. 1:4.

6. Baaposetoloi ba ne ba tshwanetse go dira eng gore ba bone botshelo jo bo sa khutleng, mme re itse jang gore ba ne ba atlega?

⁶ Gape Jesu o ne a rapela ka se rona baleofi re tshwanetseng go se dira gore re tshwanelegele go amogela mpho e e sa re tshwanelang ya botshelo jo bo sa khutleng. (Bala Johane 17:3.) A re re tshwanetse go nna re “tsenya kitso” ka Modimo le ka Keresete. Tsela nngwe e re ka dirang seno ka yone ke ka go dirisa matlho le ditsebe tsa rona go ithuta mo go oketsegileng ka ga Jehofa le ka Morwawe. Tsela e nngwe e kgolo e re ka tsenyang kitso ka Modimo ka yone, ke ka go nna le boitumelo ka ntlha ya go dirisa se re se ithutang ka ene. Baaposetoloi ba ne ba latela thulaganyo eno e e nayang botshelo, ka gonne Jesu o ne a bua jaana mo thapelong: “Mafoko a o a nneileng ke ba a neile, mme ba a amogetse.” (Joh. 17:8) Le fa go ntse jalo, gore ba bone botshelo jo bo sa khutleng, ba ne ba tshwanetse go nna ba tlhatlhanya ka mafoko a Modimo le go a dirisa mo botshelong jwa bone jwa letsatsi le letsatsi. A baaposetoloi ba ba ikanyegang ba ne ba kgona go tswelela ba dira seno go fitlha ba swa? Ee ruri ba ne ba dira seo. Re itse seo ka gonne maina a mongwe le mongwe wa bone a gabilwe mo majeng a a 12 a motheo, a Jerusalema yo Mosha wa legodimo.—Tshen. 21:14.

7. Go “itse” Modimo go kaya eng, mme ke eng fa seno se le botlhokwa jaana?

⁷ Go ya ka bakanoki ba puo ya Segerika, polelwana ya Segerika e e ranotsweng e le “go tsenya kitso,” gape e ka ranolwa e le “ba tswelele ba itse.” Bokao jwa mafoko ano bo a tsamaisana e bile bo botlhokwa. Ntlha e e kwa tlase mo go Johane 17:3 mo Reference Bible e tlhalosa bokao jo bongwe ka go re, “go go  itse.” Ka jalo, “go tsenya kitso” ke sengwe se se tswelelang se se felelang ka tshiamelo ya go “itse” Modimo. Le fa go ntse jalo, go itse Motho yo mogolo thata mo lobopong lotlhe go akaretsa se se fetang fela go tlhaloganya dinonofo tsa Modimo le boikaelelo jwa gagwe. Go itse Jehofa go akaretsa go mo rata thata le go rata badumedimmogo le rona. Baebele e tlhalosa jaana: “Yo o sa rateng ga a ise a itse Modimo, ka gonne Modimo ke lorato.” (1 Joh. 4:8) Ka jalo, go itse Modimo go akaretsa go mo ikobela. (Bala 1 Johane 2:3-5.) Ruri ke tshiamelo e kgolo go nna mongwe wa batho ba ba itseng Jehofa! Le fa go ntse jalo, o ka kgona go latlhegelwa ke kamano eo e e molemolemo, fela jaaka go ile ga direga ka Judase Isekariota. A re direng ka natla gore e se ka ya re latlhegela. Fa re dira jalo, kgabagare re tla tshwanelegela go bona mpho e e sa re tshwanelang ya botshelo jo bo sa khutleng.—Math. 24:13.

8, 9. Jesu o ne a amegile thata ka eng mo bodireding jwa gagwe mo lefatsheng, mme o tshwanetse a bo a ile a ganetsa setso sefe sa bodumedi?

⁸ Fa re sena go bala thapelo ya ga Jesu e e mo go Johane kgaolo 17, ga go ope yo o ka belaelang gore Jesu o ne a rata thata baaposetoloi ba gagwe ba nako eo le barutwa ba gagwe ba mo isagweng. (Joh. 17:20) Mme gone, re tshwanetse go tlhaloganya gore go bolokiwa ga rona e ne e se sone selo sa botlhokwa thata mo go Jesu. Go tswa kwa tshimologong ya bodiredi jwa gagwe mo lefatsheng go ya kwa bokhutlong jwa jone, boikaelelo jwa gagwe jo bogolo, e ne e le go itshepisiwa ga leina la ga Rraagwe le go dira gore le galalediwe. Ka sekai, fa Jesu a ne a le kwa sinagogeng ya kwa Nasaretha mme a tlhalosa se a neng a tlile go se dira mo lefatsheng, o ne a bala jaana go tswa mo momenong wa ga Isaia: “Moya wa ga Jehofa o mo go nna, ka gonne o ntloleditse go bolelela bahumanegi dikgang tse di molemo.” Ga go pelaelo gore Jesu o ne a bitsa leina la Modimo sentle fa a ne a bala ka ga se a neng a tlile go se dira mo lefatsheng.—Luke 4:16-21.

⁹ Go ya ka setso sa Bajuda, dingwaga di le dintsi pele ga Jesu a tla mo lefatsheng, baeteledipele ba bodumedi ba ne ba thibela batho go dirisa leina la Modimo. Re ka tlhomamisega gore Jesu o ne a le kgatlhanong le setso seo se se neng se sa theiwa mo Dikwalong. O ne a raya baganetsi bao a re: “Ke tlile ka leina la ga Rre, mme ga lo nkamogele; fa mongwe o sele a  ne a goroga ka leina la gagwe, lo ne lo tla amogela ene yoo.” (Joh. 5:43) Malatsi a le mmalwa pele ga loso lwa gagwe, Jesu o ne a bontsha se a neng a amegile thata ka sone mo botshelong fa a ne a rapela jaana: “Rara, galaletsa leina la gago.” (Joh. 12:28) Ka jalo, ga re a tshwanela go gakgamala go bo Jesu a ile a bontsha kafa a neng a amegile ka gone ka leina la ga Rraagwe mo thapelong ya gagwe yotlhe e gone jaanong re tlotlang ka yone.

10, 11. (a) Go itsise ga ga Jesu leina la ga Rraagwe go ne go akaretsa eng? (b) Barutwa ba ga Jesu ba tshwanetse go ikemisetsa go diragatsa boikaelelo bofe?

¹⁰ Jesu o ne a rapela jaana: “Ke bonaditse leina la gago mo bathong ba o ba nneileng ba tswa mo lefatsheng. E ne e le ba gago, mme wa ba nnaya, mme ba bolokile lefoko la gago. Gape, ga ke tlhole ke le mo lefatsheng, mme bone ba mo lefatsheng mme nna ke tla kwa go wena. Rara yo o Boitshepo, ba tlhokomele ka ntlha ya leina la gago le o le nneileng, gore ba tle ba nne mongwe fela jaaka re ntse.”—Joh. 17:6, 11.

¹¹ Fa Jesu a ne a itsise barutwa ba gagwe leina la ga Rraagwe, o ne a sa ba bolelele fela gore le bidiwa jang. Gape Jesu o ne a ba thusa gore ba itse se leina la Modimo le se emelang, e leng dinonofo tsa Modimo tse di molemo le tsela e a dirisanang le rona ka yone. (Ekes. 34:5-7) Mo godimo ga moo, fa e sa le Jesu a galalediwa kwa legodimong, o ntse a tsweletse go thusa barutwa ba gagwe gore ba itsise leina la ga Jehofa mo lefatsheng lotlhe. Ka boikaelelo bofe? Gore go kokoanngwe barutwa ba le bantsi pele ga tsamaiso eno e e boikepo ya dilo e ya kwa bokhutlong. Go tswa foo, ruri Jehofa o tla itirela leina le legolo fa a tsaya kgato go golola basupi ba gagwe ba ba ikanyegang!—Esek. 36:23.

12. Go tlhokega dilo dife tse tharo gore re kgone go dira tiro eno e e bolokang matshelo?

¹² Fa Jesu a ne a le mo lefatsheng, o ne a dira ka natla go thusa barutwa ba gagwe gore ba fenye makoa a bone. Seno se ne se le botlhokwa gore ba kgone go wetsa tiro e Jesu a neng a e simolotse. Jesu o ne a bua jaana mo thapelong: “Fela jaaka o nthometse mo lefatsheng, le nna ke ba rometse mo lefatsheng.” Jesu o ne a gatelela dintlha tse tharo tsa botlhokwa tse di neng di tla ba thusa gore ba kgone go atlega go dira tiro eno ya go boloka matshelo. Sa ntlha se a neng a se rapelela e ne e le gore barutwa ba gagwe ba se ka ba nna karolo ya lefatshe la ga Satane le le sa itshekang. Sa bobedi, o ne a rapelela gore ba itshepisiwe, kgotsa ba itshekisiwe, ka go dirisa boammaaruri jo bo mo Lefokong la Modimo. Sa boraro, Jesu o ne a nna a kopa gore barutwa ba gagwe ba nne seoposengwe mo loratong lo ene le Rraagwe ba neng ba na le lone. Gore re kgone go dira jalo, re tlhoka go itshekatsheka. Mongwe le mongwe wa rona o tlhoka go ipotsa gore, ‘A ke dira go dumalana le dilo tse tharo tse Jesu a ileng a di kopa?’ Ka go gatelela dintlha tseno, Jesu o ne a bontsha gore o na le tsholofelo ya gore ‘lefatshe le tla dumela gore Modimo o mo rometse.’—Bala Johane 17:15-21.

13. Thapelo ya ga Jesu e ne ya arabiwa jang mo lekgolong la ntlha la dingwaga C.E.?

¹³ Re kgona go bona gore thapelo ya ga Jesu e ne ya arabiwa, fa re bala buka ya Baebele ya Ditiro tsa Baaposetoloi, e e tlang morago ga Diefangele tse nnè. Akanya kafa go neng go ka tsoga dikgaogano ka gone mo Bakereseteng bao ba bogologolo, ba bangwe ba bone e neng e le Bajuda le Baditšhaba, bahumi le bahumanegi, makgoba le batho ba ba nang le makgoba. Le fa go ntse jalo, botlhe ba ne ba dirisana mmogo mo ba neng ba ka tshwantshanngwa le dikarolo tse di farologaneng tsa mmele wa motho, mme Jesu e le tlhogo ya bone. (Baef. 4:15, 16) Ruri seno e ne e le selo se se gakgamatsang tota, mo lefatsheng la ga Satane le le kgaoganeng! Kgalalelo yotlhe e tshwanetse go newa Jehofa, e leng ene yo o dirileng gore seno se kgonege a dirisa moya wa gagwe o o boitshepo o o maatla.—1 Bakor. 3:5-7.

14. Thapelo ya ga Jesu e ne ya arabiwa jang mo motlheng wa rona?

¹⁴ Se se utlwisang botlhoko ke gore, kutlwano eo ya bone e e gakgamatsang ga e a  ka ya tswelela morago ga loso lwa baaposetoloi. Go na le moo, jaaka go ne go boleletswe pele, botlhanogi jo bogolo bo ne jwa tsena mo phuthegong mme seno sa dira gore go nne le makoko a madumedi a a ipitsang a Bokeresete. (Dit. 20:29, 30) Le fa go ntse jalo, ka 1919, Jesu o ne a golola balatedi ba gagwe ba ba tloditsweng, mo bokgobeng jwa bodumedi jwa maaka le go ba phuthela mo ‘sebofong se se itekanetseng sa kutlwano.’ (Bakol. 3:14) Tiro ya bone ya go rera e ne ya ama jang lefatshe lotlhe? “Dinku tse dingwe” tse di fetang dimilione di le supa, go tswa mo “merafeng yotlhe le ditso le ditšhaba le diteme,” di ne tsa phuthiwa mmogo go nna letsomane le le lengwe le batlodiwa ba Modimo. (Joh. 10:16; Tshen. 7:9) Ruri thapelo eno ya ga Jesu e e reng, “gore lefatshe le tle le itse gore [wena Jehofa] o nthomile le gore o ba ratile fela jaaka o nthatile,” e ile ya arabiwa ka tsela e kgolo!—Joh. 17:23.

15. Jesu o ne a dira kopo efe e e kgethegileng mo boemong jwa barutwa ba gagwe ba ba tloditsweng?

¹⁵ Pelenyana mo bosigong jwa Nisane 14, Jesu o ne a galaletsa baaposetoloi ba gagwe le go ba tlotla ka go dira kgolagano le bone gore ba buse mmogo le ene mo Bogosing jwa gagwe. (Luke 22:28-30; Joh. 17:22) Ka jalo, Jesu o ne a rapelela botlhe ba ba tla nnang balatedi ba gagwe ba ba tloditsweng a re: “Rara, ka ga se o se nneileng, ke eletsa gore, kwa ke gone, le bone ba tle ba nne le nna, gore ba bone kgalalelo ya me e o e nneileng, ka gonne o nthatile pele lefatshe le thaiwa.” (Joh. 17:24) Seno ga se dire gore dinku tse dingwe tsa ga Jesu di fufege, go na le moo, di a itumela mme gape ke bosupi jwa gore Bakeresete botlhe ba boammaaruri ba ba mo lefatsheng gompieno ba na le kutlwano.

16, 17. (a) Fa Jesu a ne a konela thapelo ya gagwe, o ne a bontsha gore o ikemiseditse go dira eng? (b) Rona re tshwanetse go ikemisetsa go dira eng?

¹⁶ Baeteledipele ba bodumedi ba tlhotlheletsa batho ba le bantsi mo lefatsheng, gore ba itlhokomolose bosupi jo bo bonalang sentle jwa gore Jehofa o na le batho ba ba seoposengwe, ba ruri ba mo itseng. Go ne go ntse jalo le mo motlheng wa ga Jesu. Ka jalo, Jesu o konela thapelo ya gagwe ka mafoko ano a a kgatlhang: “Rara yo o siameng, eleruri lefatshe, ga le ise le bo le go itse; mme nna ke a go itse, le bano ba a go itse gore o nthomile. Mme ke ba itsisitse leina la gago e bile ke tla dira gore le itsiwe, gore lorato lo o nthatileng ka lone lo tle lo nne mo go bone le nna ke le seoposengwe le bone.”—Joh. 17:25, 26.

¹⁷ Ke mang yo o ka ganetsang gore Jesu o ne a dira dilo go dumalana le thapelo ya gagwe? E re ka e le Tlhogo ya phuthego, o tswelela a re thusa gore re itsise leina la ga Rraagwe le maikaelelo a Gagwe. E kete re ka tswelela re ikobela botlhogo jwa gagwe ka go tlhoafalela go reetsa taelo ya gagwe ya go ruta le go dira batho barutwa. (Math. 28:19, 20; Dit. 10:42) Gape, a re direng ka natla gore re tswelele re na le kutlwano e e molemo mo phuthegong. Fa re dira jalo, re tla bo re dira dilo go dumalana le thapelo ya ga Jesu, gore re galaletse leina la ga Jehofa le gore re nne le boitumelo jo bo sa feleng.