Re Tswa Kae?

KE KA NTLHA YANG FA KARABO YA POTSO ENO E LE BOTLHOKWA? Batho ba le bantsi ba rutiwa gore botshelo bo itlhagetse fela ka kotsi. Ba bolelelwa gore go ne ga nna le mogolagang wa ditiragalo o o itlhagetseng fela o mo go one ditshedi di neng tsa iphetogela ka botsone go nna tse dingwe le go tlhagisa batho ba ba nang le maikutlo, ba ba botlhale le ba ba nang le bokgoni jwa go batla go itse ka bokao jwa botshelo.

Mme akanya: Fa e le gore tota re itlhagetse fela mme ga go na Mmopi, seno se raya gore batho ba ne ba tla nna dikhutsana. Go ne go se kitla go nna le motho ope yo o nang le botlhale jwa maemo a a kwa godimo yo batho ba neng ba ka mo kopa kgakololo—go se na ope yo o neng a ka re thusa go rarabolola mathata a rona. Re ne re tla tshwanelwa ke go ikaega ka botlhale jwa batho go tila masetlapelo a tlholego, go rarabolola dikgotlhang tsa dipolotiki le go re kaela fa re na le mathata.

A dintlha tseno di dira gore o nne le kagiso ya mogopolo? Fa go sa nna jalo, akanya ka kgang ya gore go na le mongwe yo o nang le botlhale jo bogolo. Seno ga se kgatlhe fela mme gape se a utlwala.

Se Baebele e se Buang

Baebele e ruta gore batho ba bopilwe ke Modimo ka tlhamalalo. Ga re a nna teng ka tsela e e tlhalosiwang ke kgopolo e e supang go sa amege ka batho le e e sa utlwaleng ya gore ditshedi di iphetogetse ka botsone go nna tse dingwe. Go na le moo, re bana ba Rre yo o lorato le yo o botlhale. Ela tlhoko dipolelo tseno tse di utlwalang sentle tse di mo Baebeleng.

Genesise 1:27. “Modimo a bopa motho mo setshwanong sa gagwe, a mmopa mo setshwanong sa Modimo; a ba bopa monna le mosadi.”

Pesalema 139:14. “Ke tla go baka ka gonne ke dirilwe ka tsela e e boitshegang e e gakgamatsang. Ditiro tsa gago di a gakgamatsa, jaaka moya wa me o lemoga sentle.”

Mathaio 19:4-6. “A lo ne lwa se ka  lwa bala gore yo o neng a ba bopa go tswa kwa tshimologong o ne a ba dira monna le mosadi a ba a re, ‘Ka lebaka leno monna o tla tlogela rraagwe le mmaagwe mme o tla ngaparela mosadi wa gagwe, mme bobedi jono bo tla nna nama e le nngwe’? Mo e leng gore ga ba tlhole ba le babedi, mme ke nama e le nngwe. Jalo, se Modimo a se kopantseng mmogo a motho ope a se se kgaoganye.”

Ditiro 17:24, 25. “Modimo yo o neng a dira lefatshe le dilo tsotlhe tse di mo go lone, e re ka, jaaka Yono a ntse, e le Morena wa legodimo le lefatshe, ga a nne mo ditempeleng tse di dirilweng ka diatla, le gone ga a direlwe ke diatla tsa motho jaaka e kete o ne a tlhoka sengwe, ka gonne ene ka boene o naya batho botlhe botshelo le mohemo le dilo tsotlhe.”

Tshenolo 4:11. “O a tshwanela, Jehofa, wena Modimo wa rona, go amogela kgalalelo le tlotlo le maatla, ka gonne o bopile dilo tsotlhe, mme ka ntlha ya thato ya gago di ne tsa nna gone e bile di ne tsa bopiwa.”

Kafa Dikarabo Tsa Baebele di Lereng Kagiso ya Mmatota ya Mogopolo ka Gone

Go itse gore ‘lelapa lengwe le lengwe mo lefatsheng le bidiwa ka Modimo’ go fetola tsela e re lebang batho ba bangwe ka yone. (Baefeso 3:15) Gape go itse seo go ama kafa re itebang ka gone le kafa re lebang mathata a rona ka gone. Tsela e re akanyang ka yone e tla amega ka ditsela tse di latelang.

Fa re tshwanelwa ke go dira ditshwetso tse di boima, ga re kitla re tshwenyega thata ka dikgopolo tsa batho tse di ganetsanang. Go na le moo, re tla tshepa kgakololo ya Baebele re sa belaele. Ka ntlha yang? Ka gonne “Lokwalo lotlhe lo tlhotlheleditswe ke Modimo e bile lo tswela mosola mo go ruteng, mo go kgalemeleng, mo go tlhamalatseng dilo, mo go otlhayeng ka tshiamo, gore motho wa Modimo a tshwanelege ka botlalo, a tlhomeleletse ka botlalo go dira tiro nngwe le nngwe e e molemo.”—2 Timotheo 3:16, 17.

Ke boammaaruri gore go dirisa kgakololo ya Baebele go tlhoka maiteko le gore re ikgaleme. Ka dinako tse dingwe kaelo ya yone e ka tlhoka gore re itshware ka tsela e e bonalang e sa dumalane le se re se ratang. (Genesise 8:21) Le fa go ntse jalo, fa re amogela gore re bopilwe ke Rre yo o lorato yo o kwa legodimong, go a utlwala go swetsa ka gore o itse tsela e e molemolemo e re tshwanetseng go dira dilo ka yone. (Isaia 55:9) Lefoko la gagwe le re tlhomamisetsa jaana: “Ikanye Jehofa ka pelo ya gago yotlhe mme o se ka wa ikaega ka tlhaloganyo ya gago. Mo tseye tsia mo ditseleng tsotlhe tsa gago, mme o tla tlhamalatsa ditselana tsa gago.” (Diane 3:5, 6) Fa re dirisa kgakololo eo, bontsi jwa dilo tse re tshwenyegang ka tsone fa re lebane le mathata le fa re tshwanelwa ke go dira ditshwetso di tla fela.

Fa re tlhaolwa ka lotso, ga re kitla re tshwenngwa ke maikutlo a go inyatsa, re akanya gore ka tsela nngwe ga re botlhokwa go na le batho ba mmala o mongwe kgotsa ba setso se sengwe. Go na le moo, re tla itlotla. Ka ntlha yang? Ka gonne Rraarona, Jehofa Modimo, “ga a na tlhaolele, mme mo setšhabeng sengwe le sengwe motho yo o mmoifang a ba a dira tshiamo o a amogelesega mo go ene.”—Ditiro 10:34, 35.

Go itse seo go tla re thusa gape gore re se ka ra letla gore go tlhaolwa ga batho ka lotso go fetole tsela e rona re akanyang ka yone ka batho ba bangwe. Re tla tlhaloganya gore ga go na lebaka lepe la gore re ikutlwe re le botoka go gaisa batho ba lotso lo longwe, e re ka Modimo a “dirile setšhaba sengwe le sengwe sa batho go tswa mo mothong a le mongwe, gore ba nne mo godimo ga lefatshe lotlhe.”—Ditiro 17:26.

Eleruri, go itse gore re ne ra bopiwa le gore Mmopi wa rona o amega ka rona go dira gore re nne le kagiso ya mmatota ya mogopolo. Mme go tlhokega se se fetang seo fa re batla go tswelela re na le kagiso ya mogopolo.

[Mafoko a a mo go tsebe 4]

A batho ba ne ba itlhagela fela?

[Setshwantsho mo go tsebe 5]

Go itse gore Mmopi wa rona o amega ka rona go ka dira gore re nne le kagiso ya mmatota ya mogopolo