2 Nna le Kitso e e Boammaaruri ka Modimo

“Seno se raya botshelo jo bo sa khutleng, go tsenya kitso ka ga gago, Modimo yo o esi wa boammaaruri.”—Johane 17:3.

O KA LEBANA LE KGWETLHO EFE? Batho bangwe ba re Modimo ga a yo. Ba bangwe ba re Modimo ga se motho, ke maatla mangwe. Ba ba dumelang gore ke motho wa mmatota ba ruta dithuto tse di ganetsanang kaga gore ke mang le gore o na le dinonofo dife.

O KA FENYA KGWETLHO EO JANG? Tsela nngwe e o ka itseng Modimo ka yone ke ka go leba dilo tse a di dirileng. Moaposetoloi Paulo o ne a re: “Dinonofo tse di sa bonaleng tsa gagwe [Modimo] di bonwa sentle mo popong ya lefatshe go ya pele, ka gonne di lemogiwa ka dilo tse di dirilweng, e leng maatla a gagwe a a sa feleng le Bomodimo.” (Baroma 1:20) Fa o ela tlhoko popo o ka ithuta go le gontsi ka botlhale le maatla a Mmopi wa rona.—Pesalema 104:24; Isaia 40:26.

Mme gone gore batho ba itse gore Modimo o ntse jang, ba tshwanetse go tlhatlhoba se se mo Lefokong la  Modimo e leng Baebele. O se ka wa letla batho ba bangwe gore ba bope tsela e o akanyang ka yone. Go na le moo, latela kgakololo ya Baebele e e reng: “Tlogelang go bopega jaaka tsamaiso eno ya dilo, mme lo fetolwe ka go fetola megopolo ya lona, gore lo iponele se thato ya Modimo e e molemo le e e amogelesegang le e e itekanetseng e leng sone.” (Baroma 12:2) Ka sekai, ela tlhoko dintlha tse di latelang tse Baebele e di senolang ka Modimo.

Modimo o na le leina. Kwa tshimologong leina la Modimo le ne le tlhagelela ka makgetlo a le diketekete mo Baebeleng. Dithanolo di le dintsi di le kwadile mo go Pesalema 83:18 e e reng: “Gore ba tle ba itse fa wena wesi; yo leina la gago e leng Jehofa, o le Mogodimodimo, o okame lefatshe lotlhe.”—Baebele e e Boitshepo.

Jehofa Modimo o amiwa ke dilo tse batho ba di dirang. Fa Jehofa a sena go golola Baiseraele kwa bokgobeng kwa Egepeto, ka dinako dingwe ba ne ba itlhokomolosa kgakololo ya gagwe e e botlhale. Botsuolodi jwa bone bo ne jwa “mo utlwisa botlhoko.” Ditiro tsa bone di ne tsa “utlwisa Moitshepi wa Iseraele botlhoko.”—Pesalema 78:40, 41.

Jehofa o amega ka mongwe le mongwe wa rona. Fa Jesu a ne a bua le barutwa ba gagwe o ne a re: “A dithaga tse pedi ga di rekisiwe ka ledi la tshipi la tlhwatlhwa e e kwa tlase? Le fa go ntse jalo ga go le fa e le nngwe ya tsone e e tla welang fa fatshe kwantle ga kitso ya ga Rraalona. Mme meriri ya ditlhogo tsa lona e badilwe yotlhe. Jalo se boifeng: lo botlhokwa go feta dithaga tse dintsi.”—Mathaio 10:29-31.

Modimo ga a rate batho ba lotso kgotsa morafe o mongwe go feta ba bangwe. Moaposetoloi Paulo o ne a bolelela Bagerika ba kwa Athena gore Modimo o “dirile setšhaba sengwe le sengwe sa batho go tswa mo mothong a le mongwe, gore ba nne mo godimo ga lefatshe lotlhe.” Mme gape o ne a re Modimo ga a “kgakala thata le mongwe le mongwe wa rona.” (Ditiro 17:26, 27) Moaposetoloi Petere o ne a re: “Modimo ga a na tlhaolele, mme mo setšhabeng sengwe le sengwe motho yo o mmoifang a ba a dira tshiamo o a amogelesega mo go ene.”—Ditiro 10:34, 35.

MELEMO YA GO NNA LE KITSO E E BOAMMAARURI KA MODIMO KE EFE? Batho bangwe ba “na le tlhoafalo ka Modimo; mme e seng go ya ka kitso ya boammaaruri.” (Baroma 10:2) Fa o itse se tota Baebele e se rutang ka Modimo, o ka se tsiediwe mme o tla ‘atamalana le Modimo.’—Jakobe 4:8.

Go bona tshedimosetso e e oketsegileng, bona kgaolo 1, ya buka ya Totatota Baebele e Ruta Eng? * mo setlhogong se se reng “Dithuto Tsa Boammaaruri ke Dife ka Modimo?”

[Ntlha e e kwa tlase]

[Setshwantsho mo go tsebe 6]

Tsela nngwe e o ka itseng Modimo ka yone ke ka go leba dilo tse a di dirileng