Se re Se Ithutang mo go Jesu

Ka “Bokhutlo”

Bokhutlo jwa eng?

Barutwa ba ga Jesu ba ne ba mmotsa jaana: “Sesupo e tla nna eng sa go nna gone ga gago le sa bokhutlo jwa tsamaiso eno ya dilo?” (Mathaio 24:3) Fa Jesu a ne a araba potso eo ga a ka a re lefatshe le tla fedisiwa. Pelenyana o ne a bua ka “tsamaiso ya dilo” mme o ne a dirisa mafoko ano fa a ne a bua ka tsamaiso yotlhe ya dipolotiki, kgwebo le ya bodumedi e e laolwang ke Satane. (Mathaio 13:22, 40, 49) Ka jalo, ke yone tsamaiso e a neng a bua ka yone fa a ne a re: “Bokhutlo bo tla tla.”—Mathaio 24:14.

Jesu o ne a tlhalosa bokhutlo jang?

Bokhutlo jwa tsamaiso eno e e sa siamang ke “dikgang tse di molemo.” Jesu o ne a re: “Dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe; mme go tswa foo bokhutlo bo tla tla.” Jesu o ne a tlhalosa bokhutlo jwa tsamaiso eno ya dilo jaana: “Go tla nna le pitlagano e kgolo e e jaaka e e iseng e ko e nne fa e sale ka tshimologo ya lefatshe go fitlha jaanong, nnyaa, le gone e se kitla e nna gone gape. Tota e bile, fa malatsi ao a ne a sa khutshwafadiwa, go ka bo go se na nama epe e e tla bolokwang.”—Mathaio 24:14, 21, 22.

Go tla senngwa bomang?

Go tla senngwa fela batho ba ba sa rateng Jehofa le Jesu le ba ba sa mo direleng. Batho ba ba ntseng jalo ga ba ikobele Modimo. Jesu o ne a re: “Gonne fela jaaka malatsi a ga Noa a ne a ntse, go nna gone ga Morwa motho go tla nna jalo. Gonne fela jaaka ba ne ba ntse mo malatsing ao pele ga morwalela, . . . ba se ka ba tsaya tsia go fitlha morwalela o tla o bo o ba gogola botlhe.” (Mathaio 24:36-39) Jesu o ne a re ba  le bantsi ba mo tseleng e e isang kwa tshenyegong. Le fa go ntse jalo, o ne a solofetsa gore go na le ‘tsela e e pitlaganeng e e isang botshelong.’—Mathaio 7:13, 14.

Tsamaiso eno ya dilo e tla fela leng?

Fa Jesu a ne a bodiwa ka sesupo sa go nna gone ga gagwe “le sa bokhutlo jwa tsamaiso eno ya dilo,” o ne a araba jaana: “Setšhaba se tla tsogologela setšhaba le bogosi bo tsogologele bogosi, mme go tla nna le ditlhaelo tsa dijo le dithoromo tsa lefatshe . . . mme ka ntlha ya go oketsega ga go tlhoka molao lorato lwa ba le bantsi lo tla tsidifala.” (Mathaio 24:3-12) Ka jalo, dikgang tsotlhe tse di sa itumediseng gompieno di na le bokao jo bo kgothatsang—go ise go ye kae Bogosi jwa Modimo bo tla leretse batho ba ba kutlo kagiso. Jesu o ne a re: “Fa lo bona dilo tseno di diragala, itseng gore bogosi jwa Modimo bo gaufi.”—Luke 21:31.

Ke eng se o tshwanetseng go se dira?

Jesu o ne a re Modimo o ne a “ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.” (Johane 3:16) Gore o kgone go dumela mo Modimong le mo go Morwawe o tshwanetse go ba itse sentle. Ka jalo, Jesu o ne a re: “Seno se raya botshelo jo bo sa khutleng, go tsenya kitso ka ga gago, Modimo yo o esi wa boammaaruri, le ka ga yo o mo romileng, e bong Jesu Keresete.”—Johane 17:3.

Ela tlhoko gore ditlhobaelo tsa botshelo le mathata a se ka a go thibela go ithuta kafa o ka bontshang ka gone gore o rata Modimo. Jesu o ne a re: ‘Itlhokomeleng gore dipelo tsa lona di se ka le ka motlha tsa imelwa ke . . . ditlhobaelo tsa botshelo, mme ka tshoganyetso letsatsi leo la lo wela ka ponyo ya leitlho jaaka seru. Gonne le tla tla.’ Fa o tsaya tsiya tlhagiso ya ga Jesu, o tla ‘atlega mo go faloleng dilo tseno tsotlhe tse di laoletsweng go diragala.’—Luke 21:34-36.

Go bona tshedimosetso e e oketsegileng bona kgaolo 9 e e nang le setlhogo se se reng, “A re Tshela mo ‘Metlheng ya Bofelo’?” mo bukeng ya Totatota Baebele e Ruta Eng? *

[Ntlha e e kwa tlase]