A THAPELO e ka re thusa ka tsela nngwe? Baebele e bontsha gore dithapelo tsa batlhanka ba ba ikanyegang ba Modimo ruri di ba solegela molemo. (Luke 22:40; Jakobe 5:13) Tota e bile, thapelo e ka re solegela molemo thata mo semoyeng, mo maikutlong le e leng mo mmeleng. E ka dira seo jang?

A re re ngwana wa gago o newa mpho. A o tla mo ruta gore go tla bo go lekane fela go ikutlwa a tshwanelwa ke go leboga? Kgotsa a o tla mo ruta gore a bue gore o a leboga? Fa re tlhalosa kafa re ikutlwang ka gone, seo se dira gore re akanyetse kwa teng ka maikutlo ao. A go nna jalo le fa re bua le Modimo? Ee, ruri! Ela tlhoko dikai tse di latelang.

Dithapelo tsa tebogo. Fa re leboga Rraarona ka ntlha ya dilo tse di molemo tse di re diragalelang, re tlhoma mogopolo mo masegong a re nnang le one. Seno se ka dira gore re leboge fela thata, re itumele re bo re nne le boikutlo jo bo siameng.—Bafilipi 4:6.

Sekai: Jesu o ne a leboga Rraagwe ka ntlha ya tsela e a neng a utlwa le go araba dithapelo tsa gagwe ka yone.—Johane 11:41.

Dithapelo tsa go kopa boitshwarelo. Fa re kopa gore Modimo a re itshwarele, re dira gore segakolodi sa rona se re tsibose, re ikwatlhaya le go feta e bile re lemoga thata kafa boleo jwa rona bo leng masisi ka teng. Gape re imologa mo boikutlong jwa go nna molato.

Sekai: Dafide o ne a rapela go bontsha gore o a ikwatlhaya le gore o utlwile botlhoko.—Pesalema 51.

Dithapelo tsa go kopa kaelo le botlhale. Go kopa Jehofa gore a re kaele kgotsa a re neye botlhale jo re bo tlhokang gore re dire ditshwetso tse di molemo go ka re thusa gore re ikokobetse go tswa pelong. Go ka re gopotsa gore go na le dilo tse re tlhaelang mo go tsone mme ga re thusa gore re ikanye Rraarona yo o kwa legodimong.—Diane 3:5, 6.

Sekai: Solomone o ne a ikokobetsa mme a kopa kaelo le botlhale jwa gore a buse Baiseraele.—1 Dikgosi 3:5-12.

Dithapelo tsa fa motho a ngomogile pelo. Fa re bulela Modimo mafatlha fa re kgoberegile maikutlo, re tla ikutlwa re imologile mme re tla ikaega ka Jehofa go na le go ikaega ka borona.—Pesalema 62:8.

Sekai: Kgosi Asa o ne a rapela fa a ne a lebane le mmaba.—2 Ditiragalo 14:11.

Dithapelo tsa go rapelela batho ba ba tlhokang thuso. Dithapelo tse di ntseng jalo di re thusa go tila go nna pelotshetlha mme di dira gore re tlhomogele batho ba bangwe pelo le go ba akanyetsa.

Sekai: Jesu o ne a rapelela balatedi ba gagwe.—Johane 17:9-17.

Dithapelo tsa pako. Fa re baka Jehofa ka ntlha ya dinonofo le ditiro tsa gagwe tse di gakgamatsang, re tla mo tlotla le go mo rata fela thata. Gape dithapelo tse di ntseng jalo di tla re thusa gore re atamalane thata le Modimo wa rona le Rraarona.

Sekai: Dafide o ne a baka Modimo ka ntlha ya popo ya gagwe.—Pesalema 8.

Masego a mangwe a motho a a bonang fa a rapela ke “kagiso ya Modimo e e gaisang kakanyo yotlhe.” (Bafilipi 4:7) Go nna le kagiso mo lefatsheng leno le le tletseng mathata ke selo se batho ba se bonang ka sewelo. Kagiso eno e ka dira gore re solegelwe molemo mo mmeleng. (Diane 14:30) A mme gone re ka e bona fela ka ntlha ya maiteko a rona re a dirang? Kgotsa a go na le sengwe se se botlhokwa se re tshwanetseng go se dira?