Ithute mo Lefokong la Modimo

O ka Lemoga Jang Bodumedi Jwa Boammaaruri?

Setlhogo seno se botsa dipotso tse o ka tswang o kile wa di botsa se bo se bontsha gore o ka bona dikarabo tsa tsone kae mo Baebeleng ya gago. Basupi ba ga Jehofa ba ka itumelela go tlotla ka dikarabo tseno le wena.

1. A go na le bodumedi bo le bongwe fela jwa boammaaruri?

Jesu o ne a ruta balatedi ba gagwe ka bodumedi bo le bongwe fela, bodumedi jwa boammaaruri. Bo ntse jaaka tsela e e isang kwa botshelong. Jesu o ne a bua jaana ka tsela eo: “Ba ba e bonang ba . . . mmalwa.” (Mathaio 7:14) Modimo o amogela fela kobamelo e e theilweng mo Lefokong la gagwe la boammaaruri. Botlhe ba e leng baobamedi ba boammaaruri ba seoposengwe mo tumelong e le nngwe fela.—Bala Johane 4:23, 24; 14:6; Baefeso 4:4, 5.

2. Ke ka ntlha yang fa madumedi a le mantsi a a farologaneng a iphaka gore ke a Bokeresete?

Baporofeti ba maaka ba kgotletse kobamelo ya Bokeresete mme ba e dirisitse gore ba itsholegele molemo. Jaaka Jesu a ile a bolelela pele, ba itira e kete ke “dinku” tsa gagwe mme ba itshwara jaaka diphiri tse di tshwerweng ke tlala. (Mathaio 7:13-15, 21, 23) Bokeresete jwa maaka bo ile jwa ata, segolobogolo fa baaposetoloi ba ga Jesu ba sena go swa.—Bala Ditiro 20:29, 30.

3. Dingwe tsa dilo tse di tlhaolang bodumedi jwa boammaaruri ke dife?

Baobamedi ba boammaaruri ba tlotla Baebele e le Lefoko la Modimo. Ba lwela go tshela ka melaometheo ya yone. Ka jalo bodumedi jwa boammaaruri ga bo tshwane le bodumedi jo bo theilweng mo dikgopolong tsa batho. (Mathaio 15:7-9) Baobamedi ba boammaaruri ga ba rute sengwe ba bo ba dira se sele.—Bala Johane 17:17; 2 Timotheo 3:16, 17.

Bodumedi jwa boammaaruri bo tlotla leina la Modimo, Jehofa. Jesu o ne a itsise batho leina la Modimo. O ne a ba thusa go itse Modimo mme a ba ruta go rapelela gore leina la Modimo le itshepisiwe. (Mathaio 6:9) Mo lefelong le o nnang mo go lone, ke bodumedi bofe jo bo rotloetsang batho go dirisa leina la Modimo?—Bala Johane 17:26; Baroma 10:13, 14.

  4. O ka lemoga jang baobamedi ba boammaaruri?

Bakeresete ba boammaaruri ba rera ka Bogosi jwa Modimo. Modimo o ne a romela Jesu gore a rere ka Bogosi. Bogosi jwa Modimo ke jone fela bo tla namolang batho. Jesu o ne a tswelela a bua ka jone go fitlha ka letsatsi le a suleng ka lone. (Luke 4:43; 8:1; 23:42, 43) O ne a laela balatedi ba gagwe gore ba rere ka Bogosi jwa Modimo. Fa mongwe a tla go bua le wena ka Bogosi jwa Modimo, e ka tswa e le wa bodumedi bofe?—Bala Mathaio 10:7; 24:14.

Balatedi ba ga Jesu ga ba karolo ya lefatshe leno le le boikepo. Ga ba nne le seabe mo dikgannyeng tsa bopolotiki kgotsa mo dikgogakgoganong tsa setšhaba. (Johane 17:16) Gape ga ba latele ditiro le maikutlo a a sa siamang a lefatshe.—Bala Jakobe 1:27; 4:4.

5. Letshwao la konokono la Bokeresete jwa boammaaruri ke lefe?

Bakeresete ba boammaaruri ba ratana ka lorato lo logolo. Ba ithuta mo Lefokong la Modimo gore ba tlotle batho ba ditso tsotlhe. Le fa gantsi bodumedi jwa maaka bo ile jwa ema dintwa tsa ditšhaba nokeng fela thata, baobamedi ba boammaaruri bone ga ba dire jalo. (Mika 4:1-4) Go na le moo, batho ba ba leng mo bodumeding jwa boammaaruri ba dirisa nako le dithoto tsa bone go thusa le go kgothatsa ba bangwe.—Bala Johane 13:34, 35; 1 Johane 4:20, 21.

Basupi ba ga Jehofa e le setlhopha, ba bontshitse gore ba theile dithuto tsotlhe tsa bone mo Lefokong la Modimo, ba tlotla leina la Modimo, e bile ba rera ka Bogosi jwa Modimo gore ke jone fela bo tla namolang batho. Ba na le lorato e bile ga ba tsene mo dintweng.—1 Johane 3:10-12.

Fa o batla tshedimosetso e e oketsegileng, bona kgaolo 15 ya buka ya Totatota Baebele e Ruta Eng? e e gatisitsweng ke Basupi ba ga Jehofa.

[Setshwantsho mo go tsebe 16]

“Ba bolela phatlalatsa gore ba itse Modimo, mme ba mo itatola ka ditiro tsa bone.”—Tito 1:16