Tsela ya go Ruta Bana ka Modimo—Ke Mekgwa Efe E e Ka Nnang le Matswela a a Molemo?

“Mafoko ano a ke a go laolelang gompieno a nne mo pelong ya gago; o a jalele kwa teng mo go morwao o bo o bue ka one fa o ntse mo ntlong ya gago le fa o tsamaya mo tseleng le fa o rapama le fa o tsoga.”—DUTERONOME 6:6, 7.

KA DINAKO tse dingwe batsadi ba ka fitlhela boikarabelo jwa go thapisa bana ba bone e le namane e tona ya tiro. Mme fa ba batla thuso ba ka tlhakanngwa tlhogo le go feta ke mefuta e mentsintsi ya kgakololo e e malebana le kgang eno. Gantsi ba losika le ditsala ba itlhaganelela go ba naya dikakantsho. Mme dibuka, ditlhogo tsa dimakasine le tshedimosetso e e mo Internet di naya batsadi kgakololo e ntsi e ka dinako tse dingwe e ganetsanang.

Mme Baebele yone e naya batsadi kgakololo e e ka ikanngwang malebana le gore bana ba ka rutiwa eng le kaelo e e mosola ya gore ba ka rutiwa jang. Fela jaaka ditemana tse di nopotsweng fa godimo di bontsha, batsadi ba tshwanetse go bona tsela nngwe ya go bolelela bana ba bone ka Modimo letsatsi le letsatsi. Fa tlase fano go tla tlotliwa ka dikakantsho di le nnè fela tse di theilweng mo Baebeleng tse di thusitseng batsadi ba le diketekete go ruta bana ba bone ka Modimo.

1. Ba rute ka popo. Moaposetoloi Paulo o ne a kwala jaana: “Dinonofo tse di sa bonaleng tsa [Modimo] di bonwa sentle mo popong ya lefatshe go ya pele, ka gonne di lemogiwa ka dilo tse di dirilweng, e leng maatla a gagwe a a sa feleng le Bomodimo.” (Baroma 1:20) Batsadi ba ka dira go le gontsi go thusa bana ba bone go lemoga gore Modimo ke Motho wa mmatota wa moya ka go ba bontsha dilo tse Modimo a di bopileng ba bo ba ba thusa go lemoga gore dilo tseo di bontsha dinonofo dife tsa Modimo.

Jesu o ne a dirisa mokgwa ono fa a ruta barutwa ba gagwe. Ka sekai, o ne a re: “Lepang ka kelotlhoko dinonyane tsa legodimo, ka gonne ga di jale peo le gone ga di robe le gone ga di phuthele mo matlong a polokelo; le fa go ntse jalo Rraalona wa selegodimo o a di fepa. A ga lo botlhokwa go feta tsone?” (Mathaio 6:26) Fano Jesu o ne a bontsha dinonofo tse Jehofa a nang le tsone e leng lorato le bopelotlhomogi. Mme o ne a dira se se fetang seo. O ne a thusa barutwa ba gagwe go akanya ka tsela e Modimo a bontshang bana ba gagwe dinonofo tseno ka yone.

Kgosi Solomone yo o botlhale o ne a bua ka botlhale jwa tlholego jo Modimo a bo neileng ditshoswane mme a dirisa dibopiwa tseno tse dinnye go ruta thuto ya botlhokwa. O ne a kwala jaana: “Tsamaya o ye kwa tshoswaneng, wena setshwakga; bona ditsela tsa yone mme o tlhalefe. Le fa e se na molaodi, modiredi kgotsa mmusi,  e baakanya dijo tsa yone selemo; e phuthile dijo tsa yone ka nako ya thobo.” (Diane 6:6-8) A bo eno e le tsela e e molemo jang ya go ruta bana botlhokwa jwa gore ba ipeele mekgele e e siameng ba bo ba dirisa maatla a ba a neilweng ke Modimo go e fitlhelela!

Batsadi ba ka etsa tsela e e nang le matswela e Jesu le Solomone ba neng ba ruta ka yone ka go dira se se latelang: (1) Go botsa bana ba bone gore ba rata dimela kgotsa diphologolo dife. (2) Go ithuta mo go oketsegileng ka dimela le diphologolo tseo. (3) Go ithuta ka Modimo mo dilong tse di ntseng jalo tse a di bopileng.

2. Etsa boikutlo jo Jesu a neng a na le jone ka batho ba a neng a ba ruta. Jesu o ne a na le dilo tse di botlhokwa tse a ka di buang go gaisa motho ope yo o kileng a tshela. Le fa go ntse jalo, go le gantsi o ne a botsa dipotso. O ne a kgatlhegela thata dikakanyo le maikutlo a batho ba a neng a ba ruta. (Mathaio 17:24, 25; Mareko 8:27-29) Ka tsela e e tshwanang, go na le dithuto tse dintsi tsa botlhokwa tse batsadi ba ka di rutang bana ba bone. Le fa go ntse jalo, ba ka nna le matswela fa ba etsa Jesu ka go kgothaletsa bana ba bone gore ba ntshe maikutlo a bone ka tshosologo.

Go tweng fa bana ba bontsha boikutlo jo bo sa siamang kgotsa ba le bonya go ithuta thuto nngwe ya botlhokwa? Akanya ka tsela e Jesu a neng a dirisana le baaposetoloi ba gagwe ka yone. Ka dinako tse dingwe ba ne ba galefelana mme ba le bonya go ithuta melemo ya go ikokobetsa. Le fa go ntse jalo, Jesu o ne a nna a le pelotelele e bile gangwe le gape a ba bolelela botlhokwa jwa go ikokobetsa. (Mareko 9:33, 34; Luke 9:46-48; 22:24, 25) Batsadi ba ba etsang Jesu ba tla kgalemela bana ba bone ka bopelotelele mme fa go tlhokega ba tla boaboeletsa thuto e le nngwe go fitlha bana ba tlhaloganya sentle kafa e leng botlhokwa ka gone. *

3. Ruta ka go tlhoma sekao. Batsadi ba tshwanetse go latela kgakololo e moaposetoloi Paulo a neng a e naya Bakeresete ba ba neng ba nna kwa Roma. O ne a ba kwalela jaana: “Le fa go ntse jalo, a wena yo o rutang motho mongwe o sele, a ga o ithute? Wena, yo o rerang o re ‘O se ka wa utswa,’ a o a utswa?”—Baroma 2:21.

Kgakololo eo e a tshwanela ka gonne bana ba tlhotlhelediwa thata ke se ba bonang batsadi ba bone ba se dira go feta se ba se buang. E bile tota gantsi fa batsadi ba dira se ba se rutang, bana ba bone ba a ba reetsa.

4. Lore lo ojwa lo sa le metsi. Timotheo, yo o neng a tsamaya le moaposetoloi Paulo mo maetong a gagwe a borongwa, o ne a buiwa molemo mo setšhabeng sa gagabo. (Ditiro 16:1, 2) Lebaka lengwe e ne e le ka gonne o ne a rutilwe “mekwalo e e boitshepo go tswa boseeng.” Mmaagwe Timotheo le nkokoagwe ba ne ba mmalela Dikwalo mme gape ba ne ba mo thusa go tlhatlhanya ka dithuto tsa boammaaruri tse di mo mekwalong eo.—2 Timotheo 1:5; 3:14, 15.

Kwa o ka Bonang Thuso Teng

Basupi ba ga Jehofa ba gatisa dikgatiso di le dintsi tse di diretsweng go thusa batsadi go ruta bana ba bone boammaaruri ka Modimo. Dingwe tsa tsone di kwaletswe bana. Tse dingwe di ka thusa batsadi le bana ba bone ba ba mo dingwageng tsa bolesome go buisana ka tshosologo. *

Gone ke boammaaruri gore pele batsadi ba ruta bana ba bone ka Modimo, ba tshwanetse go itse dikarabo tsa dingwe tsa dipotso tse di thata tse bana ba ka di botsang. Ka sekai, o ka araba jang dipotso tse di jaaka eno: Ke ka ntlha yang fa Modimo a letlelela pogo? Modimo o ikaeletse eng ka lefatshe? Baswi ba kae? Basupi ba ga Jehofa ba ka rata go go thusa go bona dikarabo tsa dipotso tseo le tse dingwe gore wena le ba lelapa la gago lo kgone go atamalana le Modimo.—Jakobe 4:8.

[Dintlha tse di kwa tlase]