BANGWE ba re ga go a siama go botsa Modimo dipotso. Ba ka tswa ba akanya gore ke go sa bontshe Modimo tlotlo go mmotsa gore ke ka ntlha yang fa a letlelela kgotsa a sa letlelele dilo tse di rileng go diragala. A o ikutlwa jalo?

Fa e le gore o ikutlwa jalo, o ka gakgamadiwa ke go utlwa gore batho ba le bantsi ba ba siameng ba ile ba botsa Modimo dipotso. Ela tlhoko dikai tsa dipotso tse di latelang tse ba ileng ba mmotsa tsone:

Monna yo o ikanyegang e bong Jobe: “Ke ka ntlha yang fa baikepi ba tswelela ba tshela, ba tsofetse, e bile ba humile mo gogolo?”—Jobe 21:7.

Moporofeti yo o ikanyegang e bong Habakuke: “Ke ka ntlha yang fa o leba ba ba dirang ka boferefere, o didimala fa mongwe yo o boikepo a kometsa mongwe yo o siameng go mo feta?”—Habakuke 1:13.

Jesu Keresete: “Modimo wa me, Modimo wa me, o ntatlhetseng?”—Mathaio 27:46.

Fa o bala ditemana tse di dikologileng mafoko ao a a nopotsweng, o ka se bone sepe se se bontshang gore Jehofa * Modimo o ne a kgopisiwa ke go bodiwa dipotso tse di ntseng jalo. Tota ga go gakgamatse go bo a ile a ba tlogela gore ba botse dipotso tseo. Ka sekai, Modimo ga a kgopisege fa re mo kopa gore a re neye dilo tse re di tlhokang tse di dirang gore mebele ya rona e nne e itekanetse. O itumelela go re naya se re se tlhokang. (Mathaio 6:11, 33) Ka tsela e e tshwanang, o re naya ka go rata tshedimosetso e e dirang gore re nne re itekanetse mo tlhaloganyong le mo maikutlong. (Bafilipi 4:6, 7) Tota e bile Jesu o ne a raya barutwa ba gagwe a re: “Nnang lo kope, mme lo tla newa.” (Mathaio 7:7) Mafoko a tsholofetso ya ga Jesu a bontsha gore o ne a sa bue fela ka go amogela dilo tse di bonalang mme gape a bontsha gore o ne a bua ka go bona dikarabo tsa dipotso tse di botlhokwa.

Fa o ne o ka newa tshono ya go botsa Modimo potso, o ne o ka rata go mmotsa potso efe ya tse di latelang?

• A botshelo jwa me bo na le boikaelelo?

• Go tla direga eng ka nna fa ke swa?

• Ke ka ntlha yang fa o ntlogela ke boga?

E re ka “lokwalo lotlhe lo tlhotlheleditswe ke Modimo,” o tla bona dikarabo tse Modimo a re nayang tsone mo Lefokong la gagwe e leng Baebele. (2 Timotheo 3:16) Sekaseka lebaka la go bo bangwe ba ile ba botsa dipotso tse di bontshitsweng fa godimo le dikarabo tse di tswang mo Baebeleng.