Ke tsholetswe kwa Santo Domingo, Dominican Republic, ke le ngwana wa bofelo mo go ba le banè. Batsadi ba me ba ne ba rutegile mme ba ne ba batla gore bana ba bone ba golele mo gare ga batho ba ba siameng le ba ba ikanyegang. Dingwaga di le nnè pele ga ke tsholwa, batsadi ba me ba ne ba kopana le barongwa ba Ba-Mormon. E re ka batsadi ba me ba ne ba kgatlhilwe ke tsela e makawana a kereke eno a neng a le bothakga ka yone e bile a le maitseo, ka bonako fela ba ne ba ne ba swetsa ka gore lelapa la gaetsho le tshwanetse go nna lengwe la malapa a ntlha a a tla nnang maloko a Kereke ya Jesus Christ of Latter-day Saint kgotsa Kereke ya Ba-Mormon.

Fa ke ntse ke gola, ke ne ke rata dilo tse di neng di dirwa kwa kerekeng mme ke tlotla lebaka la go bo Ba-Mormon ba tlhoma mogopolo thata mo botshelong jwa lelapa le boitsholo. Ke ne ke ipelela go nna Mo-Mormon mme ka ipeela mokgele wa go nna morongwa.

Fa ke le dingwaga di le 18, lelapa la gaetsho le ne la fudugela kwa United States ka boikaelelo jwa gore ke ye yunibesithing. Ngwaga morago ga foo, mmangwane le monna wa gagwe ba e leng Basupi ba ga Jehofa, ba ne ba tla go re etela kwa Florida. Ba ne ba re laletsa go ya le bone kwa kopanong e e theilweng mo Baebeleng. Ke ne ka kgatlhwa ke go bona mongwe le mongwe yo o gaufi le nna a lebelela ditemana le go kwala dintlha. Ka jalo, ke ne ka kopa pene le pampiri mme le nna ka simolola go dira jalo.

Morago ga kopano mmangwane le monna wa gagwe ba ne ba re, e re ka ke kgatlhegela go nna morongwa, ba ka nthusa go ithuta sengwe ka Baebele. Ke ne ke akanya gore ke kgopolo e ntle ka gonne ka nako eo, ke ne ke tlwaetse Buka ya Ba-Mormon thata go na le Baebele.

Fa re ntse re tlotla ka Baebele re dirisa founo, ka metlha mmangwane le monna wa gagwe ba ne ba nkgothaletsa go bapisa  dilo tse ke di dumelang le dithuto tsa Baebele. Ba ne ba batla gore ke iponele boammaaruri.

Go ne go na le dilo tse dintsi tse ke neng ke di amogela ka bodumedi jwa Ba-Mormon mme ke ne ke sa tlhomamisege gore di tsamaisana jang le Dikwalo. Mmangwane o ne a nthomelela makasine wa Tsogang! wa November 8, 1995 (ka Seesemane), o o gatisitsweng ke Basupi ba ga Jehofa o o neng o na le ditlhogo dingwe tse di buang ka bodumedi jwa Ba-Mormon. Ke ne ka gakgamadiwa ke go bona gore go ne go na le dilo tse dintsi tse ke neng ke sa di itse ka dithuto tsa Ba-Mormon. Seo se ne sa ntlhotlheletsa go sekaseka Web site ya semolao ya Ba-Mormon go tlhomamisa gore a dilo tse di tlhalosiwang mo makasineng wa Tsogang! di boammaaruri. Di ne di le boammaaruri, mme ke ne ka tlhomamisega le go feta ka seo fa ke ne ke etetse dimusiamo tsa Ba-Mormon kwa Utah.

Ke ne ke ntse ke dumela gore Buka ya Ba-Mormon le Baebele di a dumalana. Mme fa ke simolola go bala Baebele ka kelotlhoko, ke ne ka lemoga go sa tshwane ga dithuto tsa Ba-Mormon le se se buiwang mo Baebeleng. Ka sekai, mo go Esekiele 18:4 Baebele ya re moya wa swa. Le fa go ntse jalo, mo Bukeng ya Ba-Mormon mo go Alma 42:9 ya re: “Moya o ka se swe.”

Mo godimo ga dithuto tseo tse di sa tlhomamang, ke ne ka tshwenngwa ke dikgopolo tsa bosetšhaba tse di neng di rutiwa ke Ba-Mormon. Ka sekai, Ba-Mormon ba rutiwa gore tshimo ya Edene e ne e le kwa Jackson County, Missouri, U.S.A. Gape baporofeti ba kereke ba ruta gore Bogosi jwa Modimo bo tla busa lefatshe bo dirisa puso ya United States.

Ke ne ke ipotsa gore naga e ke tsholetsweng kwa go yone—kgotsa naga epe fela—e tla solegelwa molemo jang ke seno. Ke ne ka bua ka kgang eno maitseboa mangwe fa ke ne ke tlotla le Mo-Mormon mongwe yo mosha mo founong, yo o neng a thapisediwa go nna morongwa. Ke ne ka mmotsa gore a o ne a tla lwa le Mo-Mormon ka ene fa naga ya gagabo e ne e ka lwa le naga ya Ba-Mormon ba bangwe. Ke ne ka gakgamala fa a re ee! Ke ne ka dira dipatlisiso tse di oketsegileng ka dithuto tsa bodumedi jwa me ka ba ka ya go tlotla le baeteledipele ba ba nang le maikarabelo mo Kerekeng ya Ba-Mormon. Ke ne ka bolelelwa gore dikarabo tsa me di amana le masaitsiweng a a tla rarabololwang letsatsi lengwe fa lesedi le ntse le oketsega.

E re ka ke ne ke swabisitswe ke ditlhaloso tsa bone, ke ne ka itshekatsheka ka bo ka sekaseka le lebaka la go bo ke batla go nna morongwa wa Mo-Mormon. Ke ne ka lemoga gore lebaka la go bo ke batla go nna morongwa e ne e le ka go bo ke ne ke batla go thusa batho ba bangwe. Gape ke ne ke kgatlhwa ke maemo a go nna morongwa. Mme fa go tla mo Modimong, ke ne ke sa itse sepe ka ene. Le fa nkile ka bala Baebele ka makgetlho a le mantsi mo nakong e e fetileng, ke ne ke sa e anaanele. Ke ne ke sa itse sepe ka boikaelelo jwa Modimo, ka lefatshe le ka batho.

Dilo dingwe tse ke ileng ka di ithuta fa ke ntse ke ithuta Baebele le Basupi ba ga Jehofa, e ne e le gore leina la Modimo ke mang, go diragala eng fa re swa le gore Jesu o na le seabe sefe mo go diragatseng boikaelelo jwa Modimo. Kgabagare ke ne ka simolola go tlhaloganya buka e e kgatlhang eno mme ke ne ke itumelela go bolelela ba bangwe ka boammaaruri jo ke neng ke bo ithuta. Ke ne ke ntse ke itse gore Modimo o teng mme gone jaanong ke kgona go bua le ene ka thapelo jaaka Tsala ya me e kgolo. Ke ne ka kolobediwa go nna mongwe wa Basupi ba ga Jehofa ka July 12, 2004 mme dikgwedi di le thataro moragonyana ka simolola tiro ya nako e e tletseng mo bodireding jwa Bokeresete.

Ke ile ka bereka kwa ntlokgolong ya Basupi ba ga Jehofa kwa Brooklyn, New York ka dingwaga di le tlhano. Tota ke itumeletse go bo ke ile ka kgona go thusa go gatisa Dibaebele le dikgatiso tse di theilweng mo Baebeleng tse di solegelang batho ba le dimilione go ralala lefatshe molemo, mme ke ntse ke tswelela go itumelela go thusa ba bangwe go ithuta ka Modimo.