Fa re bala Baebele, go motlhofo go swetsa ka gore Satane ke boikepo jotlhe jo bo dirwang. Mme a ke se tota Baebele e se rutang? Fa go le jalo, ke ka ntlha yang fa Baebele e re Satane o ne a bua le Jesu Keresete le Modimo Mothatayotlhe? Akanya ka dikai tse pedi tsa dipuisano tseno.

Fa Jesu a ne a simolola bodiredi jwa gagwe, Diabolo o ne a leka go mo raela ka makgetlo a mararo. La ntlha, Satane o ne a leka go raela Jesu gore a dirise maatla a Modimo a mo fileng one ka bopelotshetlha gore a kgotsofatse keletso e a nang le yone ya dijo. Go tswa foo, Diabolo o ne a gwetlha Jesu gore a tsenye botshelo jwa gagwe mo kotsing ka boomo le gore a itlotlomatse. La bofelo, Satane o ne a solofetsa Jesu gore o tla mo naya magosi otlhe a lefatshe fa a ne a ka mo obamela. Jesu o ne a gana dithaelo tseo tse di bofitlha a nopola Dikwalo mo makgetlong otlhe a mararo.—Mathaio 4:1-11; Luke 4:1-13.

Jesu o ne a bua le mang? Le bosula bongwe jo bo mo teng ga gagwe? Dikwalo tsa re Jesu ‘o lekilwe ka ditsela tsotlhe jaaka rona, mme a se na boleo.’ (Bahebera 4:15) Gape Baebele ya re: “Ga a ka a dira boleo bope, le gone ga go a ka ga fitlhelwa tsietso mo molomong wa gagwe.” (1 Petere 2:22) Jesu o ne a tswelela a se na boleo e bile o ne a ikanyega botshelo jotlhe. Ga a ka a itetla go nna le kakanyo epe e e boikepo. Go bonala sentle gore Jesu o ne a sa bue le bosula bongwe jo bo mo teng ga gagwe; o ne a bua le motho wa mmatota.

Puisano eno e na le bosupi jo bongwe jo bo bontshang gore Satane ke motho wa mmatota.

• Gakologelwa gore Diabolo o ne a solofetsa Jesu gore o tla mo naya magosi otlhe a lefatshe fa a ne a ka mo obamela. (Mathaio 4:8, 9) Seno se ne se ka se kgonege fa e le gore Satane e ne e se motho wa mmatota. Mo godimo ga moo, Jesu ga a ka a ganetsa Satane gore o na le taolo eo.

• Fa Jesu a sena go gana dithaelo tseo, Diabolo o ne “a tswa mo go ene go fitlha ka nako e nngwe e e mo siametseng.” (Luke 4:13) A fano Satane e ka tswa e le boikepo jo bo mo mothong kgotsa mmaba yo o ikemiseditseng go tswelela a raela?

• Ela tlhoko gore ‘baengele ba ne ba tla mme ba simolola go direla’ Jesu. (Mathaio 4:11) A baengele bao e ne e le batho ba moya ba ba neng ba kgothatsa le go thusa Jesu? Ee, go ntse jalo. A tota go a utlwala go akanya gore Satane ga se motho wa moya wa mmatota?

Puisano ya bobedi ke ya pego ya monna yo o boifang Modimo e bong Jobe. Pego eo e bua ka metlotlo  e mebedi magareng ga Diabolo le Modimo. Mo makgetlong ano a mabedi, Modimo o ne a gatelela kafa Jobe a neng a ikanyega ka gone. Satane o ne a re Jobe o direla Modimo ka mabaka a bogagapa le gore Jobe o ikanyega ka gonne Modimo a mo direla dilo dingwe. Tota fano, Diabolo o ne a dira maiphako a gore o itse Jobe botoka go feta Modimo. Jehofa o ne a letla Satane gore a amoge Jobe dikhumo, bana, tota le botsogo jwa gagwe. * Fa nako e ntse e tsamaya, go ne ga bonala sentle gore se Jehofa a neng a se bua ka ga Jobe se boammaaruri, le gore Satane o ne a bua maaka. Modimo o ne a segofatsa Jobe ka ntlha ya boikanyegi jwa gagwe.—Jobe 1:6-12; 2:1-7.

Mo dipuisanong tseo tsa fa Modimo a ne a bua le Satane, a Jehofa o ne a bua le bosula bongwe jo bo mo teng ga gagwe? Baebele ya re: “Modimo wa boammaaruri ene, tsela ya gagwe e itekanetse.” (2 Samuele 22:31) Gape Lefoko la Modimo la re: “O boitshepo, o boitshepo, o boitshepo Jehofa Modimo, Mothatayotlhe.” (Tshenolo 4:8) Boitshepo ke go nna phepa, go itsheka le go tlhoka boleo. Jehofa ga a na boleo e bile ga a dire diphoso. Ga go na tlhasenyana epe ya boikepo mo go ene.

Le fa go ntse jalo, batho bangwe ba ka re Jobe ga se motho wa mmatota, ka jalo puisano eno ke tlhamane fela. A mme seo se a utlwala? Ditemana tse dingwe tsa Baebele di bontsha gore Jobe e ne e le motho wa mmatota. Ka sekai, mo go Jakobe 5:7-11 go dirisiwa sekao sa ga Jobe go tlhotlheletsa Bakeresete gore ba itshokele mathata le go ba gopotsa gore Jehofa o segofatsa boitshoko joo. Fa e le gore Jobe e ne e se motho wa mmatota e bile ditlhaselo tsa ga Satane e le ditlhamane, sekao seo se ne se tla nna le tlhotlheletso efe? Mo godimo ga moo, Esekiele 14:14, 20 e na le lenaane la banna ba bararo ba ba siameng, Jobe ke mongwe wa bone, ba bangwe ke Noa le Daniele. Fela jaaka Noa le Daniele, Jobe e ne e le motho wa mmatota, monna yo o nang le tumelo e e nonofileng. Fa e le gore Jobe e ne e le motho wa mmatota, motho yo o neng a mo tlhasela e bile a mmogisa le ene e tshwanetse ya bo e le motho wa mmatota.

Baebele e bontsha sentle gore Satane ke motho wa moya. Gongwe o ka tswa o ipotsa go re, ‘A a ka tlhagisetsa nna le ba lelapa la me kotsi gompieno?’

A re re setlhopha sengwe sa dikebekwa se thologela mo toropong ya lona ka tshoganyetso. Ga go pelaelo gore tshireletsego ya batho e tla nna mo kotsing le boitshwaro bo tla senyega. Jaanong akanya ka seno: Satane le madimona a gagwe—dibopiwa tse di neng tsa tsuologela Modimo jaaka Satane—ba latlhelwa mo lefatsheng ka tshoganyetso. Go ne go tla felela ka eng? Gongwe o ka akanya ka se o se bonang mo dikgannyeng tsa se se diregang mo lefelong la lona kgotsa mo lefatsheng lotlhe.

• A o lemoga kafa ditiro tse di setlhogo tsa thubakanyo di oketsegang ka gone le fa batho mo lefatsheng lotlhe ba leka go di thibela?

• A o lemoga kafa boitlosobodutu jo bo nang le bodimona bo oketsegang ka gone le fa seo se tshwenya batsadi ba le bantsi?

• A o lemoga kafa tikologo e senngwang ka gone le fa batho ba dira maiteko a go e sireletsa?

• A go ka tswa go na le sengwe se se phoso ka batho—gongwe maatla mangwe a a lebisang batho kwa masetlapelong?

Ela tlhoko gore Baebele ya re ke mang yo o bakang mathata ano: “Kgogela e kgolo ya piriganyediwa kwa tlase, noga ya kwa tshimologong, e e bidiwang Diabolo le Satane, yo o tsietsang lefatshe lotlhe le le nang le banni; ya piriganyediwa kwa tlase kwa lefatsheng, le baengele ba yone ba piriganyediwa kwa tlase le yone. . . . A bo go latlhega lefatshe le lewatle, ka gonne Diabolo o fologetse kwa go lona, a le bogale jo bogolo, ka a itse gore o na le lobaka lo lokhutshwane lwa nako.” (Tshenolo 12:9, 12) Morago ga go sekaseka bosupi jono, batho ba bantsi ba ne ba swetsa ka gore Satane ke motho yo o kotsi wa moya e bile o na le tlhotlheletso e kgolo mo lefatsheng.

O ka tswa o ipotsa gore o ka itshireletsa jang. Gone go a utlwala go bo o tshwenyegile ka seo. Setlhogo se se latelang se tla go thusa.