ʻIkai, ʻoku ʻikai totonu ke tau lotu ki he ngaahi ʻīmisí. ʻI hono fakamatalaʻi ʻa e ngaahi fekau naʻe ʻoange ʻe he ʻOtuá ki he puleʻanga ʻo ʻIsilelí, ʻoku pehē ʻe he New Catholic Encyclopedia: “Mei he ngaahi fakamatala Fakatohitapu kehekehe ʻoku hā mahino ko e kau lotu moʻoni ki he ʻOtuá naʻe ʻikai ke nau ngāueʻaki ha ngaahi ʻīmisi.” Fakakaukau ki he ngaahi veesi Tohi Tapu ko ení:

•   “Kuo pau ke ʻoua naʻá ke ngaohi maʻau ha ʻīmisi kuo tongi pe ko ha fakatātā ʻo fakatatau ki ha meʻa pē ʻoku ʻi he langí ʻi ʻolunga pe ʻi he māmaní ʻi lalo pe ʻi he ngaahi vaí ʻi lolofonua. Kuo pau ke ʻoua naʻá ke punou hifo kiate kinautolu pe hoko ʻo fakataueleʻi ke tauhi kiate kinautolu, he ko au Sihova ko ho ʻOtuá, ko ha ʻOtua ʻokú ne fiemaʻu ʻa e anga-līʻoa maʻataʻatā.” (‘Ekisoto 20:​4, 5) Koeʻuhí ʻoku fiemaʻu ʻe he ʻOtuá ʻa e “anga-līʻoa maʻataʻatā,” ʻoku ʻikai te ne leleiʻia ʻi heʻetau fakalāngilangiʻi pe lotu ki he ngaahi ʻīmisí, fakatātaá, ʻaitolí, fakatātā fakalotú, tā tongitongí pe ko ha ngaahi fakaʻilonga.

•   “ʻE ʻikai te u ʻange hoku langilangi ki ha taha, pe ko hoku ongoongo ki he ngaahi aitoli.” (‘Aisea 42:8, Paaki Foʻou) ʻOku talitekeʻi ʻe he ʻOtuá ʻa e ngaahi lotu ʻoku fai ange kiate ia ʻo fakafou ʻi he ngaahi ʻīmisí. ʻI he taimi naʻe feinga ai ʻa e niʻihi ʻo e kau ʻIsilelí ke lotu kiate ia ʻo ngāueʻaki ha ʻīmisi ʻo ha ʻuhikiʻi pulu, naʻe pehē ʻe he ʻOtuá naʻa nau fakahoko ha “angahala mafatukituki.”​—ʻEkisoto 32:​7-9, Easy-to-Read Version.

•   “ʻOku ʻikai totonu ke tau fakakaukau ʻoku hangē ʻa ʻEne ʻAfió, ʻa e ʻOtuá, ko ha koula pe siliva pe maka, ʻo hangē ko ha meʻa kuo tongi ʻe he poto mo e filioʻi ʻa e tangatá.” (Ngāue 17:29) ʻI he ʻikai hangē ko e kau lotu panganí, ʻa ia ʻoku nau faʻa ngāueʻaki ʻa e ngaahi ʻīmisi “kuo tongi ʻe he poto mo e filioʻi ʻa e tangatá,” ko e kau Kalisitiané ʻoku totonu ke nau “ʻaʻeva ʻaki ʻa e tuí, ʻo ʻikai ʻaki ʻa e mamatá,” ʻo hangē ko ia ko e lau ʻa e Tohi Tapú.​—2 Kolinitō 5:7.

•   “Mou fakamamaʻo mei he ngaahi ʻaitolí.” (1 Sione 5:​21) Fakafou ʻi he ngaahi fekau kuo ʻoatu ki he puleʻanga ʻo ʻIsilelí pea mo e kau Kalisitiané kuo hokohoko atu hono fakaeʻa ʻe he Tohi Tapú, ko e akonaki ʻo fekauʻaki mo hono tali ʻe he ʻOtuá ʻa hono ngāueʻaki ʻa e ngaahi ʻīmisí mo e fakatātā fakalotú ʻi he lotú ko ha talatupuʻa.