Na‘e tala ‘e Sīsū Kalaisi ki hono kau muimuí: “Mou ‘ai ho‘omou māmá ke ulo atu ki he kakaí, koe‘uhí ke nau sio ki ho‘omou ngaahi ngāue leleí pea nau ‘oatu ai ‘a e lāngilangí ki ho‘omou Tamai ‘oku ‘i hēvaní.” (Mātiu 5:16) Ki he taumu‘a ko iá, ‘oku mau ngāuelelei‘aki ai ‘a e tekinolosia fakaeonopōní, ‘o kau ai ‘a e ‘Initanetí. Ko ‘emau uepisaití, jw.org, ko e ma‘u‘anga fakamatala ‘Initaneti faka‘ofisiale ia fekau‘aki mo e ngaahi tui mo e ngaahi ngāue ‘a e Kau Fakamo‘oni ‘a Sihová. Ko e hā ‘oku fakae‘a mai aí?

Ko e ngaahi tali Fakatohitapu ki he ngaahi fehu‘i anga-maheni ‘oku fa‘a ‘eke. ‘E lava ke ke ma‘u ai ‘a e ngaahi tali ki he ni‘ihi ‘o e ngaahi fehu‘i mahu‘inga taha kuo faifai ange pea ‘eke ‘e he kakaí. Ko e fakatātaá, ko e tuleki ʻE Toe Ngata Koā ʻa e Faingataʻá? mo e ʻE Toe Moʻui Mai Koā ʻa e Kau Maté? ʻoku maʻu ʻatu ia ʻi he ʻinitanetí ʻi he lea laka hake ʻi he 600. ‘E lava ke ke toe ma‘u foki ‘a e Liliu Tohi Tapu Māmani Fo‘oú ‘i he lea laka hake ʻi he 130 pea mo ha ngaahi tohi tokoni fakaeako Tohi Tapu, ‘o kau ai ‘a e tohi Ko e Hā ‘Oku Ako‘i Mo‘oni ‘e he Tohi Tapú? pea mo e ngaahi ‘īsiu fakamuimui ‘o e Taua Le‘o mo e ‘Ā Hake! Ko e lahi ‘o e ‘ū tohi ko ení ‘e lava ke lau ia pe fanongo ki ai ‘i he ‘initanetí pe hiki ‘i ha fa‘unga manakoa hangē ko e MP3, PDF, pe EPUB. ‘E a‘u ‘o ke malava ke pulusi mei ai ha ngaahi peesi ke vahevahe ki ha tokotaha mahu‘inga‘ia ‘i he‘ene leá tonu! Ko e ‘ū tohi kuo hiki vitioó ‘oku ala ma‘u ia ‘i he ngaahi lea lahi ‘a e kau noá. ‘E lava ke ke hiki ‘a e ngaahi tulama hiki-le‘o ‘o e lau Tohi Tapú, ngaahi tulama Fakatohitapu, mo e fasi mālie ke fiefia ai ‘i ho taimi mālōloó.

Fakamatala mo‘oni fekau‘aki mo e Kau Fakamo‘oni ‘a Sihová. ‘Oku toe fokotu‘u ai ‘a e ngaahi ongoongo mo e ngaahi vitiō fakamuimui taha fekau‘aki mo ‘emau ngāue ‘i māmani lahí, ngaahi me‘a ‘okú ne uesia ‘a e Kau Fakamo‘oni ‘a Sihová, mo ‘emau ngaahi feinga tokoni ‘ofá. ‘E lava ke ke ma‘u ai ‘a e ngaahi fanongonongo fekau‘aki mo e ngaahi fakataha-lahi ka hoko maí mo e fakamatala fetu‘utaki ki homau ngaahi ‘ōfisi va‘á.

Fakafou ‘i he ngaahi me‘á ni, ‘oku mau ‘ai ke ulo atu ai ‘a e maama ‘o e mo‘oní ki he ngaahi feitu‘u mama‘o taha ‘o e māmaní. Ko e kakai mei he konitinēniti kotoa pē, kau ai ‘a e ‘Anitātiká, ‘oku nau ma‘u ‘aonga mei ai. ‘Oku mau lotu “ke lava ke mafola vave ai pē ‘a e folofola ‘a Sihová” ki he kotoa ‘o e māmaní, ke lāngilangi‘ia ai ‘a e ‘Otuá.​—2 Tesalonaika 3:1.

• ‘Oku tokoni‘i fēfē ‘e he jw.org ‘a e kakai tokolahi ange ke nau ako ‘a e mo‘oni Fakatohitapú?

• Ko e hā te ke sai‘ia ke kumi ki ai ‘i he‘emau uepisaití?