Na‘e ako‘i ‘e Sīsū ki hono kau muimuí ‘a e lotu pē ‘e taha, ko e lotu mo‘oní. ‘Oku hangē ia ha hala ‘oku taki atu ki he mo‘ui ta‘engatá. Na‘e pehē ‘e Sīsū: “Ko e tokosi‘i pē ‘oku nau ‘ilo‘i” ‘a e hala ko iá. (Mātiu 7:14) ‘Oku tali ‘e he ‘Otuá ‘a e lotu pē ko ia ‘oku makatu‘unga ‘i he‘ene Folofola ‘o e mo‘oní. Ko hono kotoa ‘o e kau lotu mo‘oní ‘oku nau fā‘ūtaha ‘i he tui pē ‘e taha.​—Lau ‘a e Sione 4:23, 24; 14:6; ‘Efesō 4:4, 5.

Sio ‘i he vitiō ‘Oku Tali ‘e he ‘Otuá ‘a e Founga Lotu Kotoa Pē?

Na‘e fakatokanga ‘a Sīsū ‘o pehē ‘e ‘i ai ha kau palōfita loi te nau fakamele‘i ‘a e lotu faka-Kalisitiané. ‘I tu‘á, ‘oku nau hā ngali hangē mai ha kau lotu mo‘oní. ‘Oku taukave‘i ‘e honau ngaahi siasí ‘oku nau Kalisitiane. Ka ‘e lava ke ke ‘ilo‘i ‘a e kakai peheé ‘i he tu‘unga mo‘oni ‘oku nau ‘i aí. Anga-fēfē? Ko e lotu mo‘oní pē ‘oku tupu mei ai ‘a e kau Kalisitiane mo‘oní fakataha mo e ngaahi ‘ulungaanga mo e ngaahi founga ‘oku ‘ilo‘ingofua.​—Lau ‘a e Mātiu 7:13-23.

Fakakaukau angé ki he ngaahi faka‘ilonga papau ‘e nima ko ení:

• ‘Oku faka‘apa‘apa‘i ‘e he kau lotu mo‘oní ‘a e Tohi Tapú ko e Folofola ‘a e ‘Otuá ia. ‘Oku nau feinga ke mo‘ui‘aki ‘a hono ngaahi tefito‘i mo‘oní. Ko ia ‘oku kehe ai ‘a e lotu mo‘oní mei he lotu ko ia ‘oku fakatu‘unga ‘i he ngaahi fakakaukau ‘a e tangatá. (Mātiu 15:7-9) ‘Oku ‘ikai ke malanga‘i ‘e he kau lotu mo‘oní ha me‘a ‘e taha pea fai ha me‘a kehe ia.​—Lau ‘a e Sione 17:17; 2 Tīmote 3:16, 17.

•   ‘Oku fakalāngilangi‘i ‘e he kau muimui mo‘oni ‘o Sīsuú ‘a e huafa ‘o e ‘Otuá, ‘a e Sihová. Na‘e fakalāngilangi‘i ‘e Sīsū ‘a e huafa ‘o e ‘Otuá ‘aki hono ‘ai ia ke ‘iloa. Na‘á ne tokoni‘i ‘a e kakaí ke nau ‘ilo‘i ‘a e ‘Otuá pea ako‘i kinautolu ke nau lotu ke fakamā‘oni‘oni‘i ‘a e huafa ‘o e ‘Otuá. (Mātiu 6:9) ‘I he feitu‘u ‘okú ke nofo aí, ko fē ‘a e lotu ‘okú ne ‘ai ke ‘iloa ‘a e huafa ‘o e ‘Otuá?​—Lau ‘a e Sione 17:26; Loma 10:13, 14.

• ‘Oku malanga ‘a e kau Kalisitiane mo‘oní ‘o fekau‘aki mo e Pule‘anga ‘o e ‘Otuá. Na‘e fekau‘i mai ‘e he ‘Otuá ‘a Sīsū ke ne malanga‘i ‘a e ongoongo lelei ‘o e Pule‘angá. Ko e Pule‘anga ‘o e ‘Otuá ‘a e ‘amanaki‘anga pē ‘e taha ki he fa‘ahinga ‘o e tangatá. Na‘e hokohoko atu ‘a e lea ‘a Sīsū ‘o kau ki aí ‘o a‘u ki he ‘aho na‘á ne pekia aí. (Luke 4:43; 8:1; 23:42, 43) Na‘á ne pehē ko hono kau muimuí te nau malanga ‘o fekau‘aki mo ia. Kapau ‘oku fakaofiofi atu ha taha kiate koe ke lea atu ‘o fekau‘aki mo e Pule‘anga ‘o e ‘Otuá, ‘oku ngalingali ko e hā ‘a e lotu ‘okú ne kau ki aí?​—Lau ‘a e Mātiu 24:14.

• Ko e kau muimui ‘o Sīsuú ‘oku ‘ikai ko ha konga kinautolu ‘o e māmani fulikivanu ko ení. ‘E lava ke ke ‘ilo‘i kinautolu ‘i he ‘ikai ke nau kau ‘i he ngaahi me‘a fakapolitikalé pe ngaahi fepaki fakasōsialé. (Sione 17:16; 18:36) Pehē foki, ‘oku ‘ikai te nau fa‘ifa‘itaki ki he ngaahi tō‘onga mo e ngaahi fakakaukau fakatupu maumau ‘a e māmaní.​—Lau ‘a e Sēmisi 4:4.

• ‘Oku ma‘u ‘e he kau Kalisitiane mo‘oní ha fe‘ofa‘aki tu‘u-ki-mu‘a. ‘Oku nau ako mei he Folofola ‘a e ‘Otuá ke nau toka‘i ‘a e ngaahi kulupu fakafa‘ahinga kotoa pē. Neongo kuo fa‘a poupou fefeka ‘a e ngaahi lotu loí ki he ngaahi tau ‘a e ngaahi pule‘angá, ‘oku fakafisi ‘a e kau lotu mo‘oní ia ke fai pehē. (Maika 4:1-3) ‘I hono kehé, ‘oku ngāue‘aki ta‘esiokita ‘e he kau Kalisitiane mo‘oní honau taimí mo ‘enau koloá ki hono tokoni‘i mo fakalototo‘a‘i ‘a e ni‘ihi kehé.​—Lau ‘a e Sione 13:34, 35; 1 Sione 4:20.

Ko fē ‘a e lotu ‘oku fakatu‘unga ‘a e kotoa ‘o ‘ene ngaahi akonakí ‘i he Folofola ‘a e ‘Otuá, fakalāngilangi‘i ‘a e huafa ‘o e ‘Otuá, pea fanongonongo ko e Pule‘anga ‘o e ‘Otuá ‘a e ‘amanaki‘anga pē ‘e taha ki he fa‘ahinga ‘o e tangatá? Ko fē ‘a e kulupu ‘okú ne tō‘onga‘aki ‘a e ‘ofá pea fakamama‘o mei he taú? Ko e hā ho‘o fakakaukaú?​—Lau ‘a e 1 Sione 3:10-12.