ʻI Siulai mo ʻAokosi 2020, ko e fuofua taimi ia ki he fetokouaʻaki ʻi māmani lahí ke nau sio ki he polokalama fakataha-lahí ʻi he vahaʻa taimi tatau. Ka ke malava ení, ko hono hiki ʻa e polokalamá naʻe fiemaʻu ke liliu ia ki he ngaahi lea laka hake ʻi he 500. Ko e anga-mahení, ʻe fiemaʻu ki he taʻu ʻe taha pe lahi ange hono fokotuʻutuʻu ʻa e ngāué, kau ki ai ʻa hono hiki mo hono liliu ʻa e ngaahi malangá mo e ʻū vitioó. Koeʻuhí ko e mahaki fakaʻauha kolona vailasí naʻe fiemaʻu ai ki he fanga tokoua mo e fanga tuofāfiné ke nau liliu ʻa e Fakataha-Lahi Fakavahe “Fiefia Maʻu Ai Pē”! 2020 siʻi hifo ʻi he māhina ʻe faá.

 Ko e Potungāue Liliu-Leá mo e Potungāue Fakatau ʻa e ʻUluʻi ʻApitanga ʻi Māmani ʻa e Kau Fakamoʻoni ʻa Sihová naʻá na tokoni ki he ngāue lahi ko ení. Naʻe mahino ki he Potungāue Liliu-Leá ko e tokolahi ʻo e ngaahi timi liliú naʻa nau fiemaʻu ʻa e ngaahi meʻangāue lahi ange ke fakahoko ʻaki ʻa e ngāué tautautefito ki he ʻū maika lelei angé. Naʻe fokotuʻutuʻu leva ʻe he Potungāue Fakataú ke fakatau mai ha ʻū maika ʻe 1,000 pea ʻoatu ia ki he ngaahi feituʻu ʻe meimei 200.

 Ke fakahaofi ʻa e paʻangá, naʻe fakatau ʻe he Potungāue Fakataú ha ʻū maika lahi pea ʻave leva ia ki ha feituʻu ʻe taha pea toki fakafolau mei ai ki he kau liliu-leá. Koeʻuhí ko ʻemau fakatau lahi ʻa e ʻū maiká, ko e maika taki taha ne fakaʻavalisi hono mahuʻingá ki he paʻanga ʻAmelika ʻe $170 kau ki ai mo hono fakafolaú, ʻo maʻamaʻa ange ia ʻi hono fakatau taha tahá.

 Naʻe ngāue ʻa e Potungāue Fakataú ki hono fakatau mo hono fakafolau atu ʻa e ngaahi meʻá ni lolotonga ʻa ʻEpeleli mo Mē 2020, ko ha vahaʻa taimi eni ne fakangatangata ai ʻa e ngāue ʻa e ngaahi pisinisí koeʻuhi ko e mahaki fakaʻauhá. Kae kehe ʻi he aʻu ki he ngataʻanga ʻo Meé, ko e lahi taha ʻo e ngaahi ʻōfisi liliu-lea tuʻu mavahé, ngaahi ʻōfisi vaʻá mo e ngaahi faiʻanga liliu-lea kehé, naʻa nau maʻu ʻa e meʻangāue naʻe fiemaʻú.

 “Naʻe ʻi ai ʻa e fengāueʻaki lelei ʻi he vahaʻa ʻo e ngaahi potungāue ʻa e Pētelí mo e ngaahi pisinisí lolotonga ʻa e ngāue ko ení” ko e lau ia ʻa Jay Swinney ʻa ia ʻokú ne tokangaʻi ʻa e Potungāue Fakataú. “ʻI he tokoni pē ʻa e laumālie ʻo Sihová, ne mau lava ke fakahoko vave eni pea ngāue lelei taha ʻaki ʻa e paʻanga tokoní ke tokoni ki hotau fanga tokouá mo e fanga tuofāfiné.”

 Ko Nicholas Ahladis ʻa ia ʻoku ngāue mo e Potungāue Liliu-Leá ʻokú ne pehē: “Ko e kau liliu-lea ʻa ia naʻa nau ʻi he tuʻunga fakangatangata koeʻuhi ko e fakataputapuí naʻe fakalototoʻaʻi lahi kinautolu ʻi heʻenau maʻu ʻa e meʻangāué. Neongo ʻenau nofo mavahe mei he toenga ʻo e timi liliu-leá ne nau lava pē ʻo ngaue fakataha ke liliu pea hiki ʻa e ngaahi malanga, tulama mo e ngaahi hiva laka hake ʻi he ngaahi lea ʻe 500.”

 Ko e fakatau ko ʻení ko e konga ia ʻo e ngaahi ngāue ke fakakakato ʻaki hono faʻu ʻo e Fakataha-Lahi “Fiefia Maʻu Ai Pē!” 2020, maʻá e fetokouaʻaki ʻi māmani lahí. Ko hoʻo tokoni nima-homo fakafou he donate.mt1130.com mo e founga kehe pē naʻe ʻai ai ke malava hono fakatau ʻa e ngaahi meʻa ʻoku fiemaʻú.