1-2. (a) Ko fē nai ʻa e taimi ʻe tautefito ʻene faingataʻa ke tau fakamolemoleʻi ha tahá? (e) Naʻe anga-fēfē hono fakahāhā ʻe Denise ʻa e fakamolemolé?

 ʻOKU faingataʻa kiate koe ke fakamolemoleʻi ʻa e niʻihi kehé? ʻOku pehē ʻa e tokolahi ʻo kitautolu, tautefito ʻi he taimi ʻoku leaʻaki pe fai ʻe ha taha ha meʻa naʻá ne fakalotomamahiʻi lahi kitautolu. Kae kehe, ʻe lava ke tau ikuʻi ʻetau ongoʻi loto-mamahí pea hoko ʻo fakamolemole. Ko e fakatātaá, fakakaukau ki he hokosia ha tuofefine ko Denise, a naʻá ne fakahāhā ʻa e fakamolemole naʻe makehe atu. ʻI he 2017, ko Denise mo hono fāmilí naʻa nau toki ʻaʻahi pē ki he ʻUluʻi ʻApitanga ʻi Māmani ʻo e Kau Fakamoʻoni ʻa Sihová ʻa ia naʻe toki fakaava foʻoú. ʻI heʻenau foki ki honau ʻapí, ko ha fakaʻuli ʻe taha naʻe ʻikai ke ne lava ʻo mapuleʻi ʻene kaá ʻo ne sīfā ʻo tuiʻi ʻenau meʻalelé. Naʻe pongia ʻa Denise ʻi he hoko ʻa e fakatuʻutāmakí. ʻI heʻene ake haké, naʻá ne ʻiloʻi ko ʻene fānaú naʻa nau lavea lahi pea ko hono husepānití, ʻa Brian, naʻá ne mate. ʻI he fakakaukauloto ki he mōmeniti ko iá, ʻoku pehē ʻe Denise, “Naʻá ku ongoʻi loto-mafesi mo puputuʻu.” Ki mui ai, naʻá ne ʻiloʻi naʻe ʻikai ke konā ʻa e fakaʻulí ia pe fakaleluʻi ʻe ha meʻa, ko ia naʻá ne lotu kia Sihova ki ha nonga.

² Naʻe fakaʻilo ʻa e fakaʻulí ki he tāmate tangata. Kapau te ne halaia, ʻe lava ke tuku pilīsone ia. Kae kehe, naʻe fakahā ʻe he fakamaauʻangá kia Denise ko e tautea ʻo e tangatá ʻe makatuʻunga ʻi heʻene fakamoʻoní. ʻOku pehē ʻe Denise: “Naʻá ku ongoʻi ʻo hangē naʻe hanga ʻe ha tokotaha ʻo toʻo ʻa hoku ngaahi mata-tuituí pea huaʻi ha fokotuʻunga māsima ʻi hoku laveá, ʻi he pau ke u toe fakamatalaʻi ʻa e ngaahi mōmeniti fakamamahi taha ʻo ʻeku moʻuí.” ʻI ha uike siʻi ki mui ai, naʻe tangutu ʻa Denise ʻi ha fale hopo pea teuteu ke fehangahangai mo e tangata naʻá ne fakatupunga ʻa e  mamahi lahi ki hono fāmilí. Ko e hā naʻá ne leaʻakí? Naʻe kole ʻa Denise ki he fakamāú ke fakahāhā ha meesi ki he tangatá. b ʻI he ʻosi ʻene leá, naʻe tangi ʻa e fakamāú. Naʻá ne pehē: “ʻI he kotoa ʻo e taʻu ʻe 25 ʻo ʻeku ngāue ko ha fakamāú, kuo teʻeki ai ke u fanongo ʻi ha meʻa hangē ko ení ʻi hoku fale hopó. ʻOku teʻeki ai ke u fanongo ki ha tautapa ʻa e fāmili ʻo e mamahí ki ha meesi maʻá e fakaʻiloá. ʻOku teʻeki ai ʻaupito ke u fanongo ki he foʻi lea ko e ʻofa mo e fakamolemole.”

 3. Ko e hā naʻá ne ueʻi ʻa Denise ke fakamolemolé?

³ Ko e hā naʻá ne tokoniʻi ʻa Denise ke ne hoko ʻo fakamolemolé? Naʻá ne fakalaulauloto ki he fakamolemole ʻa Sihová. (Mai. 7:18) ʻI heʻetau houngaʻia ʻi he fakamolemole kuo fakahaaʻi mai ʻe Sihová, ʻe ueʻi ai kitautolu ke fakamolemoleʻi ʻa e niʻihi kehé.

 4. Ko e hā ʻoku fiemaʻu ʻe Sihova ke tau faí? (ʻEfesō 4:32)

⁴ ʻOku fiemaʻu ʻe Sihova ke tau fakamolemoleʻi loto-lelei ʻa e niʻihi kehé ʻo hangē pē ko ʻene fakamolemoleʻi loto-lelei kitautolú. (Lau ʻa e ʻEfesō 4:32.) ʻOkú ne ʻamanekina mai ke tau hoko ʻo mateuteu ke fakamolemoleʻi ʻa e faʻahinga naʻa nau fakalotomamahiʻi kitautolú. (Saame 86:5; Luke 17:4) ʻI he kupu ko ení, te tau lāulea ki he meʻa ʻe tolu te ne tokoniʻi kitautolu ke tau hoko ʻo fakamolemole lahi ange.

ʻOUA ʻE TUKUNOAʻI HOʻO NGAAHI ONGOʻÍ

 5. Fakatatau ki he Palōveepi 12:​18, ʻe fēfē nai ʻetau ongoʻí ʻi he taimi ʻoku fakalotomamahiʻi ai kitautolu ʻe ha taha?

⁵ Te tau loto-mamahi lahi nai koeʻuhí ko ha meʻa naʻe leaʻaki pe fai mai ʻe ha taha, tautefito kapau ko e tokotaha ko iá ko ha kaumeʻa ofi pe mēmipa ʻo e fāmilí. (Saame 55:​12-14) ʻI he taimi ʻe niʻihi, ko e mamahi fakaeongo ʻoku tau tofanga aí ʻe lava ke fakahoa ia ki hano hokaʻi ʻaki kita ha hele. (Lau ʻa e Palōveepi 12:18.) Te tau feinga nai ke lōmia pe tukunoaʻi ʻetau ngaahi ongoʻi mamahí. Ka ko e fai peheé ʻe hangē ia ko hano hokaʻi pea tuku ai pē ʻa e helé ʻi he laveá. ʻI he tuʻunga meimei tatau, heʻikai lava ke tau ʻamanekina ʻe fakaʻaʻau ke lelei ange ʻetau ngaahi ongoʻi mamahí kapau ʻoku tau tukunoaʻi pē ia.

 6. ʻE anga-fēfē nai ʻetau fakafeangai ʻi he taimi ʻoku fakalotomamahiʻi ai kitautolu ʻe ha taha?

⁶ ʻI he taimi ʻoku fakalotomamahiʻi ai kitautolu ʻe ha taha, ko ʻetau fuofua fakafeangai nai ki aí ko e ʻita. ʻOku fakahaaʻi ʻe he Tohi Tapú te tau hoko nai ʻo ʻita. Kae kehe, ʻoku fakatokanga mai ai ke ʻoua ʻe fakaʻatā ʻa e ongoʻi ko iá ke ne puleʻi kitautolu. (Saame 4:4; ʻEf. 4:26) Ko e hā hono ʻuhingá? Koeʻuhi ko ʻetau ngaahi ongoʻí ʻoku faʻa taki atu ia ki hono fai ha meʻa. Pea ko e ʻitá ʻoku tātātaha ʻene iku atu ki ha ngaahi ola ʻoku lelei. (Sēm. 1:20) Manatuʻi, ko e ʻitá ko ha fakafeangai, ka ko e ʻita fuoloá ko e fili ia ʻaʻau.

 7. Ko e hā ha ngaahi ongoʻi kehe te tau hokosia nai ʻi hono fakalotomamahiʻi kitautolu ʻe ha taha?

⁷ ʻI he fai mai ha fakafeangai kovi kiate kitautolu, te tau maʻu nai ʻa e ngaahi ongoʻi mamahi fakaeongo kehe. Ko e fakatātaá, ko ha tuofefine ko Ann ʻokú ne pehē: “ʻI heʻeku kei siʻí, naʻe liʻaki ʻe heʻeku tamaí ʻeku faʻeé kae mali mo e fefine naʻe toʻo-tama ʻia aú. Naʻá ku ongoʻi liʻekina. ʻI he ʻi ai ʻena fānaú, naʻá ku ongoʻi kuo ʻi ai hoku fetongi. Naʻá ku tupu hake mo e ongoʻi tuēnoá.” Ko ha tuofefine ko Georgette ʻokú ne fakamatalaʻi ʻa e anga ʻene ongoʻi ʻi he taʻefaitōnunga hono husepānití kiate iá: “Ko e talu ʻema kaungāmeʻa mei he kei siʻí. Naʻá ma hoa tāimuʻa! Naʻe lavea hoku lotó.” Pea ko ha tuofefine ko Naomi ʻokú ne pehē: “Naʻe ʻikai ʻaupito ke u fakakaukau atu ʻe fakalotomamahiʻi au ʻe hoku husepānití. Ko ia ʻi heʻene vetehia mai naʻá ne sio ʻi he ʻata  fakalieliá pea fufū ia meiate aú, naʻá ku ongoʻi naʻe kākaaʻi au mo lavakiʻi.”

 8. (a) Ko e hā ʻa e ngaahi ʻuhinga ʻe niʻihi ʻoku totonu ai ke tau fakamolemoleʻi ʻa e niʻihi kehé? (e) Ko e hā ʻa e ngaahi ʻaonga ʻoku tau maʻu ʻi heʻetau fakamolemolé? (Sio ki he puha “ Fēfē Kapau Kuo Fakalotomamahiʻi Lahi Kitautolu ʻe ha Taha?”)

⁸ ʻOku ʻikai ke tau lava ʻo puleʻi ʻa e meʻa ʻoku leaʻaki pe fai mai ʻe he niʻihi kehé, ka ʻe lava ke tau feinga ke mapuleʻi ʻetau fakafeangaí. Pea ʻoku faʻa hoko ko e fakafeangai lelei tahá ke fakamolemole. Ko e hā hono ʻuhingá? Koeʻuhí ʻoku tau ʻofa kia Sihova, pea ʻokú ne fiemaʻu ke tau hoko ʻo fakamolemole. Kapau ʻoku tau ʻita ai pē pea ʻikai ke fakamolemole, ʻoku ngalingali te tau fai ha meʻa ngalivale pea faingataʻaʻia fakaesino nai. (Pal. 14:​17, 29, 30) Fakatokangaʻi ʻa e faʻifaʻitakiʻanga ʻa ha tuofefine ko Christine. ʻOkú ne pehē: “ʻI he taimi ʻoku keina ai au ʻe heʻeku ngaahi ongoʻi mamahí, ʻoku ʻikai ke u loko malimali. ʻOku ou hehema ke kai ʻa e ngaahi meʻakai ʻikai moʻui leleí. ʻOku ʻikai ke u maʻu ha mohe feʻunga, pea ʻoku faingataʻa ange ke mapuleʻi ʻeku ngaahi ongoʻí, pea ko hono olá ʻoku uesia ai ʻeku nofo malí pea mo hoku vahaʻangatae mo e niʻihi kehé.”

 9. Ko e hā ʻoku totonu ai ke tau tuku ange ʻa e ʻitá?

⁹ Neongo kapau ko e tokotaha naʻá ne fakalotomamahiʻi kitautolú ʻoku ʻikai ʻaupito ke ne fakahaaʻi ʻene fehālaakí, ʻe lava ke tau fakasiʻisiʻi ʻa e maumau naʻá ne fakatupunga kiate kitautolú. Anga-fēfē? Ko Georgette, naʻe lave ki ai ki muʻá, ʻokú ne pehē: “Naʻe fiemaʻu ha vahaʻa taimi, ka naʻá ku tuku ange ʻa ʻeku loto-mamahi mo e ʻita ʻi hoku husepāniti ki muʻá. Ko e olá, naʻá ku ongoʻi ʻa e nonga lahi fakaʻulia.” ʻI heʻetau tuku ange ʻa e ʻitá, ʻoku tau maluʻi ai hotau lotó mei hono maumauʻi ʻe he loto-koná. ʻOku tau toe fakapaleʻi pē ʻa kitautolu tonu—ʻe lava ke tau kamata ke hoko atu ʻetau moʻuí pea fiefia ai. (Pal. 11:17) Kae fēfē kapau ʻi he hili hoʻo lāuʻilo ki hoʻo ngaahi ongoʻí, ʻoku teʻeki ai pē ke ke mateuteu ke fakamolemole?

FEKUKI MO HOʻO NGAAHI ONGOʻÍ

10. Ko e hā ʻoku totonu ai ke tau fakaʻatā ha taimi ke tau fakaakeake fakaeongo ai? (Sio foki ki he fakatātaá.)

¹⁰ ʻE lava fēfē ke ke ikuʻi ʻa e ngaahi ongoʻi mamahí? Ko e founga ʻe taha ko e tuku ha taimi ke ke fakaakeake ai. Hili hano faitoʻo ha tokotaha naʻe lavea lahi, ʻe fiemaʻu ʻa e taimi ke ne fakaakeake ai. ʻI ha founga meimei tatau, te tau fiemaʻu nai ha taimi ke fakaakeake fakaeongo ki muʻa pea tau mateuteu ke fakamolemoleʻi ha taha mei he lotó.—Tml. 3:3; 1 Pita 1:22.

11. ʻE lava fēfē ke tokoniʻi koe ʻe he lotú ke ke hoko ʻo fakamolemole?

 ¹¹ Lotu, ʻo kole kia Sihova ke ne tokoniʻi koe ke ke hoko ʻo fakamolemole. c Ko Ann, naʻe lave ki ai ki muʻá, ʻokú ne fakamatala ki he anga hono tokoniʻi ia ʻe he lotú. ʻOkú ne pehē: “Naʻá ku kole kia Sihova ke ne fakamolemoleʻi ʻa kimautolu taki taha ʻi he fāmilí ki he ngaahi meʻa naʻe ʻikai ke mau fakahoko lelei. Naʻá ku fai leva ha tohi ki heʻeku tamaí mo hono uaifi foʻoú pea tala ange kuó u fakamolemoleʻi kinaua.” ʻOku fakahaaʻi ʻe Ann naʻe ʻikai ke faingofua hono fai iá. Ka ʻokú ne pehē: “ʻOku ou fakaʻamu pē ko ʻeku feinga ke faʻifaʻitaki ki he fakamolemole ʻa Sihová, ʻe ueʻi ai ʻeku tamaí mo hono uaifí ke na ako lahi ange fekauʻaki mo Sihova.”

12. Ko e hā ʻoku totonu ai ke tau falala kia Sihova kae ʻikai ki heʻetau ngaahi ongoʻí? (Palōveepi 3:​5, 6)

¹² Falala kia Sihova, kae ʻikai ki hoʻo ngaahi ongoʻí. (Lau ʻa e Palōveepi 3:​5, 6.) ʻOku ʻiloʻi maʻu pē ʻe Sihova ʻa e meʻa ʻoku lelei taha kiate kitautolú. (ʻAi. 55:​8, 9) Pea ʻe ʻikai ʻaupito ke ne kole mai ke tau fai ha meʻa te ne uesia kitautolu. Ko ia ai, ʻi heʻene fakalototoʻaʻi kitautolu ke tau hoko ʻo fakamolemolé, ʻe lava ke tau falala pau ko e fai peheé te tau maʻu ʻaonga ai. (Saame 40:4; ʻAi. 48:​17, 18) ʻI he tafaʻaki ʻe tahá, kapau ʻoku tau falala ki heʻetau ngaahi ongoʻí, heʻikai ʻaupito nai ke tau malava ke fakamolemole. (Pal. 14:12; Sel. 17:9) Ko Naomi naʻe lave ki ai ki muʻá, ʻokú ne pehē: “ʻI he kamatá, naʻá ku ongoʻi ʻoku ou tonuhia pē au ʻi he ʻikai ke u fakamolemoleʻi hoku husepānití ʻi heʻene sio ʻi he ʻata fakalieliá. Naʻá ku ilifia naʻá ne toe fakalotomamahiʻi au pe ngalo ʻiate ia ʻa e lahi ʻo e maumau naʻá ne fakatupungá. Pea naʻá ku fakaʻuhinga naʻe mahinoʻi pē ʻe Sihova ʻeku ngaahi ongoʻí. Ka naʻe kamata ke u ʻiloʻi ʻoku ʻikai ke ʻuhinga pē ʻa hono mahinoʻi ʻe Sihova ʻeku ngaahi ongoʻí, ʻokú ne loto-tatau ai mo ia. ʻOkú ne ʻiloʻi ʻa e anga ʻeku ongoʻí pea ʻoku fiemaʻu ʻa e taimi ke fakaakeake ai, ka ʻokú ne toe loto foki ke u fakamolemole.” d

FAKATUPULEKINA ʻA E NGAAHI ONGOʻI LELEÍ

13. Fakatatau ki he Loma 12:​18-21, ko e hā ʻoku fiemaʻu ke tau faí?

¹³ ʻI heʻetau fakamolemoleʻi ha taha naʻá ne fakalotomamahiʻi lahi kitautolu, ʻoku tau loto ke fai ʻa e meʻa lahi ange ʻi he fili pē ke ʻoua  ʻe talanoa ki he meʻa naʻe hokó. Kapau ko e tokotaha naʻá ne fakalotomamahiʻi kitautolú ko hotau tokoua pe tuofefine Kalisitiane, ko ʻetau taumuʻá ke fakamelino. (Māt. 5:​23, 24) ʻOku tau fili ke fetongi ʻetau ʻitá ʻaki ʻa e faimeesi pea fetongi ʻetau loto-mamahí ʻaki ʻa e fakamolemole. (Lau ʻa e Loma 12:​18-21; 1 Pita 3:9) Ko e hā ʻe lava ke ne tokoniʻi kitautolu ke fai iá?

14. Ko e hā ʻoku totonu ke tau feinga mālohi ke faí, pea ko e hā hono ʻuhingá?

¹⁴ ʻOku totonu ke tau feinga mālohi ke vakai ki he tokotaha naʻá ne fakalotomamahiʻi kitautolú ʻo hangē ko e vakai ʻa Sihová. ʻOku fili ʻa Sihova ke fakasio ki he lelei ʻi he kakaí. (2 Kal. 16:9; Saame 130:3) Te tau faʻa maʻu ʻa e meʻa ʻoku tau fakasio ki ai ʻi he kakaí—pe ko e lelei pe kovi. ʻI heʻetau kumi ki he lelei ʻi he niʻihi kehé, ʻe faingofua ange ai ke tau fakamolemoleʻi kinautolu. Ko e fakatātaá, ko ha tokoua ko Jarrod ʻokú ne pehē: “ʻOku faingofua ange ke u fakamolemoleʻi ha tokoua ʻi heʻeku fakahoa ʻene faihalá ki he lisi lōloa ʻo e ngaahi meʻa ʻoku ou saiʻia fekauʻaki mo iá.”

15. Ko e hā ʻe tokoni nai ai ke ke tala ange ki ha tokotaha kuó ke ʻosi fakamolemoleʻi ia?

¹⁵ Ko e meʻa mahuʻinga ʻe taha ke ke fakakaukau ke faí ko e tala ange ki he tokotahá kuó ke ʻosi  fakamolemoleʻi ia. Ko e hā hono ʻuhingá? Fakatokangaʻi ʻa e meʻa ʻoku leaʻaki ʻe Naomi, naʻe lave ki ai ki muʻá: “Naʻe ʻeke mai ʻe hoku husepānití, ‘Kuó ke ʻosi fakamolemoleʻi au?’ ʻI he fakaava pē hoku ngutú ke lea, ‘ʻOku ou fakamolemoleʻi koe,’ naʻe ʻikai ke u toe lava au ʻo lea. Naʻá ku ʻiloʻi naʻe teʻeki ke u fakamolemoleʻi moʻoni ia mei hoku lotó. ʻI he faai atu ʻa e taimí, naʻe lava ke u leaʻaki ʻa e kupuʻi lea mālohi ko iá, ‘ʻOku ou fakamolemoleʻi koe.’ Naʻe ʻikai ke u ʻamanekina ko e lea ko iá ʻe fakanonga ki hoku husepānití ʻo ne fakatō loʻimata ai pea naʻá ku fiemālie. Talu mei ai, kuó u toe langa hake ʻeku falala kiate iá pea ʻokú ma toe kaungāmeʻa fekoekoeʻi.”

16. Ko e hā kuó ke ako fekauʻaki mo e fakamolemolé?

¹⁶ ʻOku fiemaʻu ʻe Sihova ke tau hoko ʻo faʻa fakamolemole. (Kol. 3:13) Neongo ia, te tau fāinga nai ke fakamolemoleʻi ʻa e niʻihi kehé. Ka ʻe lava ke tau fai ia ʻo kapau heʻikai ke tau tukunoaʻi ʻetau ngaahi ongoʻí pea fai ha feinga ke fekuki mo ia. ʻE lava leva ke tau fakatupulekina ha ngaahi ongoʻi foʻou ʻoku leleí.—Sio ki he puha “ Sitepu ʻe Tolu ki he Fakamolemolé.”

TOKANGATAHA KI HE ʻAONGA ʻO E HOKO ʻO FAKAMOLEMOLÉ

17. ʻOku ʻaonga fēfē kiate kitautolu ʻa e hoko ʻo fakamolemolé?

¹⁷ ʻOku lahi ʻa e ngaahi ʻuhinga ke tau hoko ai ʻo fakamolemole. Fakakaukau ki ha niʻihi pē ʻo kinautolu. ʻUluakí, ʻoku tau faʻifaʻitaki pea fakahōifuaʻi ʻetau Tamai faimēsí, ʻa Sihova. (Luke 6:36) Uá, ʻoku tau fakahaaʻi ʻa e houngaʻia ki he fakamolemole kuo fakaaʻu anga-lelei mai ʻe Sihova kiate kitautolú. (Māt. 6:12) Pea ko e tolú, ʻoku tau maʻu ha moʻui ʻoku lelei ange pea tauhi ke mālohi hotau ngaahi kaumeʻá.

18-19. Ko e hā nai ʻa e ola ʻo ʻetau fakamolemolé?

¹⁸ ʻI heʻetau fakamolemoleʻi ʻa e niʻihi kehé, te tau hokosia nai ʻa e ngaahi tāpuaki taʻeʻamanekina. Ko e fakatātaá, fakatokangaʻi ʻa e meʻa naʻe hoko kia Denise, naʻe lave ki ai ki muʻá. Neongo naʻe ʻikai ke ne ʻiloʻi ʻi he taimi ko iá, ko e tangata naʻá ne fakatupunga ʻa e fakatuʻutāmakí naʻá ne palani ke toʻo ʻene moʻuí hili ʻene hopó. Kae kehe, naʻe ueʻi ia ʻe he fakamolemole ʻa Denise ke ne kamata ako ʻa e Tohi Tapú mo e Kau Fakamoʻoni ʻa Sihová.

¹⁹ Te tau ongoʻi nai ko hono fakamolemoleʻi ha tahá ko e meʻa faingataʻa taha ia ʻe faifai ange pea tau faí—ka ʻe hoko nai ia ko e meʻa fakakoloa tahá. (Māt. 5:7) Ko ia ai, fakatauange ke tau fai hotau lelei tahá ke faʻifaʻitaki ki he fakamolemole ʻa Sihová.