NA‘E faka‘atā ‘i he Lao ‘a Mōsesé ‘a e kakaí ke nau fai ha ngaahi fuakava ‘e ni‘ihi ‘aki hono lea‘aki ha me‘a hangē ko ení, “‘Oku ou fakapapau atu ‘i he ‘Otuá,” pe “‘Oku ou fakapapau atu ‘i he huafa ‘o Sihová.” Kae kehe, ‘i he taimi ‘o Sīsuú, na‘e hoko ai ‘o mātu‘aki failahia ‘a e fuakavá ‘o fai ai ‘e he kau Siú ha fakapapau ‘i he meimei me‘a kotoa pē na‘a nau lea‘aki. Na‘a nau fai ení ke fai ha tui lahi ange ki he me‘a na‘a nau lea‘akí, ka na‘e fakahalaia‘i tu‘o ua ‘e Sīsū ‘a e tō‘onga ta‘e‘aonga ko ení. Na‘á ne ako‘i: “‘Ai pē ho‘omou lea ‘‘Ió’ ke ‘uhingá ko e ‘io, mo ho‘omou ‘‘Ikaí’ ke ‘ikai.”—Māt. 5:33-37; 23:16-22.

Fakatatau ki he Theological Dictionary of the New Testament, ‘oku tokoni‘i kitautolu ‘e he Talamatá ke sio ki hono failahia ‘e he kau Siú ‘a e fuakavá, pe fakapapau na‘e mo‘oni ‘enau leá. Na‘e fai ení koe‘uhí ‘oku fakamatala‘i fakaikiiki lahi ‘e he Talamatá ‘a e ngaahi fuakava na‘e pau ke fai ki ai mo e ngaahi fuakava na‘e lava ke maumau‘i.

Na‘e ‘ikai ko Sīsū pē ‘a e toko taha na‘á ne fakahalaia‘i ‘a e tō‘onga hala ko ení. Ko e fakatātaá, na‘e tohi ‘a e faihisitōlia Siu ko Feleviasi Siosifasi fekau‘aki mo ha lotu mavahe faka-Siu na‘a nau faka‘ehi‘ehi mei he fai ha fuakavá. Ko e kau mēmipa ‘i he lotu mavahe ko iá na‘a nau tui ko hono fai ha fuakavá na‘e kovi ange ia ‘i he loí. Na‘a nau tui kapau na‘e pau ke fai ‘e ha tokotaha ha fuakava koe‘uhí ke tui ange kiate ia ‘a e ni‘ihi kehé, ko e tokotaha leva ko iá kuo pau pē ‘okú ne loi. Ko e tohi faka-‘apokalifa faka-Siu ko e Wisdom of Sirach, pe ko e ‘Ekelesiatikusi, (23:11) ‘oku lea‘aki meimei tatau ai: “Ko ha tangata ‘okú ne fai ha fakapapaú ‘okú ne mātu‘aki maumau-lao.” Na‘e fakahalaia‘i ‘e Sīsū ‘a hono fai ha ngaahi fuakava fekau‘aki mo e ngaahi me‘a ta‘emahu‘ingá. Kapau ‘oku tau tala ma‘u pē ‘a e mo‘oní, ‘oku ‘ikai totonu ke tau fai ha fakapapau ke fai ha tui lahi ange ai ki he me‘a ‘oku tau lea‘akí.