Neongo ko e Tohi Tapú ʻoku ʻikai ko ha tohi ako fakafaitoʻo, ʻoku ʻomai ai ʻa e faleʻi ʻaonga mo mahuʻinga. Ko e faleʻi ko ení ʻe lava ke ne tokoniʻi ha taha ʻokú ne fāinga mo e ngaahi palopalema fakaʻatamaí. Fakakaukau ki ha fakatātā ʻe niʻihi.

“Ko e kakai ʻoku moʻui leleí ʻoku ʻikai fiemaʻu ki ai ha toketā, ka ʻoku fiemaʻu ia ki he faʻahinga ʻoku puké.”​—MĀTIU 9:12.

ʻOku fakahaaʻi ʻe he Tohi Tapú ʻe fiemaʻu nai ke tau kumi ki ha tokoni fakafaitoʻo. Ko e tokolahi kuo nau maʻu ʻa e fakanonga mei hono ʻiloʻi ha meʻa fekauʻaki mo ʻenau puke fakaʻatamaí mei he ngaahi maʻuʻanga fakamatala alafalalaʻanga pea mei hono maʻu ʻa e tokoni mei ha toketā.

“Ko e fakamālohisinó ʻoku lelei ki ho sinó.”​—1 TĪMOTE 4:8, Contemporary English Version.

Ko hoʻo vaheʻi ʻa e taimi mo e ivi ki he ngaahi tōʻonga fakatupu moʻui leleí ʻe tokoni nai ia ki he fakalelei ʻatamaí. Ko e ngaahi tōʻonga peheé ʻoku kau ai ʻa e pipiki ki ha taimi-tēpile fakamālohisino tuʻumaʻu, kai moʻui lelei pea maʻu ha mohe feʻunga.

“Ko ha loto-fiefia ko ha faitoʻo lelei, ka ko ha laumālie mafesi ʻokú ne fakamaha ʻa e ivi ʻo ha taha.”​—PALŌVEEPI 17:22.

Ko hono lau ʻa e ngaahi fakamatala fakalototoʻa mei he Tohi Tapú pea fokotuʻu ʻa e ngaahi taumuʻa ʻuhinga lelei mo ala aʻusiá ʻe lava ke tokoni ia ki hono tauhi maʻu ha laumālie fiefia. Ko ha fakakaukau pau mo fakatuʻamelie ʻe lava ke ne tokoniʻi koe  ke ke nofoʻaki mafamafatatau fakaeongo ʻi hoʻo fekuki mo hoʻo ngaahi palopalema fakaʻatamaí.

“Ko e potó ʻoku ʻi he faʻahinga ia ʻoku anga-fakanānaá.”​—PALŌVEEPI 11:2.

Te ke ʻiloʻi nai ʻoku ʻikai malava ke ke fai toko taha pē ʻa e meʻa kotoa ʻokú ke loto ke faí, ko ia loto-lelei ke tali ʻa e tokoni ʻa e niʻihi kehé. Ko e ngaahi kaumeʻá mo e fāmilí ʻoku ngalingali ʻoku nau loto ke tokoni kiate koe, ka heʻikai nai ke nau ʻiloʻi ʻa e meʻa ke faí. ʻAi ke nau ʻiloʻi ʻa e meʻa ʻe tautefito ʻene tokoni kiate koé. Hoko ʻo fakaʻatuʻi ʻi he meʻa ʻokú ke ʻamanekiná, pea fakamālō maʻu pē ki he tokoni ʻoku nau faí.

“Naʻá ku ongoʻi naʻe ʻi ai ha meʻa naʻe fehālaaki ʻiate au, ko ia naʻá ku ʻalu ʻo sio ki ha toketā. Naʻe malava ke ne ʻiloʻi ʻa e meʻa naʻe hoko kiate aú. Naʻe tokoni eni ke u tali ʻa hoku tuʻunga moʻoní pea ʻiloʻi ʻa e ngaahi founga fakafaitoʻo ʻoku ala maʻu ke tokangaʻi lelei ange ai ʻeku moʻui leleí.”​—Nicole, a ʻoku puke ʻi he ʻāvanga femaleleakí.

“Kuó u ʻiloʻi ko hono lau maʻu pē ʻa e Tohi Tapú mo hoku uaifí ʻokú ne tokoniʻi au ke kamata ʻa e ʻaho taki taha ʻaki ʻa e ngaahi fakakaukau pau mo fakatupu langa hake. Pea ʻi he ngaahi ʻaho ʻoku ou faʻa fāinga aí, ʻe ʻi ai ha veesi pau ʻe maongo ki hoku lotó.”​—Peter, ʻoku puke ʻi he loto-mafasiá.

“Naʻe faingataʻa ke u talanoa ki he niʻihi kehé fekauʻaki mo ʻeku fāingá koeʻuhí naʻá ku fuʻu mā ʻaupito. Ka naʻe ʻi ai ha kaumeʻa ofi naʻá ne mātuʻaki mahinoʻi au mo kaungāongoʻi mo au. Naʻá ne tokoniʻi moʻoni au ke u ongoʻi lelei ange pea ke ongoʻi ʻoku ʻikai ke u tuēnoa.”​—Ji-yoo, ʻoku puke ʻi he mahaki uʻakai tamakí.

“Ko e Tohi Tapú kuó ne tokoniʻi au ke u hoko ʻo mafamafatatau mo fakaʻatuʻi ʻi heʻene haʻu ki he ngāué mo e mālōloó. Ko e poto ʻoku maʻu mei aí kuó ne tokoniʻi au ke fekuki mo e ngaahi palopalema fakaeongo ʻokú ne lōmekina aú.”​—Timothy, ʻokú ne fekuki mo e mahaki pupunga mo fakakounaʻí.