Ko e ʻuluaki miniti ʻe 60 ʻo e moʻui ʻa ha pēpē ʻi tuʻa mei ha manavá ko ha vahaʻa taimi mahuʻinga ʻaupito ia ʻo e liliú. Ko e hā hono ʻuhingá? Koeʻuhi ko e ngaahi faʻē ʻoku vāofi mo ʻenau fanga kiʻi pēpē toki fanauʻí ʻi he lolotonga ʻo e taimi mahuʻinga ʻaupito ko ʻení ʻe tokoni ia ki he tupu mo e fakalakalaka ʻa ʻenau fānaú. *

Ko e hā ʻokú ne ueʻi ha faʻē ke ne mātuʻaki tokanga ki heʻene kiʻi pēpē toki fanauʻí? ʻOku fakamatalaʻi ʻe Palōfesa Jeannette Crenshaw ʻi he The Journal of Perinatal Education ko ha lēvolo māʻolunga ʻo e hōmone ʻositisini “ʻokú ne langaʻi ʻa e ongo fakafaʻē ʻi he hili ʻa e fāʻelé ʻi heʻene ala, sio fakamamaʻu, mo hono fakahuhu ʻene pēpē toki fanauʻí.” ʻOku toe ʻi ai ha hōmone ʻoku tukuange atu ʻi he taimi ko ení “ʻoku tokoni ia ki he fakafeangai ʻa ha faʻē ki heʻene pēpeé” pea fakaivimālohiʻi ai ʻene fengāueʻaki mo ʻene pēpeé. Ko e hā ʻoku mahuʻinga ai iá?

Ko e vāofi ʻa e faʻeé mo e pēpeé naʻe faʻu ia ʻe hotau Tokotaha-Fakatupu ʻofá, ko Sihova ko e ʻOtuá. * Naʻe fakahīkihikiʻi ʻe Tuʻi Tēvita ʻa e ʻOtuá ʻi hono ʻomi ia “ki tuʻa mei he manavá” pea ʻai ia ke ne ongoʻi malu ʻi hono kuku ia ʻe heʻene faʻeé. Naʻá ne lotu: “Kuo tuku atu au ke ke tokangaʻi talu mei hoku fanauʻí; talu ʻeku ʻi he manava ʻo ʻeku faʻeé mo hoʻo hoko ko hoku ʻOtua.”​—Saame 22:9, 10.

FAKAKAUKAU ANGÉ: Kapau naʻe fakatupu ʻe he ʻOtuá ha tuʻunga fihi pehē ke fakapapauʻi ʻe siofi mātuʻaki tokanga ʻe ha faʻē ʻa ʻene pēpeé mo fai ha tali ki heʻene ngaahi fiemaʻú, ʻikai ʻoku ʻuhinga lelei ʻoku toe mahuʻingaʻia fakafoʻituitui ʻa e ʻOtuá ʻiate kitautolu, “ko e fānau . . . ʻa e ʻOtuá”?​—Ngāue 17:29.

Ko Sīsū Kalaisi, ʻokú ne ʻiloʻi lelei ange ʻa e Tokotaha-Fakatupú ʻi ha toe taha pē, naʻá ne akoʻi mai: “ʻIkai ʻoku fakatau atu ha ongo foʻi misi ki ha foʻi koini ʻoku siʻi hono mahuʻingá? Neongo ia ʻe ʻikai ke tō ha taha ʻo kinautolu ki he kelekelé ʻo taʻeʻafioʻi ʻe hoʻomou Tamaí. Ka naʻa mo homou ngaahi tuʻoni louʻulú kuo ʻosi lau fakalautelau ia. Ko ia ʻoua ʻe manavahē; ʻoku mou mahuʻinga ange kimoutolu ʻi ha fanga misi tokolahi.”​—Mātiu 10:29-31.

Ko e tokosiʻi pē ʻo kitautolu ʻoku tau tokanga ki he kiʻi foʻi manupuna kotoa pē ʻoku tau sio ki aí, ʻo tau tukunoaʻi pē ʻa e taimi ʻoku tō ai ha taha ʻo kinautolu ki he kelekelé. Ka ʻoku ʻafioʻi ʻe heʻetau Tamai fakahēvaní ʻa e toko taha taki taha ʻo kinautolu! Pea ko e fanga manupuná​—naʻa mo ha fanga manupuna tokolahi—​ʻoku ʻikai ʻaupito te nau mahuʻinga ange kinautolu kiate ia ʻi ha tangata. Ko ia ai, ʻoku hā mahino ʻa e lēsoní: ʻOku totonu ke “ʻoua ʻe manavahē” ʻo pehē ʻoku ʻikai ʻafioʻi mai koe ʻe he ʻOtuá. ʻI hono kehé, ʻokú ne mātuʻaki mahuʻingaʻia ʻiate koe!

 ʻOku fakapapauʻi mai ʻe he Tohi Tapú

• “Ko e fofonga ʻo Sihová ʻoku ʻi he potu kotoa pē, ʻo ne siofi fakatouʻosi ʻa e koví mo e leleí.”​—PALŌVEEPI 15:3.

• “Ko e fofonga ʻo Sihová ʻoku ʻi he kau māʻoniʻoní, pea ʻoku fanongo hono telingá ki heʻenau tangi ki ha tokoní.”​—SAAME 34:15.

• “Te u mātuʻaki fiefia ʻi hoʻo ʻofa mateakí, he kuó ke ʻafioʻi ʻa ʻeku tuʻutāmakí; ʻokú ke lāuʻilo ki heʻeku fuʻu mamahí.”​—SAAME 31:7.

ʻOku lava ke ʻi ai ha kehekehe ʻi heʻetau moʻuí kapau ʻoku tau ʻiloʻi ʻoku mahuʻingaʻia loto-moʻoni ʻa e ʻOtuá ʻi ha lelei maʻatautolu pea ʻokú ne ʻafio mai kiate kitautolu fakataha mo e tokanga ʻofa? ʻOku mātuʻaki pehē ia, hangē ko ia ʻoku fakamatala ki ai ʻa Hannah, * mei ʻIngilani:

“ʻI he taimi lahi naʻá ku ongoʻi naʻe ʻikai ʻofa ʻa Sihova ʻiate au pea naʻe ʻikai tali ʻa ʻeku ngaahi lotú. Naʻá ku fakakaukau ko e tupu ia mei he siʻi ʻa ʻeku tuí. Naʻá ku fakakaukau naʻe tautea au pe tukunoaʻi au koeʻuhi naʻe ʻikai haku mahuʻinga. Naʻá ku ongoʻi naʻe ʻikai tokanga mai ʻa e ʻOtuá ia.”

Kae kehe, ʻoku ʻikai ke kei veiveiua ʻa Hannah ki he tokanga mo e ʻofa ʻa Sihová. Ko e hā naʻá ne liliu ʻa e anga ʻo ʻene ongoʻí? “Ko ha liliu māmālie,” ko ʻene fakamatalá ia. “ʻOku ou manatuʻi ha malanga Fakatohitapu ʻi he ngaahi taʻu lahi kuo maliu atú fekauʻaki mo e feilaulau huhuʻi ʻa Sīsuú naʻá ne mātuʻaki ueʻi au, ʻo tokoniʻi au ke u ongoʻi papau fekauʻaki mo e ʻofa ʻa Sihová. Pea ʻi he taimi naʻe tali ai ʻa ʻeku ngaahi lotú, naʻá ku faʻa fakatōloʻimata, ʻi heʻeku ʻiloʻi ʻoku ʻofa moʻoni ʻa Sihova ʻiate au. Ko hono ako ʻa e Tohi Tapú mo maʻu ʻa e ngaahi fakataha faka-Kalisitiané naʻá ku ako lahi ai ʻo fekauʻaki mo Sihova, ko hono ʻulungāngá, mo e anga ʻo ʻene ongoʻi fekauʻaki mo kitautolú. ʻI he taimi ní ʻoku ou sio lelei ki he poupou ʻa Sihová mo ʻene ʻofa ʻiate kitautolu kotoa mo ʻene loto-lelei ke ne tokangaʻi kitautolu tāutaha.”

ʻOku fakalototoʻa ʻa e meʻa ʻoku leaʻaki ʻe Hannah. Ka ʻe lava fēfē ke ke fakapapauʻi ʻoku mahinoʻi mo manatuʻi ʻe he ʻOtuá hoʻo ngaahi ongoʻí? Ko e kupu hoko maí te ne sivisiviʻi ʻa e fehuʻí ni.