‘Oku ta‘efilifilimānako ‘a e ‘Otuá pea ‘okú ne loto ke tāpuaki‘i ‘a e fa‘ahinga ‘o e tangatá.

Na‘e tala‘ofa ‘e he ‘Otuá ki he palōfita ko ‘Ēpalahamé “ko e ngaahi fāmili kotoa pē ‘o e māmaní ko e mo‘oni ‘e tāpuaki‘i kinautolu fakafou ‘iate koe.”​—Sēnesi 12:3.

Ko e hā ‘oku tau ako mei aí? ‘Oku ‘ofa lahi ‘aupito ‘a e ‘Otuá ‘iate kitautolu pea loto ke tāpuaki‘i ‘a e ngaahi fāmili kotoa​—kau tangata, kau fefine mo e fānau—​‘oku nau talangofua kiate iá.

‘Oku mohu meesi ‘a e ‘Otuá peá ne tāpuaki‘i ‘a e fa‘ahinga ‘oku feinga ke ‘ilo‘i iá.

Na‘e ‘oange ‘e he Māfimafi-Aoniú ki he palōfita ko Mōsesé ‘a e mālohi ke ne fakahoko ‘a e ngaahi mana lahi. Neongo ia, na‘e lotu ‘a Mōsese: “‘Ai au ke u ‘ilo‘i ho ngaahi halá, koe‘uhí ke u ‘ilo‘i koe pea hokohoko atu ‘a ‘eku ma‘u ‘a ho‘o hōifuá.” (‘Ekisoto 33:13) Na‘e hōifua ‘a e ‘Otuá ki he kole na‘e fai ‘e Mōsesé pea tāpuaki‘i ia ke ne ‘ilo‘i mo mahino‘i lahi ange ‘Ene ngaahi foungá mo hono ‘ulungāngá. Ko e fakatātaá, na‘e ‘ilo‘i ‘e Mōsese ko e Tokotaha-Fakatupú “ko ha ‘Otua mohu meesi mo manava‘ofa.”​—‘Ekisoto 34:6, 7.

Ko e hā ‘oku tau ako mei aí? ‘Oku loto ‘a e ‘Otuá ke tāpuaki‘i kitautolu kotoa​—kau tangata, kau fefine mo e fānau—​kapau ‘oku tau feinga ke hoko ‘o ‘ilo‘i lelei ange ia. ‘Okú ne fakahaa‘i mai ‘i he Folofola Mā‘oni‘oní ‘a e founga ke lotu ai kiate iá pea ‘okú ne vēkeveke ke fakahaa‘i mai ‘ene hōifuá mo e tāpuakí.

‘Oku lava ke tau ma‘u ‘a e ngaahi tāpuaki tu‘uloa ‘a e ‘Otuá kapau te tau ako fekau‘aki mo Sīsū mo e me‘a na‘á ne faí mo ako‘í.

‘Oku ma‘u ‘i he Folofola ‘a e ‘Otuá ‘a e ngaahi fakaikiiki fekau‘aki mo e mo‘ui mo e akonaki ‘a Sīsuú. Na‘e ‘oange ‘e he ‘Otuá kia Sīsū ‘a e mālohi ke ne fakahoko ‘a e ngaahi mana fakaofo, hangē ko hono fakamo‘ui ‘a e kuí, tulí mo e heké. Na‘e a‘u ‘o ne fokotu‘u mai ‘a e kau maté. Na‘e fakahaa‘i ai ‘e Sīsū ‘a e ngaahi tāpuaki ‘e ‘omai ‘e he ‘Otuá ki he fa‘ahinga kotoa ‘o e tangatá ‘i he kaha‘ú. Na‘á ne fakamatala‘i ‘a e founga ‘e lava ke tau ma‘u ai ‘a e ngaahi tāpuaki ko iá: “Ko ‘eni ia ‘e ma‘u ai ‘a e mo‘ui ta‘engatá, ko ‘enau hoko ‘o ‘ilo‘i koe, ko e ‘Otua mo‘oni pē taha, pea mo e tokotaha ko ia na‘á ke fekau maí, ‘a Sīsū Kalaisi.”​—Sione 17:3.

Na‘e manava‘ofa, kaungāongo‘i mo anga-lelei ‘a Sīsū. Ko e kau tangata mo e kau fefine, kei si‘i mo e ta‘umotu‘a, na‘a nau ‘aukolo kiate ia koe‘uhi ko ‘ene fakaafe fakalotomāfaná: “Ako meiate au, he ‘oku ou anga-malū mo loto-fakatōkilalo, pea te mou ma‘u ha fakaivifo‘ou kiate kimoutolu.” (Mātiu 11:29) ‘I he ‘ikai hangē ko e ni‘ihi ‘i he taimi ‘o Sīsuú ‘a ia na‘a nau ngaohikovi‘i ‘a e kakai fefiné, na‘á ne fakafeangai ki he kakai fefiné ‘i he anga-lelei, fakangeingeia mo anga-faka‘apa‘apa.

Ko e hā ‘oku tau ako mei aí? Na‘e fakahaa‘i ‘e Sīsū ‘a e ‘ofa lahi ki he kakaí, peá ne fokotu‘u mai ha fa‘ifa‘itaki‘anga tu‘u-ki-mu‘a ‘i he founga ‘oku totonu ke tau fefakafeangai‘aki aí.

‘Oku ako‘i mai ‘i he Folofola Mā‘oni‘oní “ko hono mo‘oní kiate kitautolú ‘oku taha pē ‘a e ‘Otuá” pea ko Sīsū Kalaisi ‘a e talafekau anga-fakatōkilalo ‘a e ‘Otuá. (1 Kolinitō 8:6) Na‘e fakahaa‘i mahino ‘e Sīsū ko e ‘Otuá ‘okú ne mā‘olunga ange ‘iate ia pea ko e ‘Otuá na‘á ne fekau‘i mai ia ki he māmaní.​—Sione 11:41, 42; 14:28. *