‘I hono lau ‘a e talanoa ki he fakatupú ‘i he tohi Sēnesí ‘i he Tohi Tapú, ‘oku tau ‘ilo ai na‘e tala ange ‘e he ‘Otuá ki he ‘uluaki tangatá, ‘a ‘Ātama: “‘E lava ke ke kai mei he ‘akau kotoa pē ‘o e ngoué ‘a ia ‘okú ke sai‘ia aí. Ka ko e ‘akau ‘o e ‘ilo ‘o e leleí mo e koví, kuo pau ke ‘oua te ke kai mei ai, he ‘i he ‘aho te ke kai ai mei aí ko e mo‘oni te ke mate.” (Sēnesi 2:16, 17) Ko e fakamatala ko iá ‘oku fakahaa‘i mā‘ala‘ala mo mahino mei ai kapau na‘e talangofua ‘a ‘Ātama ki he fekau ‘a e ‘Otuá, na‘e ‘ikai pau ai ke ne mate ka na‘e mei hokohoko atu pē ‘ene mo‘ui ‘i he ngoue ‘o ‘Ītení.

Ko e me‘a fakamamahí, ‘i he ‘ikai fili ‘a ‘Ātama ke ne talangofua pea mo‘ui ta‘engatá na‘á ne fili ke tukunoa‘i ‘a e fekau ‘a e ‘Otuá, peá ne kai ‘a e fua‘i‘akau na‘e tapuí ‘i he taimi na‘e ‘oange ai ‘e ‘Ivi ko hono uaifí kiate iá. (Sēnesi 3:1-6) Ko e ngaahi nunu‘a ‘o e fo‘i ngāue talangata‘a ko iá ‘oku kei ‘iate kitautolu ia ‘i he ‘ahó ni. Na‘e fakamatala‘i ia ‘e he ‘apositolo ko Paulá ‘o peheni: “Ko e fou mai ‘i he tangata ‘e toko taha ‘a e hoko mai ‘a e angahalá ki he māmaní pea mo e maté fakafou ‘i he angahalá, pea ‘oku pehē ‘a e mafola ‘a e maté ki he kakai kotoa pē koe‘uhi kuo nau angahala kotoa pē.” (Loma 5:12) Ko e “tangata ‘e toko taha” ko iá, ko hono mo‘oní ko ‘Ātama. Ka ko e hā ‘a e angahalá, pea ko e hā na‘e iku ai ia ki he maté?

Ko e me‘a na‘e fai ‘e ‘Ātamá​—‘a e talangata‘a loto-lelei pe maumau‘i ‘a e lao ‘a e ‘Otuá—​ko e angahala. (1 Sione 3:4) Pea ko e tautea ki he angahalá ko e mate, hangē ko ia na‘e tala ‘e he ‘Otuá kia ‘Ātamá. Lolotonga ‘a e hoko ‘a ‘Ātama​—mo ‘ene fānau ki he kaha‘ú—​‘o talangofua ai pē ki he fekau ‘a e ‘Otuá,  na‘e ‘ikai mei ‘i ai ha‘anau angahala pea na‘e ‘ikai ‘aupito pau ke nau hokosia ‘a e maté. Na‘e ‘ikai fakatupu ‘e he ‘Otuá ‘a e tangatá ke mate ka ke mo‘ui​—pea a‘u ‘o ta‘engata.

‘Oku ‘ikai ala fakakikihi‘i ‘a e hoko ‘a e maté ‘o ‘mafola ki he kakai kotoa pē,’ hangē ko ia ‘oku fakahaa‘i ‘e he Tohi Tapú. Ka ‘oku ‘i ai hatau konga ‘e hokohoko atu ‘ene mo‘uí ‘i he hili ‘etau maté? ‘E tali ‘io nai ki ai ‘a e tokolahi, ‘o pehē ko hatau konga​—‘a e me‘a ‘oku ui ko e laumālié—​‘oku ta‘efa‘amate. Kae kehe, ‘e tatau nai eni mo e pehē na‘e loi ‘a e ‘Otuá kia ‘Ātama. Anga-fēfē? Koe‘uhí kapau ‘oku hokohoko atu ‘a e mo‘ui ‘a hotau konga ‘i ha toe feitu‘u hili ‘etau maté, tā he‘ikai leva ke hoko ‘a e maté ko e tautea ki he angahalá, ‘o hangē ko ia na‘e fakahaa‘i ‘e he ‘Otuá. ‘Oku pehē ‘e he Tohi Tapú: ‘‘Oku ‘ikai ‘aupito ke loi ‘a e ‘Otuá.’ (Hepelū 6:18) Ko hono mo‘oní, ko Sētane ia na‘e loí ‘i he‘ene tala ange kia ‘Ivi: “‘E ‘ikai mo‘oni te mo mate.”​—Sēnesi 3:4.

‘Oku langa‘i hake ai ha fehu‘i, Kapau ko e akonaki fekau‘aki mo e ta‘efa‘amate ‘a e laumālié ‘oku makatu‘unga ‘i ha loi, ko e hā leva ‘oku hoko mo‘oni ‘i he maté?

‘Oku pehē ‘e he fakamatala ‘i he Sēnesí fekau‘aki mo e fakatupú: “Na‘e hoko atu ‘a Sihova ko e ‘Otuá ‘o ne ngaohi ‘a e tangatá mei he efu ‘o e kelekelé peá ne puhi‘i ki hono ava‘i ihú ‘a e mānava mo‘uí, pea na‘e hoko ‘a e tangatá ko ha tokotaha mo‘ui.” Ko e kupu‘i lea “ko ha tokotaha mo‘ui” ‘oku liliu ia mei he fo‘i lea faka-Hepelū ko e ne’phesh, * ‘a ia ‘oku ‘uhinga fakafo‘ileá “ko ha me‘amo‘ui ‘oku mānava.”​—Sēnesi 2:7, fakamatala ‘i lalo.

Ko ia ‘oku ‘ai ‘e he Tohi Tapú ke mahino ko e tangatá ‘oku ‘ikai fakatupu kinautolu ko e fa‘ahinga tāutaha ‘oku ‘i loto ai ha laumālie ‘a ia ‘oku ta‘efa‘amate. ‘I hono kehé, ko e toko taha taki taha ko e “tokotaha mo‘ui.” Ko e ‘uhinga ia kapau te ke fai ha fekumi, he‘ikai te ke ma‘u ha konga Tohi Tapu ‘e taha ‘oku ngāue‘aki ai ‘a e kupu‘i lea ko e “laumālie ta‘efa‘amate.”

Koe‘uhi ‘oku ‘ikai ke pehē ‘e he Tohi Tapú ‘oku ma‘u ‘e he tangatá ‘a e me‘a ‘oku ui ‘e he ni‘ihi ko ha  laumālie ta‘efa‘amaté, ko e hā ‘oku ako‘i ai ‘e he ngaahi lotu lahi ‘a e me‘a ‘oku fehangahangaí? Ko e talí ‘oku ‘ave ai kitautolu ki ‘Isipite ‘o e kuonga mu‘á.

Na‘e pehē ‘e Helotōtasi, ko ha faihisitōlia Kalisi ‘i he senituli hono nima K.M., ko e kau ‘Isipité “‘a e ‘uluaki ‘i he fa‘ahinga ‘o e tangatá na‘a nau poupou‘i ‘a e tui ki he ta‘efa‘amate ‘a e laumālié.” ‘I ha anga fakafonua ‘e taha ‘i he kuonga mu‘á, ko e kau Pāpiloné, na‘a nau fakakata‘aki foki ‘a e fakakaukau fekau‘aki mo e laumālie ta‘efa‘amaté. ‘I he a‘u ki he taimi na‘e ikuna‘i ai ‘e ‘Ālekisānita ko e Lahi ‘a e Hahake Lotolotó ‘i he 332 K.M., na‘e ‘ai ‘e he kau filōsefa Kalisí ke manakoa ‘a e akonaki ko ení, pea na‘e vave ‘ene mafola ‘i he kotoa ‘o e ‘Emipaea Kalisí.

‘I he ‘uluaki senituli T.S., ko e ongo lotu mavahe faka-Siu ‘iloa ko e kau ‘Īsiní mo e kau Fālesí, na‘a nau ako‘i ‘oku hao mo‘ui atu ‘a e laumālie mei he sinó ‘i he maté. ‘Oku pehē ‘e he Jewish Encyclopedia: “Na‘e hoko mai ki he kau Siú ‘a e tui ki he ta‘efa‘amate ‘a e laumālié ‘i he‘enau fetu‘utaki mo e fakakaukau faka-Kalisí pea fou mai tautefito mei he filōsofia ‘a Palató.” ‘I he tu‘unga meimei tatau, na‘e taku ‘e he faihisitōlia Siu ko Siosifasi ‘i he ‘uluaki senitulí ‘a e akonakí ni, ‘oku ‘ikai ko e ha‘u mei he Folofola Mā‘oni‘oní, ka ko e ha‘u mei he “tui ‘a e ngaahi foha ‘o Kalisí,” ‘a ia na‘á ne vakai ki ai ko ha tātānaki ‘o e ngaahi fananga na‘e fai ‘e he‘enau kau talatupu‘á.

‘I he hokohoko atu ‘o lahi ange ‘a e tākiekina ‘a e anga fakafonua faka-Kalisí, na‘e ohi foki ‘a e akonaki fakapangani ko ení ‘e he fa‘ahinga na‘a nau taku ko e kau Kalisitiane kinautolu. Fakatatau ki he lau ‘a e faihisitōlia ko Jona Lendering, “ko e fakamahamahalo ‘a Palato ‘o pehē na‘e ‘i ha feitu‘u lelei ange ‘i he taimi ‘e taha ‘a hotau laumālié pea ‘oku mo‘ui he taimí ni ‘i ha māmani kuo hingá na‘e ‘ai ai ke faingofua hono fakataha‘i ‘a e filōsofia ‘a Palató mo e lotu faka-Kalisitiané.” Ko ia ai, na‘e hūhū ‘a e tokāteline fakapangani  ko e laumālie ta‘efa‘amaté ki he siasi “Kalisitiané” pea hoko ai ko ha konga tefito ‘o ‘ene tuí.

‘I he ‘uluaki senitulí, na‘e fakaongo atu ai ‘e he ‘apositolo ko Paulá ‘a e fakatokanga ko ení: “‘Oku lea‘aki mahino ‘e he folofola fakamānava‘í ‘o pehē ‘i he ngaahi taimi ‘amuí ‘e tō ai ‘a e ni‘ihi mei he tuí, ‘o nau tokanga ki he ngaahi fakamatala fakamānava‘i fakatupu takihala‘i mo e ngaahi akonaki ‘a e fanga tēmenioó.” (1 Tīmote 4:1) He mo‘oni ē ko e ngaahi lea ko iá! Ko e tokāteline fekau‘aki mo e laumālie ta‘efa‘amaté ko e fakatātā pē ia ‘e taha ‘o e “ngaahi akonaki ‘a e fanga tēmenioó.” ‘Oku ‘ikai ke poupou‘i ia ‘e he Tohi Tapú, pea ko ‘ene tupu mei he ngaahi lotu mo e filōsofia fakapangani motu‘á.

Ko e me‘a fakafiefia kiate kitautolú, na‘e pehē ‘e Sīsū: “Te mou ‘ilo ‘a e mo‘oní, pea ‘e fakatau‘atāina‘i kimoutolu ‘e he mo‘oní.” (Sione 8:32) ‘I hono ma‘u ha ‘ilo totonu ki he mo‘oni Fakatohitapú, ‘oku fakatau‘atāina‘i ai kitautolu mei he ngaahi akonaki mo e tō‘onga ta‘efakalāngilangi‘i ‘Otua kuo pouaki ‘e he ngaahi lotu lahi ‘o e māmaní. ‘Ikai ngata aí, ko e mo‘oni ‘i he Folofola ‘a e ‘Otuá ‘okú ne fakatau‘atāina‘i kitautolu mei he ngaahi ha‘i ‘a e ngaahi talatukufakaholo mo e tui ta‘e‘uhinga ‘oku fekau‘aki mo e maté.​—Sio ki he puha “ ‘Oku ‘i Fē ‘a e Kau Maté?”

Na‘e ‘ikai fakataumu‘a hotau Tokotaha-Fakatupú ki he tangatá ke mo‘ui pē ‘i he ta‘u ‘e 70 pe 80 ‘i he māmaní pea hiki leva ‘o nofo ta‘engata ‘i ha feitu‘u ‘e taha. Ko ‘ene mu‘aki taumu‘a ki he‘ene fakatupu fakaetangatá ke nau mo‘ui ta‘engata ‘i heni tonu ‘i he māmaní ko ‘ene fānau talangofua. Ko e taumu‘a ma‘ongo‘onga ko ení ko ha fakahāhā ia ‘o e ‘ofa ‘a e ‘Otuá ki he fa‘ahinga ‘o e tangatá, pea he‘ikai ke ta‘ofi ia ‘e ha me‘a. (Malakai 3:6) Ko e me‘a fakalototo‘á, na‘e fakahaa‘i ‘e he tokotaha-tohi-saame fakamānava‘í: “Ko e kau mā‘oni‘oní te nau ma‘u ‘a e māmaní, pea te nau nofo ai ‘o ta‘engata.”​—Saame 37:29.