Ko e hā ‘oku lahi fau ai ‘a e ngaahi paaki pe ngaahi liliu kehekehe ‘o e Tohi Tapú he ‘aho ní? ‘Okú ke vakai ki he ngaahi liliu fo‘oú ko ha tokoni pe ko ha fakafaingata‘a‘ia‘anga ia ki hono mahino‘i ‘o e Tohi Tapú? Ko e ako ke ‘ilo ki honau ngaahi tupu‘angá ‘e lava ke ne tokoni‘i koe ke ke ma‘u ha fakakaukau fakapotopoto ki ai.

Neongo ia, ko e ‘uluakí, ko hai na‘á ne fuofua hiki ‘a e Tohi Tapú, pea ‘anefē?

‘Oku vahevahe anga-maheni ‘a e Tohi Tapú ki ha konga ‘e ua. Ko e ‘uluaki kongá ‘oku tohi ‘e 39 ‘oku ‘i ai ‘a e “ngaahi fo‘i folofola toputapu ‘a e ‘Otuá.” (Loma 3:2) Na‘e fakamānava‘i ‘e he ‘Otuá ha kau tangata faitōnunga ke nau hiki ‘a e ngaahi tohí ni ‘i ha vaha‘a taimi lōloa—ko e ta‘u nai ‘e 1,100 mei he 1513 K.M ki ha taimi hili ‘a e 443 K.M. Na‘e lahi taha pē ‘enau hikí ‘i he lea faka-Hepeluú, ko ia ‘oku tau ui ai ‘a e konga ko ení ko e Ngaahi Konga Tohi Tapu Faka-Hepelū, ‘oku toe ‘iloa ko e Fuakava Motu‘á.

Ko e konga hono uá ‘oku tohi ‘e 27 ko e toe “folofola ia ‘a e ‘Otuá.” (1 Tesalonaika 2:13) Na‘e fakamānava‘i ‘e he ‘Otuá ‘a e kau ākonga faitōnunga ‘a Sīsū Kalaisí ke nau hiki ‘a e ngaahi tohí ni ‘i ha vaha‘a taimi nounou ‘aupito ange​—ko e ta‘u nai ‘e 60 mei he 41 T.S. nai ki he 98 T.S. Na‘e lahi taha pē ‘enau hikí ‘i he lea faka-Kalisí, ko ia ‘oku tau ui ai ‘a e konga ko ení ko e Ngaahi Konga Tohi Tapu Faka-Kalisi Kalisitiane, ‘oku toe ‘iloa ko e Fuakava Fo‘oú.

‘Oku fakataha‘i fakakātoa eni ko e ngaahi tohi fakamānava‘i ‘e 66 ‘oku fa‘u‘aki ‘a e Tohi Tapu kakató​—‘a e pōpoaki ‘a e ‘Otuá ki he fa‘ahinga ‘o e tangatá. Ka ko e hā na‘e toe fa‘u ai ha ngaahi liliu kehe ‘o e Tohi Tapú? Ko e ‘uhinga tefito eni ‘e tolu.

• Ke faka‘atā ‘a e kakaí ke nau lau ‘a e Tohi Tapú ‘i he‘enau leá tonu.

• Ke to‘o ‘a e ngaahi hala na‘e fai ‘e he kau hiki-tataú mo toe fakafoki mai ‘a e mu‘aki fakamatala ‘a e Tohi Tapú.

• Ke ‘ai ke fakaeonopooni ‘a e lea motu‘á.

 Fakakaukau ange ki he anga ‘o e kaunga ‘a e ngaahi mo‘oni‘i me‘á ni ki he ‘uluaki ongo liliu Tohi Tapú.

‘I he ta‘u nai ‘e 300 ki mu‘a ‘i he taimi ‘o Sīsuú na‘e kamata ai ‘a e kau mataotao Siú ke nau liliu ‘a e Ngaahi Konga Tohi Tapu Faka-Hepeluú ki ha toe lea ‘e taha​—ko e faka-Kalisí. Na‘e hoko ‘a e liliu ko ení ‘o ‘iloa ko e Sepituakini Faka-Kalisí. Ko e hā na‘e fa‘u ai iá? Ke tokoni ki he kau Siu tokolahi na‘a nau lea faka-Kalisi ‘i he taimi ko iá kae ‘ikai ko e lea faka-Hepeluú, ke nau nofo ofi ki he‘enau “ngaahi tohi mā‘oni‘oní.”​—2 Tīmote 3:15.

Na‘e toe tokoni‘i ‘e he Sepituakiní ‘a e laui miliona ‘o e fa‘ahinga ‘ikai Siu, ko e kakai lea faka-Kalisi ke nau ‘ilo‘i ‘a e me‘a ‘oku ako‘i mai ‘e he Tohi Tapú. Anga-fēfē? “Mei he vaeua‘anga ‘o e ‘uluaki senitulí,” ko e lau ia ‘a Palōfesa W. F. Howard, “na‘e hoko ai ia ko e Tohi Tapu ‘a e Siasi Kalisitiané, ‘a ia na‘e ‘alu ‘enau kau misinalé mei he sinakoke ki he sinakoke ‘ke fakamo‘oni‘i mei he ngaahi potu folofolá ko e Mīsaiá ‘a Sīsū.’” (Ngāue 17:3, 4; 20:20) Ko e ‘uhinga ia ‘e taha na‘e vave ai ‘a e “mole ‘a e mahu‘inga‘ia ‘i he Sepituakiní” ‘a e kau Siu tokolahi, fakatatau ki he mataotao Tohi Tapu ko F. F. Bruce.

‘I hono ma‘u hokohoko ‘e he kau ākonga ‘a Sīsuú ‘a e ngaahi tohi ‘o e Ngaahi Konga Tohi Tapu Faka-Kalisi Kalisitiané, na‘a nau fakataha‘i ia mo e liliu Sepituakini ‘o e Ngaahi Konga Tohi Tapu Faka-Hepeluú, pea hoko ia ko e Tohi Tapu kakato ‘oku tau ma‘u ‘i he ‘aho ní.

‘I ha ta‘u nai ‘e 300 hili ‘a e kakato ‘a e Tohi Tapú, na‘e fa‘u ‘e ha mataotao fakalotu ko Jerome ha liliu faka-Latina ‘o e Tohi Tapú, ‘a ia na‘e hoko ko e Vulikeita Faka-Latiná. Na‘e ‘osi ‘i ai ‘a e ngaahi liliu faka-Latina kehekehe ia, ko ia ko e hā na‘e toe fiema‘u ai ha liliu fo‘oú? Na‘e loto ‘a Jerome ke fakatonutonu ‘a e “ngaahi liliu hala, ngaahi fehālaaki mata‘ā‘ā mo e ngaahi tānaki mo e ngaahi to‘o mei ai na‘e ‘ikai fiema‘u,” ko e lau ia ‘a e The International Standard Bible Encyclopedia.

Na‘e fakatonutonu ‘e Jerome ‘a e konga lahi ‘o e ngaahi hala ko iá. Ka ‘i he faai mai ‘a e taimí, na‘e fai ‘e he kau ma‘u mafai ‘o e siasí ‘a e maumau lahi tahá! Na‘a nau talaki ko e Vulikeita Faka-Latiná ko e liliu Tohi Tapu pē ia kuo talí pea na‘e hokohoko pehē mai ia ‘i ha laui senituli! ‘I he ‘ikai ke ne tokoni‘i ‘a e kakai lāuvalé ke nau mahino‘i ‘a e Tohi Tapú, na‘e ‘ai ‘e he Vulikeitá  ia ‘a e Tohi Tapú ko ha tohi he‘ikai mahino‘i koe‘uhí na‘e faai mai pē ‘o ‘ikai ‘ilo ‘e he tokolahi taha ‘o e kakaí ‘a e lea faka-Latiná.

‘I he taimi tatau, na‘e hokohoko atu hono fa‘u ‘e he kakaí ha toe ngaahi liliu ‘o e Tohi Tapú—hangē ko ia na‘e ‘iloa ko e Peshitta faka-Sīliá ‘i he senituli hono nima T.S. nai. Ka ‘i he toki a‘u mai ki he senituli hono 14 na‘e fai ai ha ngaahi feinga fo‘ou ke ‘oange ‘a e Tohi Tapú ki he kakai lāuvale tokolahi ‘i he‘enau leá.

‘I ‘Ingilani ‘i he konga ki mui ‘o e senituli 14, na‘e kamata ai ‘e Sione Uikilifi ke faka‘ata‘atā mei he mafai ‘o ha lea ne mole atu ‘aki hono fa‘u ‘a e Tohi Tapú ‘i he lea faka-Pilitāniá, ko ha lea na‘e lava ke mahinongofua ki he kakai ‘i hono fonuá. ‘I he hili pē iá, na‘e fakaava ‘e he ngaahi founga pulusi tohi ‘a Johannes Gutenberg ‘a e matapā ki he kau mataotao Tohi Tapú ke nau fa‘u mo tufaki ‘a e ngaahi liliu fo‘ou ‘o e Tohi Tapú ‘i he ngaahi lea ‘oku lolotonga ngāue‘aki mo kehekehe ‘i he kotoa ‘o ‘Iulopé.

‘I he lahi ange ‘a e ngaahi liliu faka-Pilitāniá, na‘e fehu‘ia ‘e he kau fakaangá ‘a e fiema‘u ke fa‘u ha ngaahi liliu kehekehe ‘i he lea tatau pē. Ko e faifekau Pilitānia ‘i he senituli 18 ko John Lewis na‘á ne tohi: “‘Oku tupu ‘a e leá ‘o motu‘a mo mahinongata‘a, ko ia ai ‘oku fiema‘u ke toe vakai‘i ‘a e Ngaahi Liliu motu‘á ke fakalea ‘i he Lea ‘oku ngāue‘akí, pea ke mahino‘i ‘e he to‘utangata ‘oku lolotonga mo‘uí.”

‘I he ‘ahó ni, ‘oku ‘i ha tu‘unga lelei ange ‘a e kau mataotao Tohi Tapú ke nau toe vakai‘i ‘a e ngaahi liliu motu‘a angé. ‘Oku nau ma‘u ha mahino mā‘ala‘ala ange fekau‘aki mo e ngaahi lea motu‘a ‘o e Tohi Tapú, pea ‘oku nau ma‘u ha ngaahi tatau tohinima motu‘a mo mahu‘inga ‘o e Tohi Tapú ‘a ia na‘e toki ma‘u ki muí ni mai. ‘Oku tokoni eni ke fakapapau‘i ‘oku tonu ange ‘a e mu‘aki potutohi ‘o e Tohi Tapú.

Ko ia ‘oku mahu‘inga mo‘oni ‘a e ngaahi liliu fo‘ou ‘o e Tohi Tapú. Ko hono mo‘oní, ‘oku fiema‘u ‘a e tokanga fekau‘aki mo e ni‘ihi ‘o kinautolu. Ka ‘o kapau kuo ue‘i ‘a e kau fakalelei Tohi Tapú ‘e ha ‘ofa mo‘oni ki he ‘Otuá ‘i hono ‘ai ha liliu fo‘ou ‘o e Tohi Tapú, ta ‘oku ‘aonga lahi ‘enau ngāué kiate kitautolu.