ʻOkú Ke Maheni mo Sāfani mo Hono Fāmilí?

ʻI HOʻO lau hoʻo Tohitapú, kuó ke fakatokangaʻi ai ha ngaahi lave kia Sāfani mo e ngaahi mēmipa ʻe niʻihi ʻo hono fāmili maʻu mafai lahí? Ko hai kinautolu? Ko e hā naʻa nau faí? Ko e hā ʻa e ngaahi lēsoni ʻe lava ke tau ako meiate kinautolú?

ʻOku fakahaaʻi mai ʻe he Tohitapú kia kitautolu ʻa “Safani foha ʻo Asialaia, foha ʻo Mesuilame” ʻi he fekauʻaki mo hono toe fakafoki ʻe Siosaia ʻa e lotu moʻoní ʻi he 642 K.M. nai. (2 Tuʻi 22:3) Lolotonga ʻa e taʻu ʻe 36 naʻe hoko atu aí, ʻo aʻu ki hono fakaʻauha ʻa Selusalema ʻi he 607 K.M., ʻoku fakahaaʻi mai ai kia kitautolu ʻa hono foha ʻe toko fā, ko ʻAhikami, ʻĒlasa, Kemalaia, mo Siasanaia, pea ki hono ongo mokopuna, ko Maikaia mo Ketalaia. (Sio ki he sātí.) “Ko e fāmili ʻo Sāfaní naʻa nau puleʻi ʻa e kau ʻōfisa fakapuleʻanga [ʻi he puleʻanga ʻo Siutá] pea maʻu ʻa e tuʻunga ko e sikalaipe ʻa e tuʻí mei he taimi ʻo Siosaiá ʻo aʻu ki he Fakahēʻí,” ko e fakamatala ia ʻa e Encyclopaedia Judaica. Ko hano toe vakaiʻi ʻa e meʻa ʻoku leaʻaki ʻe he Tohitapú fekauʻaki mo Sāfani mo hono fāmilí te ne tokoniʻi kitautolu ke houngaʻia ʻi he founga ʻo ʻenau poupouʻi ʻa e palōfita ko Selemaiá pea mo e lotu moʻoni ʻa Sihová.

Poupouʻi ʻe Sāfani ʻa e Lotu Moʻoní

ʻI he 642 K.M., ʻi he taʻu 25 nai ʻa Tuʻi Siosaiá, ʻoku tau ʻiloʻi ai ʻa Sāfani ʻi heʻene ngāue ko e sekelitali mo e sikalaipe ʻa e tuʻí. (Selemaia 36:10) Ko e hā naʻe kau ki he meʻa ko iá? Ko e tohi maʻuʻanga fakamatala naʻe lave ki ai ʻi ʻolungá ʻoku fakamatalaʻi ai ko ha sikalaipe mo e sekelitali fakatuʻí ko ha tokotaha faleʻi ofi ia ki he tuʻí, ʻi hono tokangaʻi ʻo e ngaahi meʻa fakapaʻangá, pōtoʻi ʻi he alea fakavahaʻapuleʻangá, pea ʻilo ki he ngaahi vā mo mulí, lao fakavahaʻapuleʻangá, mo e ngaahi alea fakapisinisí. Ko ia ai, ʻi he tuʻunga ko ha sekelitali fakatuʻí, naʻe hoko ai ʻa Sāfani ko e taha ʻo e kau tangata maʻu mafai lahi taha ʻi he puleʻangá.

ʻI he taʻu ʻe hongofulu ki muʻá, ko e talavou ko Siosaiá naʻá ne “kamata kumi ki he Otua o Tevita ko ene tamai.” ʻOku hā mahino naʻe taʻumotuʻa lahi ange ʻa Sāfani ʻia Siosaia pea ko ia naʻe lava ai ke ne hoko ko ha tokotaha faleʻi fakalaumālie lelei kiate ia, pea ko ha tokotaha poupou ia ʻo e ʻuluaki feingangāue ʻa Siosaia ki hono toe fakafoki mai ʻa e lotu moʻoní. a—2 Kalonikali 34:​1-8, PM.

Lolotonga ʻa e ngāue monomono ʻo e temipalé, naʻe ʻiloʻi ai ʻa e “Puka ʻo e Lao,” pea naʻe hanga ʻe Sāfani ʻo “lau ia ʻi he ʻao ʻo e tuʻi.” Naʻe ʻohovale ʻa Siosaia ʻi he fanongo ki he meʻa naʻe ʻi loto aí peá ne fekauʻi ha kau fakafofonga ko e kau tangata falalaʻanga kia Hūlita ko e palōfita fefiné koeʻuhi ke ne huhū kia Sihova fekauʻaki mo e tohí. Naʻe fakahaaʻi ʻe he tuʻí ʻa e falala pau kia Sāfani mo hono foha ko ʻAhikamí ʻaki hono fakakau kinaua ʻi he kau fakafofongá.—2 Tuʻi 22:​8-14; 2 Kalonikali 34:​14-​22.

Ko e lave pē eni ʻe taha ʻi he ngaahi konga Tohitapú ki he meʻa naʻe fai tonu ʻe Sāfaní. ʻI he ngaahi veesi Tohitapu kehé, ʻoku lave pē ai ki ai ko ha tamai pe ko ha kui-tangata. Ko e fānau ʻa Sāfaní naʻa nau hoko ʻo fetuʻutaki vāofi mo e palōfita ko Selemaiá.

ʻAhikami mo Ketalaia

Hangē ko ia kuo tau ʻosi ʻiloʻí, ko e foha ʻo Sāfani ko ʻAhikamí ʻoku ʻuluaki lave ki ai ʻi he  fekauʻaki mo e kau fakafofonga naʻe fekauʻi ki he palōfita fefine ko Hūlitá. ʻOku pehē ʻe ha tohi maʻuʻanga fakamatala: “Neongo ko e lakanga ʻo ʻAhikamí ʻoku ʻikai ʻomai ia ʻi he Tohitapu Hepeluú, ʻoku hā mahino naʻá ne ʻi ha tuʻunga māʻolunga.”

ʻI ha taʻu nai ʻe 15 hili ʻa e meʻa ko iá, naʻe ʻi he tuʻunga fakatuʻutāmaki ʻa e moʻui ʻa Selemaiá. ʻI heʻene fakatokanga ki he kakaí fekauʻaki mo e taumuʻa ʻa Sihova ke fakaʻauha ʻa Selusalemá, “naʻe puke ia ʻe he kau taulaʻeiki mo e kau palofita mo e kakai kotoa, ʻo nau pehe, Kuo pau te ke mate.” Ko e hā leva naʻe iku ki aí? ʻOku hoko atu ʻa e fakamatalá: “Naʻe kau mo Selemaia ʻa Ahikami foha ʻo Safani, ke ʻoua te nau tuku ia ki he nima ʻo e kakai ke tamateʻi.” (Selemaia 26:​1-24) Ko e hā ʻoku fakahaaʻi ʻe he meʻá ni? ʻOku pehē ʻe he The Anchor Bible Dictionary: “Ko e meʻa ko eni naʻe hokó ʻoku ʻikai ngata pē ʻi heʻene fakapapauʻi ʻa e tākiekina naʻe fai ʻe ʻAhikamí, ka ʻoku toe fakahaaʻi ai ko iá, hangē ko e ngaahi mēmipa kehe ʻo e fāmili ʻo Sāfaní, naʻá ne hehema anga-ʻofa kia Selemaia.”

ʻI he taʻu nai ʻe 20 ki mui ai, hili hono fakaʻauha ʻe he kau Pāpiloné ʻa Selusalema ʻi he 607 K.M. pea ʻave ʻo fakaheeʻi ʻa e tokolahi taha ʻo e kakaí, ko e mokopuna ʻo Sāfani ko Ketalaiá, foha ʻo ʻAhikamí, naʻe fakanofo ia ko e kōvana ki he toenga ʻo e kau Siú. Naʻá ne tokanga kia Selemaia, ʻo hangē ko e ngaahi mēmipa kehe ʻi he fāmili ʻo Sāfaní? ʻOku lau ʻi he lēkooti ʻa e Tohitapú: “Pea ʻalu ʻa Selemaia kia Ketalaia foha ʻo Ahikami ki Misipa, pea naʻa ne nofo mo ia.” ʻI ha ngaahi māhina siʻi, naʻe tāmateʻi ʻa Ketalaia, pea naʻe ʻave ʻe he toenga ʻo e kau Siú ʻa Selemaia ʻi heʻenau hiki ki ʻIsipité.—Selemaia 40:​5-7; 41:​1, 2; 43:​4-7.

Kemalaia mo Maikaia

Ko e foha ʻo Sāfani ko Kemalaia mo hono mokopuna ko Maikaiá naʻá na fakahoko ha konga tuʻu-ki-muʻa ʻi he ngaahi meʻa naʻe fakamatalaʻi ʻi he Selemaia vahe 36. Ko e taimí ko e 624 K.M. nai, ʻi he taʻu hono nima ʻo Tuʻi Sihoiakimí. Ko Paluki, ʻa e sekelitali ʻa Selemaiá, naʻá ne lau leʻo-lahi mei he tohí ʻa e ngaahi lea ʻa Selemaia ʻi he fale ʻo Sihová, “ʻi he loki [kai] ʻo Kemalaia foha ʻo Safani.” Fakatatau ki ai, naʻe “fanongo ʻe Maikaia foha ʻo Kemalaia, foha ʻo Safani, ki he ngaahi folofola ʻa Sihova naʻe lau mei he tohi.”—Selemaia 36:​9-11.

Naʻe fakamatala ʻa Maikaia ki heʻene tamaí mo e kau pilinisi kehé kotoa fekauʻaki mo e takainga tohí, pea naʻa nau loto kotoa ke fanongo ki he meʻa naʻe leaʻaki aí. Naʻe fēfē ʻenau talí? “Pea ʻi he faifai pea kuo nau fanongo ʻi he ngaahi folofola kehekehe, naʻa nau fehangaʻaki ilifia, pea nau pehe kia Paluki, Kuo pau ke mau fakapa ki he tuʻi ʻa e ngaahi fuʻu folofola ko ia.” Kae kehe, ki muʻa ke fakatau folofola ki he tuʻí, naʻa nau faleʻi ʻa Paluki: “ʻAlu, ʻo toi, ʻa koe mo Selemaia, pea ke ʻoua naʻa ʻilo ʻe ha taha pe ʻoku mo ʻi fe.”—Selemaia 36:​12-19.

Hangē ko ia ne ʻamanekiná, naʻe siʻaki ʻe he tuʻí  ʻa e pōpoaki ʻi he takainga tohí pea tutu fakakongokonga ia. Ko e kau pilinisi ʻe niʻihi, kau ai ʻa e foha ʻo Sāfani ko Kemalaiá, naʻa nau “kole . . . ki he tuʻi ke oua naa tutu ae tohi takai: ka nae ikai te ne fie fanogo kiate kinautolu.” (Selemaia 36:​21-25, PM) Ko e tohi Jeremiah​—An Archaeological Companion ʻoku fakaʻosiʻaki ai: “Ko Kemalaiá ko ha tokotaha poupou mālohi ia ʻo Selemaia ʻi he lotoʻā ʻo Tuʻi Sihoiakimí.”

ʻĒlasa mo Siasanaia

ʻI he 617 K.M., naʻe puleʻi ai ʻe Pāpilone ʻa e puleʻanga ʻo Siutá. Ko e laui afe ʻo e kau Siú, “houʻeiki katoa, mo e kau toʻa fuape; . . . kaeʻumaʻa ʻa e kau tufunga, mo e kau tuki ukamea,” naʻe ʻave ʻo fakaheeʻi, ʻo kau ai ʻa e palōfita ko ʻIsikelí. Ko Mātanaia, ʻa ia naʻe liliu hono hingoá ʻe he kau Pāpiloné ki he Setekaiá, naʻá ne hoko ko e tuʻi fakaongoongo foʻoú. (2 Tuʻi 24:​12-17) Ki mui ai, naʻe fekauʻi ʻe Setekaia ha kau fakafofonga naʻe kau ai ʻa e foha ʻo Sāfani ko ʻĒlasá ki Pāpilone. Naʻe ʻoange ʻe Selemaia kia ʻĒlasa ha tohi naʻe ʻi ai ha pōpoaki mahuʻinga meia Sihova ki he kau Siu naʻe fakahēʻí.​—Selemaia 29:​1-3.

ʻOku fakahaaʻi ai ʻe he lēkooti ʻo e Tohitapú ko Sāfaní, toko tolu ʻi hono ngaahi fohá, mo e toko ua ʻi hono fanga makapuná naʻa nau ngāueʻaki honau ngaahi tuʻunga mafai lahí ke poupouʻi ʻa e lotu moʻoní pea mo e palōfita loto-tōnunga ko Selemaiá. Fēfē ʻa e foha ʻo Sāfani ko Siasanaiá? ʻI he ʻikai hangē ko e ngaahi mēmipa kehe ʻo e fāmili ʻo Sāfaní, ʻoku hā mahino naʻá ne kau ʻi he lotu ʻaitolí. ʻI he taʻu hono ono ʻo e fakaheeʻi ʻo ʻIsikeli ki Pāpiloné, pe ʻi he 612 K.M. nai, naʻe maʻu ai ʻe he palōfitá ha vīsone ʻa ia naʻe tutu ʻinisēnisi ai ʻa e kau tangata ʻe toko 70 ki he ngaahi ʻaitoli ʻi he temipale ʻi Selusalemá. Naʻe ʻi honau lotolotongá ʻa Siasanaia, ko e toko taha pē ia naʻe lave ki hono hingoá. ʻOku fakahuʻunga nai heni ko ha mēmipa tuʻu-ki-muʻa ia ʻo e kulupú ni. (Isikeli 8:​1, 9-​12) Ko e fakatātā kia Siasanaiá ʻoku fakahāhaaʻi ai ko hono tauhi hake ʻi ha fāmili fakaʻotuá ʻoku ʻikai fakapapauʻi ai ʻa ʻete hoko ko ha tokotaha lotu loto-tōnunga kia Sihová. Ko e tokotaha taki taha ʻoku fakafatongiaʻi ia ki he ʻalunga tonu ʻo ʻene ngāué.​—2 Kolinito 5:​10.

Hisitōlia ʻo Sāfani mo Hono Fāmilí

ʻI he taimi naʻe fakahoko ai ʻe Sāfani mo hono fāmilí ha tafaʻaki ʻi he ngaahi meʻa naʻe hoko ʻi Selusalemá, naʻe anga-maheni ʻaki ai ʻi Siuta ʻa hono ngāueʻaki ʻo e silá. Naʻe ngāueʻaki ʻa e silá ke fakamoʻoni pe fakaʻilongaʻi ʻaki ha tohi fakamoʻoni pea naʻe ngaohiʻaki ia ʻa e ngaahi maka mahuʻinga, mētale, lei, pe sioʻata. Naʻe faʻa tongi ʻi he silá ʻa e hingoa ʻo e tokotaha ʻoku ʻoʻoná, ko e hingoa ʻo ʻene tamaí, pea ʻi he taimi ʻe niʻihi ko e lakanga ʻo e tokotaha ʻoku ʻaʻaná.

 Kuo maʻu ʻa e ngaahi fakaʻilonga ʻo e sila Hepelū ʻe laui teau ʻi he ʻumeá. Ko Palōfesa Nahman Avigad, ko e mataotao ʻi he ʻepikalafi Hepeluú, ʻa e ako ki he meʻa motuʻa kuo tongi fakamataʻitohí, naʻá ne pehē: “Ko e ngaahi sila tongi fakamataʻitohí ʻa e matavai fakaʻepikalafi Hepelū pē ʻe taha ʻoku lave ki he faʻahinga ʻoku ʻiloa ʻi he Tohitapú.” Kuo maʻu ha taha ʻo ha ngaahi tongi fakamataʻitohi ʻo Sāfani pe ko e ngaahi mēmipa ʻi hono fāmilí? ʻIo, ko e ongo hingoa Sāfani mo hono foha ko Kemalaiá ʻoku hā ia ʻi he sila ʻoku fakahaaʻi ʻi he peesi 19 mo e 21.

ʻOku toe pehē ʻe he kau mataotaó ngalingali ʻoku lave ki he ngaahi mēmipa kehe ʻe fā ʻo e fāmilí ʻi he ngaahi fakaʻilonga silá—ko ʻAsialaia, ko e tamai ʻa Sāfaní; ʻAhikami ko e foha ʻo Sāfaní; Kemalaia ko e foha ʻo Sāfaní; mo Ketalaia, ʻa ia ʻoku ngalingali naʻe lave ki ai ʻi he fakaʻilonga silá ko e “pule ki he Falé.” Ko hono fā ʻo e ngaahi silá ni ʻoku vakai ki ai ko e meʻa ia ʻa Ketalaia, ko e mokopuna ʻo Sāfaní, neongo ʻoku ʻikai lave ai ki heʻene tamaí, ʻa ʻAhikami. Ko hono lakanga ʻi he fakaʻilonga silá ʻoku fakahaaʻi ai ko e taha ia ʻo e kau ʻōfisa māʻolunga taha ʻi he vahefonuá.

Ko e Hā ʻe Lava Ke Tau Akó?

Ko ha faʻifaʻitakiʻanga lelei moʻoni ē naʻe fokotuʻu ʻe Sāfani mo hono fāmilí ʻi hono ngāueʻaki honau tuʻunga mafai lahí ʻi hono poupouʻi fakatouʻosi ʻa e lotu moʻoní pea mo e tokotaha loto-tōnunga ko Selemaiá! Ko kitautolu foki ʻe lava ke tau ngāueʻaki ʻetau koloá mo e mafaí ke poupouʻi ʻaki ʻa e kautaha ʻa Sihová mo hotau ngaahi kaungālotú.

ʻOku fakakoloa mo fakatupu tui kia kitautolu ʻo ʻikai ngata pē ʻi hono lau tuʻumaʻu ʻa e Tohitapú kae pehē foki ke sivisiviʻi fakaʻāuliliki ia mo ʻai ke tau maheni mo e kau fakamoʻoni ʻa Sihova ʻi he kuonga muʻá hangē ko Sāfani mo e ngaahi mēmipa ʻo hono fāmilí. Ko kinautolu foki ʻoku nau kau ki he “ʻao kau fakamoʻoni” tokolahi ʻa ia ʻe lava ke tau faʻifaʻitaki ki heʻenau ngaahi faʻifaʻitakiʻangá.—Hepelu 12:1.

[Fakamatala ʻi lalo]

[Puha ʻi he peesi 21]

Hūlita​—Ko ha Palōfita Fefine Maʻu Mafai

ʻI he fanongo ki hono lau ʻo e “Puka ʻo e Lao” naʻe maʻu ʻi he temipalé, naʻe tuʻutuʻuni ʻe Tuʻi Siosaia kia Sāfani mo e kau ʻōfisa tuʻunga māʻolunga kehe ʻe toko fā ke nau “huhū kia Sihova” fekauʻaki mo e tohí. (2 Tuʻi 22:​8-20) ʻE lava ke maʻu mei fē ʻe he kau fakafofongá ʻa e talí? Ko Selemaia, mo Nēhumi nai pea mo Sēfanaia, ko e kau palōfita kotoa mo e kau hiki Tohitapu, naʻa nau nofo ʻi Siuta he taimi ko iá. Kae kehe, naʻe fakaofiofi ʻa e kau fakafofongá kia Hūlita ko e palōfita fefiné.

Ko e tohi Jerusalem​—An Archaeological Biography ʻoku fakamatala ai: “Ko e meʻa mahuʻinga fekauʻaki mo e meʻa ko eni naʻe hokó ko e tafaʻaki tangata-fefine ʻo e talanoá naʻe ʻikai fakatokangaʻi fakaʻaufuli ia. Naʻe ʻikai fakakaukau ki ai ha taha naʻe ʻi ha tuʻunga taʻefeʻunga ke ʻave ʻe ha kōmiti kakai tangata kotoa ʻa e Takainga Tohi ʻo e Laó ki ha fefine ke ne fakapapauʻi ʻa hono tuʻungá. ʻI heʻene fakahā ia ko e folofola ʻa e ʻEikí, naʻe ʻikai fehuʻia ʻe ha taha ʻa hono mafaí ke fakapapauʻi ʻa e ʻīsiú. Ko e konga ko ení ʻoku faʻa sio fakalaka ai ʻa e kau mataotao naʻa nau fakapapauʻi ʻa e ngafa ʻo e kakai fefiné ʻi ʻIsileli ʻo e kuonga muʻá.” Ko e moʻoni, ko e pōpoaki naʻe maʻú naʻe meia Sihova.

[Taiakalami/Fakatātā ʻi he peesi 21]

(Ki ha konga tohi ʻosi fokotuʻú, sio ki he tohí)

Ko e Vaʻavaʻa Fakafāmili ʻo Sāfaní

Mēsuilame

↓

ʻAsialaia

↓

Sāfani

↓ ↓ ↓ ↓

ʻAhikami ʻĒlasa Kemalaia Siasanaia

↓ ↓

Ketalaia Maikaia

[Fakatātā ʻi he peesi 20]

Naʻe kōlenga ʻa Kemalaia mo e niʻihi kehé kia Sihoiakimi ke ʻoua te ne tutu ʻa e takainga tohi meia Selemaiá

[Fakatātā ʻi he peesi 22]

Ko Siasanaia, neongo ko ha mēmipa ia ʻo e fāmili ʻo Sāfaní, naʻe hā ʻi ha vīsone naʻá ne lotu ki he ngaahi ʻaitolí

[Maʻuʻanga ʻo e Tā ʻi he peesi 19]

Courtesy Israel Antiquities Authority

[Maʻuʻanga ʻo e Tā ʻi he peesi 21]

Courtesy Israel Antiquities Authority