ʻOkú Ke Manatuʻi?

Kuó ke fiefia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

• ʻE lava fēfē ke fakamoʻoniʻi ko e “malava fakaefakakaukaú” ko ha maluʻi? (Palovepi 1:​4, NW)

ʻE lava ke ne fakatokanga kitautolu ki he ngaahi fakatuʻutāmaki fakalaumālié pea ueʻi kitautolu ke palani ha ʻalunga fakapotopoto, hangē ko e fakaʻehiʻehi mei he ngaahi fakatauele fakaefehokotaki fakasino ʻi he ngāueʻangá. ʻOkú ne tokoniʻi kitautolu ke ʻiloʻi ʻoku taʻehaohaoa ʻa e kaungā Kalisitiané, ʻa ia ʻe lava ke ne ueʻi ai kitautolu ke fakaʻehiʻehi mei he ngaahi tali vave ʻi he taimi ʻoku fakaʻitaʻi ai kitautolú. ʻE toe lava ke ne ʻai ke tau malava ʻo fakaʻehiʻehi mei he ngaahi tenge ke tuli ki he meʻa fakamatelié ʻa ia te ne fakatupunga nai ke tau hē fakalaumālié .​—8/15, peesi 21-4.

• ʻE lava fēfē ke hoko ha taha ko ha ʻaonga ʻi he tuʻunga ko ha kaungāʻapí?

Ko e founga ʻe ua ke hoko ai ko ha kaungāʻapi leleí ko e hoko ko ha tokotaha-foaki loto-lelei mo e hoko ko ha tokotaha-tali loto-houngaʻia. ʻOku mahuʻinga ke hoko ko ha kaungāʻapi lelei ʻi he taimi ʻoku hoko ai ʻa e faingataʻá. ʻOku feinga ʻa e Kau Fakamoʻoni ʻa Sihová ke hoko ko e ngaahi kaungāʻapi lelei ʻaki ʻa e fakatokanga ki he niʻihi kehé ʻo fekauʻaki mo e meʻa ʻe vavé ni ke hokó, ko e ngāue ʻa e ʻOtuá ke fakangata ʻa e fulikivanú.​—9/1, peesi 4-7.

• Fakatatau ki he Tohitapú, ko hai ʻa e kau sangato moʻoní, pea ʻe anga-fēfē ʻenau tokoniʻi ʻa e faʻahinga ʻo e tangatá?

Ko e muʻaki kau Kalisitiané kotoa ko e kau sangato moʻoni, pe faʻahinga māʻoniʻoni, naʻe ʻai ke nau pehē ʻe he ʻOtuá, ʻo ʻikai ʻe ha kau tangata pe ngaahi kautaha. (Loma 1:7) ʻI he toetuʻu pē ki he moʻui fakahēvaní, ʻe kau fakataha ai ʻa e faʻahinga māʻoniʻoní mo Kalaisi ʻi hono tāpuakiʻi ʻa e faʻahinga loto-tōnunga ʻi he māmaní. (Efeso 1:​18-​21)​—9/15, peesi 5-7.

• Ko hono ʻiloʻi ha meʻa fekauʻaki mo e ʻatelita ʻi Kalisi ʻo e kuonga muʻá ko e hā nai hono mahuʻinga ki he kau Kalisitiané?

Ko e ngaahi tohi ʻa e ongo ʻapositolo ko Pita mo Paulá ʻoku ʻi ai ʻa e ngaahi talanoa fakatātā naʻe makatuʻunga ia pe fakahuʻunga ki he ngaahi vaʻinga ʻi he kuonga muʻá. (1 Kolinito 9:​26; 1 Timote 4:7; 2 Timote 2:5; 1 Pita 5:​10) Ki ha tokotaha ʻatelita ʻi he kuonga muʻá, naʻe mahuʻinga ke ʻi ai ha tokotaha faiako lelei, ke ngāueʻaki ʻa e mapuleʻi-kitá pea ke fakataumuʻa lelei ʻene ngaahi feingá. ʻOku pehē ʻene moʻoni fekauʻaki mo e ngaahi feinga fakalaumālie ʻa e kau Kalisitiane he ʻaho ní.​—10/1, peesi 28-​31.

• Ko e hā ʻa e ngaahi pole mo e ngaahi pale ʻo hono tauhi hake ʻa e fānaú ʻi ha fonua mulí?

ʻOku ako ʻe he fānau tokolahi ha lea foʻou ʻo vave ange ia ʻi heʻenau ngaahi mātuʻá, ʻa ia te nau ʻiloʻi nai ʻoku faingataʻa ke mahinoʻi ʻa e fakakaukau mo e ngaahi tōʻonga ʻenau fānaú. Pea ʻe ʻikai nai ke mahinoʻi ngofua ʻe he fānaú ʻa e ngaahi akonaki faka-Tohitapu ʻi he lea ʻenau ngaahi mātuʻá. Neongo ia, ko e ngaahi haʻi fakafāmilí ʻe lava ke ʻai ia ke mālohi ʻi hono akoʻi ʻe he ngaahi mātuʻá ʻenau leá ki heʻenau fānaú, ʻa ia ʻoku nau ʻiloʻi nai ha lea ʻe ua pea ongoʻi maheni mo e anga fakafonua ʻe uá.​—10/15, peesi 22-6.

• Ko e hā ʻoku mahuʻinga ai ʻa e ako ke kole fakamolemolé?

Ko ha kole fakamolemole loto-moʻoni ko ha founga ia ʻokú ne faʻa fakaleleiʻi ha vahaʻangatae kuo maumau. ʻOku ʻomai ʻe he Tohitapú ʻa e ngaahi fakatātā ʻo e mālohi ʻe lava ke maʻu ʻe ha kole fakamolemole. (1 Samiuela 25:​2-​35; Ngāue 23:​1-5) ʻOku faʻa hoko, ʻi he taimi ʻoku faʻa taʻefelotoi ai ha ongo meʻa ʻe toko ua, ʻoku ʻi ai ha tukuakiʻi ki he ongo faʻahí fakatouʻosi. Ko ia ai, ko ha fakatou fefakavaivaiʻaki mo e kole fakamolemolé ʻoku fiemaʻu ia.​—11/1, peesi 4-7.

• Ko e hā ʻoku kovi ai ʻa e pelepaʻangá, naʻa mo e ʻi ha kiʻi paʻanga siʻisiʻí?

ʻOku lava ke fakaʻaiʻai ʻe he pelepaʻangá ʻa e siokita, ko ha laumālie feʻauʻauhi, mo e mānumanu, ʻa ia ʻoku fakahalaiaʻi ʻe he Tohitapú. (1 Kolinito 6:​9, 10) Ko e tokolahi ʻoku maʻunimā ʻe he pelepaʻangá naʻa nau kamata ʻi he taʻu siʻí ʻaki hono fai ha fanga kiʻi peti iiki.​—11/1, peesi 31.

• Koeʻuhi ko e ngaahi tohi lahi ʻo e Tohitapú naʻe hiki ia ʻi he lea faka-Kalisí, ko e hā naʻe ʻi ai ai ha fiemaʻu ke liliu ʻa e Tohitapú ki he faka-Kalisí, pea ko e hā hono ngaahi olá?

Ko e lea faka-Kalisi fakaeonopōní ʻoku mātuʻaki kehe ia mei he lea faka-Kalisi ʻo e liliu Sepituakini ʻo e Ngaahi Konga Tohitapu Faka-Hepeluú pea mei he Ngaahi Konga Tohitapu Faka-Kalisi Kalisitiané. ʻI he ngaahi senituli ki mui ní naʻe ʻi ai ʻa e ngaahi feinga lahi ke liliu ʻa e niʻihi pe ko e kotoa ʻo e Tohitapú ki he lea faka-Kalisi naʻe leaʻakí. ʻI he ʻahó ni, ʻoku ʻi ai nai ʻa e liliu ʻe 30 ʻo e Tohitapú, kakato pe ʻi ha konga, ʻa ia ʻoku lava ke lau ʻe he kau Kalisi lāuvalé, ko ha liliu tuʻu-ki-muʻa ʻe taha ko e New World Translation of the Holy Scriptures, pulusi ʻi he 1997.​—11/15, peesi 26-9.

• Ko e hā ʻoku ʻikai fiemaʻu ai ki he kau Kalisitiané ʻa e vahe hongofulú?

ʻI he malumalu ʻo e Lao naʻe foaki ki ʻIsileli ʻo e kuonga muʻá, ko e vahe hongofulú ko ha founga ia ʻo hono tauhi ʻa e matakali Līvaí mo hono tokangaʻi ʻo e faʻahinga masivá. (Livitiko 27:30; Teutalonome 14:​28, 29) Ko e pekia fakaefeilaulau ʻa Sīsuú naʻá ne tāmateʻi ʻa e Laó mo ʻene fiemaʻu ʻo e vahe hongofulú. (Efeso 2:​13-​15) ʻI he muʻaki fakatahaʻangá, ko e sīpingá ia ki he Kalisitiane taki taha ke ne foaki ʻo fakatatau ki heʻene ngaahi koloá mo e meʻa kuó ne fakapapauʻi ʻi hono lotó. (2 Kolinito 9:​5, 7)​—12/1, peesi 4-6.

• ʻOku ʻuhinga ʻa e Fakahā 20:8 ʻi he ʻahiʻahi fakaʻosí, ʻe kākaaʻi ai ʻe Sētane ha fuʻu kakai tokolahi kāfakafa?

ʻOku pehē ʻe he konga tohí ko e faʻahinga ʻe kākāʻí te nau “hange ko e ʻoneʻone ʻo e tahi.” ʻI he Tohitapú, ko e kupuʻi lea ko iá ʻoku faʻa ʻuhinga ia ko ha fika taʻeʻiloa, ʻo ʻikai fakahuʻunga ia ʻoku lahi fakaʻulia. Ko e hako ʻo ʻĒpalahamé, ʻa ia ʻe hoko ʻo hangē “ko e ʻoneʻone ʻi he matātahi,” ʻoku fakamoʻoniʻi ko e faʻahinga ʻe toko 144,000, tuku kehe ʻa Sīsū Kalaisi. (Senesi 22:17; Fakahā 14:​1-4)​—12/1, peesi 29.