Naʻá Ke ʻIloʻi?

Ko e hā ʻa e lea naʻe lea ai ʻa Sīsuú?

ʻOku ʻikai loto-taha ʻa e kau mataotaó ki he lea naʻe lea ai ʻa Sīsuú. Kae kehe, ʻi heʻene hoko ko ha tangata ʻi he māmaní, ʻoku hā ngali naʻe ngāueʻaki ʻe Sīsū ha faʻahinga lea faka-Hepelū mo ha lea fakafeituʻu faka-Alamea. ʻI he taimi naʻe haʻu ai ʻa Sīsū ki Nasaleti ʻi Kāleli ʻo hū ki he sinakoke ʻi aí, naʻá ne lautohi ai mei he kikite ʻa ʻAiseá, ʻoku hā mahino naʻe hiki ʻi he lea faka-Hepeluú. ʻOku ʻikai ha lau ia ʻo pehē naʻe liliu ʻe Sīsū ʻa e kupú ni ki he lea faka-Alameá.—Luke 4:16-21.

ʻI he fekauʻaki mo e ngaahi lea naʻe ngāueʻaki ʻi Pālesitaine ʻi he taimi naʻe ʻi māmani ai ʻa Sīsū Kalaisí, ʻoku pehē ʻe Palōfesa G. Ernest Wright: “ʻOku hā mahino ko e lea naʻe leaʻaki anga-mahení ko e lea faka-Kalisí mo e faka-Alameá . . . Naʻe fanongoa nai ʻa e fetalanoaʻaki ʻa e kau sōtia mo e kau ʻōfisa Lomá ʻi he lea faka-Latiná, lolotonga ia naʻe fetalanoaʻaki nai ʻa e kau Siu ʻofotokisií ʻi ha faʻahinga lea faka-Hepelū ʻe taha.” Tā neʻineʻi ke tohi ʻa e fakaʻilonga naʻe fokotuʻu ʻe Pailato ʻi he ʻakau fakamamahi ʻo Sīsuú ʻi he lea ʻe tolu—ko e faka-Hepelū, faka-Latina mo e faka-Kalisi.—Sione 19:20.

ʻOku pehē ʻe Alan Millard ʻi heʻene tohi ko e Discoveries From the Time of Jesus: “ʻI he fakahoko ʻo honau ngaahi fatongia fakaʻahó ko e kau kōvana Lomá ko hono moʻoní naʻa nau lea faka-Kalisi, pea ʻoku ngalingali naʻe tali ʻe Sīsū ʻa e ngaahi fehuʻi ʻa Pailato ʻi hono fakamāuʻí ʻi he lea faka-Kalisí.” Neongo ʻoku ʻikai fakahaaʻi ʻe he Tohi Tapú pe ko e tuʻungá nai eni, ʻoku mahuʻinga ke fakatokangaʻi ʻoku ʻikai ha lave ia ai naʻe ngāueʻaki ha tokotaha fakatonulea ki he fetalanoaʻaki ko ení.—Sione 18:28-40.

Fakatatau ki he lau ʻa Palōfesa Wright, “ʻoku ʻikai ha founga pau ke tau ʻiloʻi ai pe naʻe lava ke lea faka-Kalisi pe faka-Latina [ʻa Sīsū], ka ʻi heʻene faiako ʻi he ngāue fakafaifekaú naʻá ne ngāueʻaki maʻu pē ai ʻa e lea faka-Alameá pe ko e lea faka-Hepelū manakoa naʻe tākiekina lahi ʻi he tuʻunga faka-Alameá.”—Biblical Archaeology, 1962, peesi 243.

Naʻe lalahi fēfē ʻa e ngaahi fuʻu maka ʻo e temipale ʻi Selusalemá?

ʻI he talanoa kia Sīsū fekauʻaki mo e temipale ʻi Selusalemá, naʻe pehē ʻe he kau ākongá: “Tangataʻeiki, vakai ange ʻa e ngaahi maka mo e ngaahi fale! hono ʻikai ko e meʻa fakamanavahē!” (Maake 13:1) Naʻe lahi fēfē ʻa e niʻihi ʻo e ngaahi fuʻu maka ko iá?

ʻI he taimi naʻe ʻi māmani ai ʻa Sīsuú, ne ʻosi fakalahi liunga ua ai ʻe Tuʻi Hēlota ʻa e lahi ʻo e Tuʻuʻanga Temipalé ʻi hono fakahoa ki he tuʻuʻanga temipale ko ia ʻi he taimi ʻo Solomoné. Ko e tuʻuʻanga lahi taha eni kuo faʻu ʻe he tangatá ʻi he māmani motuʻá, ʻa ia ko hono fuá naʻe mita nai ʻe 480 pea mita ʻe 280 ʻa hono fālahí. Ko e niʻihi ʻo e ngaahi fuʻu maka ki he langá, ʻoku pehē naʻe mita ʻe 11 hono lōloá, mita ʻe 5 hono fālahí pea mita ʻe 3 hono māʻolungá. Ko ha niʻihi ʻo e ngaahi maká naʻe laka hake he toni ʻe 50 ʻa honau mamafá taki taha. Ko e fuʻu maka ʻe taha naʻe aʻu ʻo ofi ʻa hono mamafá ki he toni ʻe 400 pea “naʻe ʻikai hano tatau ʻa hono lahí ʻi ha feituʻu pē ʻi he māmani motuʻá,” fakatatau ki he lau ʻa e mataotao ʻe taha.

ʻI he tali ki he lea ʻa ʻene kau akó naʻe pehē ʻe Sīsū: “ʻOku mou tokanga koā ki he ngaahi fuʻu fale ni? ʻe ʻikai ʻaupito tuku ʻi heni ha foʻi maka ʻo taʻe holoki.” (Maake 13:2) Ko e lahi ʻo e ngaahi fuʻu maka ko ení ʻoku kei lava ke mamata ki ai ʻi he feituʻu naʻa nau holafa ki aí hili hono veteki ʻo holoki ʻe he kau sōtia Lomá ʻi he 70 T.S.

[Fakatātā ʻi he peesi 26]

Ngaahi fuʻu maka ʻo e temipalé ʻi hono holoki ʻi tuʻa ʻi he tuʻuʻanga temipalé, ʻi Selusalema