Tokoniʻi Hoʻo Tamá Ke Ne Fekuki mo e Mamahí

ʻI HA fale tohi femoʻuekina, naʻe kalanga ai ha faʻē ongoʻi feifeitamaki ki ha faifakatau: “ʻOkú ke maʻu ha falekoloa ʻoku fonu he ʻū tohí ka ʻoku halaʻatā ai ha tohi ʻe tokoni ki heʻeku tamá!” Naʻe kumi ʻa e faʻeé ki ha tataki ke tokoniʻi ʻa ʻene kiʻi tamasiʻí ke ne fekuki mo ha mate fakafokifā ʻa ha mēmipa ofi ʻi he fāmilí.

Naʻe ʻuhinga lelei e hohaʻa ʻa e faʻē ko ení. He fakalotomafasia moʻoni ko e fehangahangai ʻa ha kiʻi tama mo e moʻoniʻi meʻa ko ia ko e mate ʻa ha taha! ʻOku lakalakaimonū ʻa e fānaú ʻi he tokanga ʻa honau fāmilí, neongo ia ʻoku lava ke ʻave ʻe he maté ha taha ʻofeina ʻa ia kuo vāofi mo ha kiʻi tama. ʻI he tuʻunga ko ha mātuʻá, ʻe lava fēfē ke ke tokoniʻi hoʻo kiʻi tamá ʻi he taimi ko ia ʻoku ofi ai ke mate pe kuo ʻosi mate ha tahá?

Ko e moʻoni, ʻi he fehangahangai mo e mate ʻa ha taha ʻofeiná, ʻokú ke fāinga nai ke fekuki mo hoʻo ngaahi ongoʻí; ʻokú ke ongoʻi mamahi mo fakakaukau nai ki hoʻo mamahí. Kae kehe, kuo pau ke ʻoua naʻa ngalo ʻiate koe ʻoku fiemaʻu ʻe hoʻo tamá ʻa hoʻo poupoú. “ʻOku fanongo nai ʻa e fānaú ki ha konga ʻo ha fetalanoaʻaki, pea ʻoku nau faʻa maʻu hala pe ʻikai mahinoʻi ʻa e fakamatalá,” ko e fakamatala ia ʻa ha tohi naʻe tufaki ʻi ha falemahaki ki he faʻahinga ʻoku tali maté ʻi Minnesota, ʻAmelika. ʻOku toe pehē ai: “ʻOku fiemaʻu ke tala ki he fānaú ʻa e moʻoní.” Ko ia ʻoku fakapotopoto nai ke fakamatalaʻi ʻa e ngaahi meʻa moʻoní ki hoʻo fānaú, ʻo fakatatau ki he tuʻunga ʻo ʻenau mahinó. ʻOku faingataʻa eni, koeʻuhi ʻoku kehekehe lahi nai ʻa e fānaú ʻi heʻenau malava ke mahinoʻi ʻa e meʻa ʻoku hokó.—1 Kolinito 13:11.

Founga ke Fakamatalaʻi Ai ʻa e Maté

ʻOku pehē ʻe he kau fakatotolo ʻe niʻihi ʻi he taimi ʻo e talanoa ki ha kiʻi tama ʻo fekauʻaki mo e maté, ʻoku totonu ke tokanga ʻa e ongo mātuʻá fekauʻaki mo hono ngāueʻaki ʻa e ngaahi foʻi lea hangē ko e “mohe,” “mole,” pe “ʻalu ki ha feituʻu.” Ko hono ngāueʻaki ʻa e ngaahi foʻi lea peheé ʻo ʻikai fakamatalaʻi pe fakamahinoʻí ʻe puputuʻu nai ai ha kiʻi tama. Ko e moʻoni, naʻe ngāueʻaki ʻe Sīsū ʻa e mohé ko ha fakatātā ki he maté pea naʻe feʻungamālie ia. Kae kehe, manatuʻi naʻe ʻikai ko ʻene leá ki ha tamaiki. ʻIkai ko ia pē, naʻá ne fakamatalaʻi ʻa e fakatātaá. Naʻe tala ange ʻe Sīsū ki hono kau muimuí: “Ko siʻota kaumeʻa ko Lasalosi kuo mohe.” Ko e kau ākongá, neongo ko e kakai lalahi kinautolu, naʻa nau “mahalo ʻekinautolu ʻoku ne meʻa [ʻa Sīsū] ki haʻane toka ʻo mohe.” Ko ia naʻe fakamahinoʻi ai ʻe Sīsū ʻa e meʻá: “Kuo pekia ʻa Lasalosi.” (Sione 11:11-14) Kapau naʻe fiemaʻu  ha ngaahi fakamatala mahino pehē ki he kakai lalahí, huanoa ai ʻetau fānaú!

“ʻE feinga nai ha mātuʻa ke ʻoua ʻe ngāueʻaki ha lea ʻe ongo fakaʻohovale ʻi hono fakamatalaʻi ʻa e maté ki heʻene kiʻi tamá,” ko e lau ia ʻa e ongo faʻu-tohi ko Mary Ann Emswiler mo James P. Emswiler, “ka ʻi he fai peheé, ʻokú ne fokotuʻu nai ai ʻa e fakakaukau ki hono ʻatamaí naʻe ʻikai ke ʻi ai ki muʻa pea ʻe fakailifia nai ia pe fakatupu maumau.” Hangē ko ení, ʻi hono tala pē ki ha kiʻi tama ʻoku mohe pē ʻa e tokotaha ʻofeina kuo maté ʻe fakatupunga nai ai ʻa e kiʻi tamá ke ne ilifia he mohe ʻi he poʻulí naʻa ʻikai te ne toe ʻā hake. Kapau ʻe tala pē ki ai ʻoku “ʻalu ki ha feituʻu” ʻa e tokotaha ʻofeina kuo maté, ʻe ongoʻi nai ai ʻe he kiʻi tamá ʻoku ʻikai tali ia pe liʻaki.

ʻI he feinga ke fakamatalaʻi ʻa e maté ki ha kiʻi tama, kuo ʻiloʻi ʻe he ngaahi mātuʻa lahi ʻoku mahinoʻi lelei ange ʻe he fānaú ʻa e ngaahi foʻi lea faingofua mo hangatonú ʻi he ngaahi fakakaukau ʻikai ʻilongofua pe fakangalileleí. (1 Kolinito 14:9) ʻOku fakahinohino mai ʻa e kau fakatotoló ke ke fakalototoʻaʻi hoʻo kiʻi tamá ke ne ʻeke ha ngaahi fehuʻi pea talanoa fekauʻaki mo e ngaahi meʻa ʻokú ne hohaʻa ki aí. Ko e toutou fetalanoaʻakí ʻe tokoniʻi nai ai koe ke ke fakamahinoʻi ʻa e ngaahi taʻemahinó pea lava ke fakahaaʻi ai ha ngaahi founga kehe ke tokoni ki hoʻo kiʻi tamá.

Matavai Alafalalaʻanga ʻo e Tatakí

Lolotonga ha taimi ʻo e mamahí, ʻe hanga atu nai ʻa hoʻo kiʻi tamá kiate koe ki ha tataki, poupou pea mo e ngaahi tali. Ko fē leva ʻe lava ke ke maʻu ai ha fakamatala alafalalaʻanga ki he kaveinga ʻo e maté? Kuo ʻilo ʻe he kakai tokolahi ko e Tohi Tapú ko ha matavai alafalalaʻanga ia ʻo e fakafiemālié mo e ʻamanakí. ʻOku tokonaki mai ai ʻa e fakamatala falalaʻanga ki he tupuʻanga ʻo e maté, ko e tuʻunga ʻo e kau maté, mo e ʻamanaki ki he kau maté. Ko e foʻi moʻoni faingofua ko ia “ko e kau pekia ʻoku ʻikai te nau ʻilo ha momoʻi meʻa” ʻoku totonu ke ne tokoniʻi hoʻo kiʻi tamá ke ne ʻiloʻi ko e tokotaha ʻokú ne ʻofa aí kuo maté ʻoku ʻikai ke faingataʻaʻia. (Koheleti 9:5) ʻIkai ngata aí, ʻi he Tohi Tapú, ʻoku ʻomai ai ʻe he ʻOtuá ʻa e ʻamanaki te tau toe sio ki he faʻahinga ʻoku tau ʻofa aí ʻi ha māmani palataisi.—Sione 5:28, 29.

ʻI he hanga ki he Tohi Tapu Māʻoniʻoní, ʻe lava ke ke tokoniʻi ai hoʻo kiʻi tamá ke ne ʻiloʻi ʻoku ʻomai ʻe he Tohi Tapú ʻa e tataki alafalalaʻanga mo e fakafiemālie ki he tuʻunga fakalotomamahi kotoa pē. ʻI he taimi tatau, ʻe sio hoʻo kiʻi tamá ko ha mātuʻa koe ʻokú ke falala ki he Folofola ʻa e ʻOtuá ki ha fakahinohino ʻi he ngaahi meʻa mahuʻinga ʻi he moʻuí.—Palovepi 22:6; 2 Timote 3:15.

Tali Hoʻo Ngaahi Fehuʻí

ʻI hono tokoniʻi ʻa hoʻo kiʻi tamá ke ne fekuki mo e mamahí, te ke fetaulaki nai ai mo e ngaahi tuʻunga fakatupu puputuʻu. Ko e hā ʻe lava ke ke faí? a Tau lāulea angé ki ha ngaahi fehuʻi anga-maheni nai ʻe ʻohake.

• ʻOku totonu ke u fufū ʻeku mamahí mei heʻeku tamá? ʻOku fakanatula pē hoʻo loto ke maluʻi ʻa hoʻo kiʻi tamá. Ka ʻoku hala ke sio ʻa hoʻo kiʻi tamá ʻokú ke mamahi? Kuo ʻiloʻi ʻe he ngaahi mātuʻa lahi ʻoku lelei tahá ke faitotonu fekauʻaki mo ʻenau mamahí, ʻo fakahaaʻi ai ki heʻenau fānaú ʻoku fakanatula pē ke mamahi. Kuo lāulea ʻa e niʻihi mo ʻenau fānaú ki he ngaahi fakatātā ʻi he Tohi Tapú ʻo e faʻahinga naʻa nau mamahi ʻi he ʻao ʻo e niʻihi kehé. Ko e fakatātaá, naʻe tangi ʻa Sīsū ʻi he mate siʻono kaumeʻa ko Lāsalosí. Naʻe ʻikai ke fufū ʻe Sīsū ʻa ʻene ongoʻí.—Sione 11:35.

• ʻOku totonu ke ʻalu ʻa ʻeku kiʻi tamá ki he ngaahi ouau faiputu ʻoku fai ʻi ha ʻapi faiʻanga putu pe ʻi he faʻitoká pe ke ne ʻi ha malanga putu? Kapau ʻe ʻalu ki ai ha kiʻi tama, ʻe fakapotopoto nai ke fakamatalaʻi kiate ia ki muʻa ʻa e meʻa ke ne ʻamanekiná, ʻo kau ai ʻa e ʻuhinga ʻoku fai ai ʻa e malanga putú. Ko e moʻoni, ʻi he ngaahi tuʻunga ʻe niʻihi, ʻe fili nai ai ʻe he ngaahi mātuʻá ʻoku ʻi ai ʻa e ngaahi ʻuhinga lelei ke ʻoua ʻe ʻi ai ʻenau fānaú ʻi he kotoa pe ko ha konga ʻo e ngaahi meʻa ʻe faí. Ko e fānau ʻoku nau ʻi he ngaahi ouau ʻo ha putu  ʻoku fai ʻe he Kau Fakamoʻoni ʻa Sihová te nau maʻu ʻaonga nai ai mei he malanga ʻe fai makatuʻunga ʻi he Tohi Tapú. Tānaki atu ki ai, ko e “ʻofa māfana” mo e ʻofa ʻoku hā mahino ʻi he lotolotonga ʻo e faʻahinga ʻoku ʻi aí ʻe lava ke aʻu ʻo ʻaonga mo fakafiemālie ia ki ha kiʻi tama.—Loma 12:10, 15, NW; Sione 13:34, 35.

• ʻOku totonu ke u talanoa ki heʻeku tamá fekauʻaki mo e tokotaha ʻofeina kuo maté? ʻOku pehē ʻe he kau fakatotolo ʻe niʻihi kapau ʻokú ke fakaʻehiʻehi fakaʻaufuli mei he tuʻunga-lea ko ení, ʻe fakaʻosi hala ʻaki nai ʻe hoʻo tamá ʻokú ke tauhi ha meʻa fakapulipuli fekauʻaki mo e tokotaha maté pe feinga ke toʻo ʻosi e manatu kotoa ʻo fekauʻaki mo e tokotaha ko iá. Ko e faʻu-tohi ko Julia Rathkey ʻokú ne pehē: “ʻOku mahuʻinga ke tokoniʻi ʻa e fānaú ke nau ako ke nofo fakataha mo e manatu ki he meʻa ko iá ʻo ʻikai ke nau ilifia.” Ko e lea tauʻatāina fekauʻaki mo e tokotaha maté, ʻo kau ai ʻa e lave ki he ngaahi tafaʻaki lelei ʻi he ʻulungāanga mo e moʻui ʻa e tokotahá, ʻe tokoni lelei ia ki he fakaakeake mei he mamahí. Ko e ngaahi mātuʻa Fakamoʻoní ʻoku nau fakafiemālieʻi ʻenau fānaú ʻaki ʻa e ʻamanaki ʻi he Tohi Tapú fekauʻaki mo e toetuʻu ki ha māmani palataisí, ʻa ia heʻikai ke toe ʻi ai ha puke mo ha mate.—Fakahā 21:4.

• ʻE lava fēfē ke u tokoniʻi ʻa ʻeku tamá lolotonga ʻa ʻene mamahí? Lolotonga ʻa e taimi ʻo e mamahí, ʻe hokosia nai ʻe hoʻo tamá ha ngaahi fakaʻilonga fakaesino, ko e puke nai. ʻE hoko nai ʻa e kiʻi tamá ʻo ʻiteʻita pe hohaʻa koeʻuhi ko e ongoʻi masiva tokoni mo e feifeitamakí. ʻOua ʻe ofo kapau ʻoku ongoʻi halaia lahi ʻa hoʻo tamá, ʻo ne pipiki maʻu kiate koe, pe manavasiʻi kapau ʻokú ke aʻu tōmui atu pe kapau ʻokú ke puke. ʻE lava fēfē ke ke fakaleleiʻi ʻa e mamahi ʻa hoʻo tamá? ʻOku ʻikai ʻaupito totonu ke ongoʻi ʻe hoʻo tamá ʻoku ʻikai te ke ʻiloʻi ʻokú ne mamahi. Ko ia ai, ʻai ke ke ʻiloʻilo pea tokanga ki he lahi mo e fuoloa ʻo ʻene mamahí. ʻOua ʻe feinga ke fakamaauhalaʻi pe fakasiʻia ʻa e lahi ʻo hono uesia ʻo hoʻo tamá ʻe he maté. Fai maʻu pē ha fakafiemālie, pea fakalototoʻaʻi ke ne ʻeke ha ngaahi fehuʻi pea talanoa hangatonu. ʻE lava ke ke ʻai ke mālohi e ʻamanaki ʻa hoʻo tamá—pea pehē foki kiate koe—fakafou ʻi he “fakafiemalie oe gaahi tohi.”—Loma 15:4, PM.

• Ko e hā hono fuoloa peá u foki ki he founga-tuʻumaʻu mo e ngaahi ngāue kehe ʻi he fāmilí? Tauhi maʻu ʻa e lahi taha ʻo e ngaahi founga-tuʻumaʻu ʻe ala lavá, ko e lau ia ʻa e kau mataotaó. ʻOku pehē ko hono tauhi ʻa e ngaahi founga-tuʻumaʻu leleí ko ha founga ʻaonga ia ki hono fakaleleiʻi ʻo e mamahí. ʻI he haʻohaʻonga ʻo e Kau Fakamoʻoni ʻa Sihová, kuo ʻiloʻi ai ʻe he ngaahi mātuʻa lahi ko hono tauhi ha founga-tuʻumaʻu lelei fakalaumālié, ʻa ia ʻoku kau ai ha ako Tohi Tapu fakafāmili tuʻumaʻu mo hono maʻu ʻa e ngaahi fakataha faka-Kalisitiané, ʻe lava ke ʻi ai hono kaunga tuʻumaʻu mo fakaivimālohi ki he fāmilí.—Teutalonome 6:4-9; Hepelu 10:24, 25.

ʻI he toki aʻu ki he taimi ʻa ia ʻe ʻomai ai ʻe he ʻOtua ko Sihová ha ngataʻanga ki he puké mo e maté, ʻe fehangahangai ʻa e fānaú ʻi he taimi ki he taimi mo e mamahi ʻoku hoko ʻi he maté. (Aisea 25:8) Kae kehe, ʻi he fakafiemālie mo e poupou totonú, ʻe lava ai ke tokoniʻi ʻa e fānaú ke nau fekuki lavameʻa mo e mole ʻa ha tokotaha ʻofeina.

[Fakamatala ʻi lalo]

[Fakamatala ʻi he peesi 19]

Fakalototoʻaʻi hoʻo kiʻi tamá ke ne ʻeke ha ngaahi fehuʻi pea talanoa fekauʻaki mo e ngaahi meʻa ʻokú ne hohaʻa ki aí

[Fakatātā ʻi he peesi 20]

Tauhi maʻu ʻa e ngaahi founga-tuʻumaʻú, ʻo kau ai ʻa hoʻo ako Tohi Tapu fakafāmilí