Kumi ki he Moʻoni Fekauʻaki mo Hēvaní

HE ONGO fakalata moʻoni ko e ʻamanaki ki he ō ki hēvaní! Ko e ʻamanaki ki he moʻui hili ʻa e maté ʻoku tui ki ai ʻi he founga kehekehe ʻa e kau lotu Mosilemí, Hinituú, Putá, mēmipa ʻo e ngaahi siasi ʻo e Puleʻanga Haʻa Kalisitiané, pea naʻa mo e tokolahi ʻa ia ʻoku ʻikai te nau mahuʻingaʻia ʻi he lotú. ʻOku faʻa fai e sioloto atu ko hēvaní ko ha feituʻu fakaʻofoʻofa mo fakafiefia ʻa ia ʻoku maʻu ai ʻe he kakaí ʻa e fakafiemālie mei he faingataʻá pea nau toe fakataha ai mo e “ngaahi ʻofaʻanga kuo maté.” Pea neongo ia, ki he tokolahi taha ʻo e faʻahinga ʻo e tangatá, ʻoku moʻoni ai e laú: ʻOku fie ō ʻa e tokotaha kotoa ki hēvani, ka ʻoku ʻikai fie mate ha taha kae aʻu ki ai. Ko e hā ʻoku pehē aí?

Kapau naʻe fakataumuʻa ke tau mate pea ō ki hēvani, ʻikai ʻe ʻamanaki atu ki ai ʻa e kakai tokolahi ange ʻo hangē pē ko e ʻamanaki ʻa ha kiʻi tama ke tupu ʻo fuʻu lahi pe ko ha talavou ʻoku ʻamanaki atu ke mali? Ka ko e tokolahi taha ʻo e kakaí ʻoku ʻikai te nau fie mate.

Naʻa mo ia, ʻoku taukaveʻi ʻe he kau faifekaú ʻi he hili ʻetau fononga nounou ʻi he māmaní, ko hēvani ʻa e feituʻu naʻe fakataumuʻa ke tau nofo aí. Ko e fakatātaá, ko Theodore Edgar Cardinal McCarrick, ko e pīsope-pule mālōlō ʻo Washington, D.C., naʻe hiki ʻa ʻene lea ʻo pehē: “Ko e moʻui ko ení naʻe ʻikai ngaohi kitautolu ki ai. Ne ngaohi kitautolu ki hēvani.” ʻI he tuʻunga meimei tatau, ko ha palesiteni mālōlō ʻo e Kautaha Fakafonua ʻo e Kau ʻEvangeliō ʻi ʻAmeliká naʻe hiki ʻa ʻene lea ʻo pehē: “Ko e taumuʻa ʻo e moʻuí ke fakalāngilangiʻi ʻa e ʻOtuá pea ō ki hēvani . . . he ko hēvani ʻa hotau ʻapí.”

Ko e faʻahinga ʻoku tui ki ha moʻui ʻi hēvani hili ʻa e maté ʻoku faʻa fakatefito ʻenau tuí ʻi ha fakamatala ʻoku ʻikai feʻunga. Ko George Barna, ko e palesiteni ʻo ha kautaha ʻokú ne fakatotoloʻi ʻa e ngaahi fakakaukau fakalotú, naʻá ne ʻiloʻi ai ko e kakai tokolahi ʻoku nau maʻu ʻa e “fakakaukau ki he moʻuí pea mo e moʻui ʻi he hili ʻa e maté makatuʻunga ʻi he fakakaukau ʻoku maʻu mei ha tupuʻanga kehekehe, hangē ko e faivá, fasí mo e ngaahi tohí.” Ko ha faifekau ʻi he Siasi Fakaʻepikopō ʻi Fololita naʻe hiki ʻa ʻene lea ʻo pehē: “ʻOku ʻikai te tau ʻiloʻi ha meʻa fekauʻaki mo hēvani tuku kehe pē ʻa e ʻiloʻi ko hēvaní ʻoku ʻi ai ʻa e ʻOtuá.”

Kae kehe, ko hēvaní ko ha tōpiki mahuʻinga ia ʻoku lāulea ki ai ʻi he Tohi Tapú. Fakatatau ki he Folofola ʻa e ʻOtuá, ʻoku fēfē ʻa hēvani? Naʻe ngaohi ʻa e tangatá ke nofo ʻi hēvani? Kapau ʻoku ō ʻa e kakaí ki hēvani, ko e hā te nau fai ʻi aí?

[Fakamatala ʻi he peesi 3]

Ko e hā ʻoku fie ō ai ʻa e tokolahi ki hēvani, ka ko e tokosiʻi pē ʻoku fie mate kae aʻu ki aí?