Hangē ko ia ʻoku fakahaaʻi ʻi he fakatātā ʻi he toʻomataʻú, ʻoku sioloto atu ʻa e kakai tokolahi ko e ʻAho Fakamāú ʻe ʻomai ai ʻa e kakai ʻe laui piliona ki he ʻao ʻo e taloni ʻo e ʻOtuá ke fakamāuʻi ʻo fakatatau ki heʻenau ngaahi ngāue ki muʻá—ko e niʻihi ke fakapaleʻi ʻaki ʻa e moʻui ʻi hēvani, ko e niʻihi kehé ʻe fakamamahiʻi ʻi heli. Kae kehe, ʻoku fakahaaʻi ʻe he Tohi Tapú ko e taumuʻa ʻo e ʻAho Fakamāú ke fakahaofi ʻa e kakaí mei he fakamaau taʻetotonú. (Saame 96:13) Kuo fakanofo ʻe he ʻOtuá ʻa Sīsū ke ne hoko ko e Fakamaau ʻa ia te ne fakafoki mai ʻa e fakamaau totonú ki he faʻahinga ʻo e tangatá.—Lau ʻa e ʻAisea 11:1-5; Ngāue 17:31.

ʻI he taimi naʻe angatuʻu ʻosi fakakaukauʻi ai ʻa e ʻuluaki tangatá, ʻa ʻĀtama, ki he ʻOtuá, naʻá ne fakamoʻulaloa ʻa e kotoa ʻo ʻene fānaú ki he angahalá, faingataʻaʻiá, mo e maté. (Loma 5:12) Ke fakatonutonu ʻa e fakamaau taʻetotonu ko iá, ʻe fakafoki mai ʻe Sīsū ki he moʻuí, pe fokotuʻu hake, ʻa e laui piliona mei he maté. Ko e tohi Fakahaá ʻoku fakahaaʻi ai ʻe fakahoko ʻa e meʻá ni lolotonga ʻa e pule taʻu ʻe taha afe ʻa Kalaisi Sīsuú.—Lau ʻa e Fakahā 20:4, 11, 12.

Ko e faʻahinga ʻe toetuʻú ʻe fakamāuʻi, ʻo ʻikai makatuʻunga ʻi he meʻa naʻa nau fai ki muʻa ke nau maté, ka ʻi he meʻa ʻoku nau fai ʻi he taimi ʻe fakahaaʻi ai ʻa e meʻa ʻi loto ʻi he “ngaahi takainga tohi” naʻe lave ki ai ʻi he Fakahā vahe 20. (Loma 6:7) ʻE kau ʻi he lotolotonga ʻo e faʻahinga ko ia te nau toe moʻui pea maʻu ʻa e faingamālie ke ako ai fekauʻaki mo e ʻOtuá “fakatouʻosi ʻa e māʻoniʻoní mo e taʻemāʻoniʻoní,” ko e lau ia ʻa e ʻapositolo ko Paulá.—Lau ʻa e Ngāue 24:15.

Ko e faʻahinga ko ia kuo mate ʻo ʻikai ʻaupito ke nau hoko ʻo ʻiloʻi ʻa Sihova ko e ʻOtuá pea tauhi kiate iá te nau maʻu ʻa e faingamālie ke liliu ai ʻo failelei. Kapau te nau fai pehē, ʻe iku ʻenau toetuʻú ʻo hoko ko e “toetuʻu ki he moʻui.” Kae kehe, ko e niʻihi ʻo e faʻahinga ʻe toetuʻú, heʻikai te nau loto ke ako ki he ngaahi founga ʻa Sihová. Ko ʻenau toetuʻú ʻe iku ia ko ha “toetuʻu ki he fakamaau.”—Lau ʻa e Sione 5:28, 29; ʻAisea 26:10; 65:20.

ʻI he ngataʻanga ʻo e ʻAho Fakamaau ʻo e taʻu ʻe taha afe ʻa hono lōloá, ʻe ʻosi fakafoki ai ʻe Sihova ʻa e faʻahinga talangofua ʻo e tangatá ki honau muʻaki tuʻunga haohaoá. (1 Kolinitō 15:24-28) Ko ha ʻamanaki fisifisimuʻa moʻoni ia ki he faʻahinga talangofua kotoa pē! ʻI ha ʻahiʻahi fakaʻosi, ʻe tukuange mai ai ʻe he ʻOtuá mei he luo taʻehanotakelé ʻa Sētane ko e Tēvoló, ʻa ia naʻe tuku pōpula ai ʻi ha taʻu ʻe taha afe. ʻE toe feinga ʻa Sētane ke fakatafokiʻi ʻa e kakaí meia Sihova, ka ko e faʻahinga ko ia te nau talitekeʻi ʻa Sētané te nau maʻu ʻa e moʻui ʻi he māmaní ʻo taʻengata.—Lau ʻa e ʻAisea 25:8; Fakahā 20:7-9.

ʻOku toe ngāueʻaki ʻe he Tohi Tapú ʻa e foʻi lea ko e “ʻaho ʻo e fakamāú” ke ʻuhinga iá ki he meʻa ʻe hoko ʻa ia te ne ʻomai ʻa e fokotuʻutuʻu lolotongá ki hono ngataʻangá. Ko e ʻaho fakamaau ko ení ʻe hoko fakafokifā mai ia ʻo hangē ko e Lōmaki ʻo e ʻaho ʻo Noá, ʻa ia naʻá ne tafiʻi fakakātoa atu ha toʻutangata fulikivanu. Ko e meʻa fakafiefiá, he ko e fakaʻauha ʻoku tuʻunuku mai ʻo e “kakai anga-taʻefakaʻotuá” ʻe fakaʻatā ai ʻa e hala ki ha sōsaieti fakaemāmani foʻou ʻa ia ʻe “lotolotoi ai ʻa e māʻoniʻoní.”—Lau ʻa e 2 Pita 3:6, 7, 13.