Fakatatau ki he Tohi Tapú, ko e faʻahinga kotoa ʻo e tangatá ko e kau angahalá. ʻOku tau maʻu tukufakaholo ʻa e hehema ki he angahalá mei he ʻuluaki tangatá, ʻa ʻĀtama. Ko ia ai, ʻoku tau fai ʻa e ngaahi meʻa ʻoku kovi ʻi he taimi ʻe niʻihi pea fakaʻiseʻisa nai ki mui ʻi he meʻa naʻa tau faí. Ko e ʻAlo ʻo e ʻOtuá, ʻa Sīsū Kalaisi, naʻá ne totongi ʻetau ngaahi angahalá ʻaki ʻene pekia maʻatautolu. Ko ʻene feilaulau huhuʻí naʻe ʻai ai ke malava ʻa e fakamolemolé. Ko ha meʻaʻofa ia mei he ʻOtuá.—Lau ʻa e Loma 3:23, 24.

Kuo fai ʻe he kakai ʻe niʻihi ʻa e ngaahi angahala mamafa pea fifili pe ʻe lava ke fakamolemoleʻi kinautolu ʻe he ʻOtuá. Ko e meʻa fakafiefiá, ʻoku pehē ʻi he Folofola ʻa e ʻOtuá: “Ko e taʻataʻa ʻo Sīsū ko hono ʻAló ʻokú ne fakamaʻa kitautolu mei he angahalá kotoa.” (1 Sione 1:7) ʻOku fakamolemoleʻi loto-lelei ʻe Sihova naʻa mo e ngaahi angahala mamafá kapau ʻoku tau maʻu ha fakakaukau totonu mo fakatomala.—Lau ʻa e ʻAisea 1:18.

Kapau ʻoku tau loto ke fakamolemoleʻi kitautolu ʻe Sihova ko e ʻOtuá, ʻoku fiemaʻu ke tau ako fekauʻaki mo ia—ke mahinoʻi ʻene ngaahi foungá, ko ʻene faleʻí, mo ʻene ngaahi fiemaʻú. (Sione 17:3) ʻOku fakamolemoleʻi loto-lelei ʻe Sihova ʻa e faʻahinga ʻoku nau fakatomalaʻi ʻenau tōʻonga koví pea feinga ke liliú.—Lau ʻa e Ngāue 3:19.

Ko hono maʻu ʻa e hōifua ʻa e ʻOtuá ʻoku ʻikai ke fuʻu faingataʻa ia kia kitautolu. ʻOku mahinoʻi ʻe Sihova hotau ngaahi vaivaiʻangá. ʻOkú ne mohu meesi mo anga-ʻofa. ʻOku ʻai ʻe heʻene ʻofa-mateakí ke ke loto ke ako lahi ange fekauʻaki mo e founga ke fakahōifua ai kiate iá?—Lau ʻa e Saame 103:13, 14.