ʻOkú ke holi ke maʻu ha moʻui lelei mo ha moʻui fuoloa kiate koe mo ho fāmilí? ʻOkú ke fakaʻamu ke moʻui ʻi ha māmani ʻa ia ko e mamahí, faingataʻá mo e maté ʻe hoko ko e ngaahi meʻa pē ʻo e kuohilí? Ko e māmani ko iá ʻoku ʻikai ko e anga pē ia ʻo e fakakaukaú. ʻI hono kehé, ko ha māmani foʻou māʻoniʻoni ʻe vavé ni ke hoko moʻoni, ʻa ia ko e taumuʻa ia ʻa Sihova ko e ʻOtuá. Fakatokangaʻi ʻa e anga hono fakahoko ʻene taumuʻá ʻoku fakamatalaʻi ʻi he Fakahā 21:3-5.—Lau.

ʻE “holoholo [ʻe he ʻOtuá] ʻa e loʻimata kotoa pē mei honau matá.” (Fakahā 21:4) Ko e hā ʻa e loʻimata ʻe holoholoʻí? ʻOku ʻikai ko e ngaahi loʻimata ia ʻo e fiefia pe loʻimata ʻokú ne maluʻi hotau matá. ʻOku ʻuhinga ʻa e talaʻofa ʻa e ʻOtuá ki he ngaahi loʻimata kuo fakatupunga ʻe he faingataʻá mo e mamahí. ʻE ʻikai ko hono holoholoʻi pē ʻe he ʻOtuá ʻa e ngaahi loʻimata ko iá; ka te ne holoholoʻi fakaʻaufuli ʻaki hono toʻo ʻosi ʻa e tupuʻanga ʻo e ngaahi loʻimata ʻoku ʻikai ke tau loto ki aí—ʻa ia ko e faingataʻá mo e mamahí.

“ʻE ʻikai ke toe ʻi ai ha mate.” (Fakahā 21:4) Ko e hā ʻokú ne fakatupunga ke lahi ange ʻa e ngaahi loʻimatá ʻi he fili ko maté? ʻE fakatauʻatāinaʻi ʻe Sihova ʻa e faʻahinga talangofua ʻo e tangatá mei he haʻisia ki he maté. Anga-fēfē? ʻAki hono toʻo ʻosi ʻa e tupuʻanga moʻoni ʻo e maté: ko e angahala tukufakaholo meia ʻĀtama. (Loma 5:12) ʻE ʻai ʻe Sihova ʻa e faʻahinga talangofua ʻo e tangatá ke haohaoa ʻo makatuʻunga ʻi he feilaulau huhuʻi ʻa Sīsuú. * Pea ko e fili fakaʻosí, ʻa mate, “ʻe toʻo ʻosi atu ia.” (1 Kolinitō 15:26) ʻE malava ʻa e faʻahinga faitōnunga ʻo e tangatá ke moʻui ʻo hangē ko e taumuʻa ʻa e ʻOtuá kia kinautolú ke moʻui—taʻengata ʻi he moʻui lelei haohaoa.

“ʻE ʻikai ke toe ʻi ai . . . ha langa.” (Fakahā 21:4) Ko e hā ʻa e langa ʻe ʻikai ke toe ʻi aí? ʻE ʻikai ke toe ʻi ai ʻa e kotoa ʻo e mamahi fakaeʻatamai, fakaeongo, mo e mamahi fakaesino ko e nunuʻa ia ʻo e angahalá mo e taʻehaohaoá ʻo ʻai ai ʻa e moʻuí ke fakamamahi ki he laui miliona taʻefaʻalauá.

ʻE vavé ni ke hoko moʻoni ha moʻui ʻikai ha loʻimataʻia, mate, mo e langa. Te ke ʻeke nai, ‘Ka ʻe hoko ia ʻi fē?’ Ko e talaʻofa ʻa e ʻOtuá ʻoku ʻuhinga nai ia ki he moʻui ʻi hēvaní? ʻIkai. Tau lāulea angé ki he ʻuhinga ʻoku ʻikai pehē aí. ʻUluakí, ko e talaʻofá ʻoku kamata ʻaki ia ʻa e ngaahi lea “ko e tēniti ʻo e ʻOtuá ʻoku ʻi he faʻahinga ʻo e tangatá,” mo e faʻahinga ʻo e tangatá ʻe moʻui ʻi he māmaní. (Fakahā 21:3) Uá, ko e talaʻofá ʻoku fakamatala ki ha māmani ʻa ia “ʻe ʻikai ke toe ʻi ai ha mate”—ko ha māmani naʻe ʻi ai ʻa e maté ka ʻoku ʻikai ke toe ʻi ai. Naʻe ʻikai ʻaupito ke ʻi ai ha mate ʻi hēvani, ka naʻe fuoloa ʻene ʻi heni ʻi māmani. Ko ia ʻoku hā mahino, ko e talaʻofa ʻa e ʻOtuá ki ha moʻui lelei angé ʻe fakahoko tonu ia ʻi heni ʻi he māmaní.

Ko e finangalo ia ʻo Sihová ke tau tui ki heʻene talaʻofa ki ha māmani foʻou māʻoniʻoni. ʻI he hili pē ʻene fakamatala ʻa e ngaahi tāpuaki ʻe hoko maí, ʻokú ne fakapapauʻi ʻene talaʻofá, ʻoku pehē: “Vakai! ʻOku ou ngaohi ke foʻou ʻa e ngaahi meʻa kotoa pē.” Peá ne hoko atu: “Ko e ngaahi foʻi folofola ko ení ʻoku alafalalaʻanga mo moʻoni.” (Fakahā 21:5) Ko e hā ʻoku ʻikai te ke ako lahi ange ai fekauʻaki mo e founga ke ke malava mo e faʻahinga ʻokú ke ʻofa aí ke ʻi he haʻohaʻonga ʻo e kau lotu fiefia, te nau sio ki he talaʻofa ʻa e ʻOtuá ʻi heʻene hoko ko ha moʻoni lāngilangiʻiá?