Sioloto atu ki ha tamai ʻoku talanoa mo hono foha taʻu fitu. Naʻá ne pehē, “ʻI he taimi fuoloa atú, naʻe ngaohi ʻe he ʻOtuá ʻa e māmaní mo e meʻa kotoa ʻi aí, pea naʻá ne ngaohi ʻa e laʻaá, māhiná mo e ngaahi fetuʻú.” Naʻe fakakaukau ki ai ʻa e kiʻi tamasiʻí ʻi ha ngaahi miniti siʻi peá ne toki ʻeke ange, “Teti, ko hai naʻá ne ngaohi ʻa e ʻOtuá?”

“Naʻe ʻikai ke ngaohi ʻe ha taha ʻa e ʻOtuá,” ko e tali ange ia ʻa e tamaí. “ʻOkú ne ʻi ai maʻu ai pē.” Ko e fakamatala faingofua ko iá ʻoku fiemālie ki ai ʻa e kiʻi tamá he taimi pē ko iá. Kae kehe, ʻi heʻene tupu ʻo motuʻa angé, ko e fehuʻi ko iá ʻoku hokohoko atu ʻene fakamānako kiate iá. Naʻá ne ʻiloʻi ʻa e faingataʻa ke mahinoʻi pe ʻoku anga-fēfē ʻa e ʻikai ke ʻi ai ha kamataʻanga ʻo ha taha. Naʻa mo e ʻunivēsí naʻe ʻi ai hono kamataʻanga. ‘Naʻe tupu ʻa e ʻOtuá mei fē?’ ko ʻene fifilí ia.

ʻOku anga-fēfē ʻa e tali ʻa e Tohi Tapú? Ko hono moʻoní, ʻoku meimei tatau ia mo e tamai naʻa tau fakatātāʻakí. Naʻe tohi ʻa Mōsese: “E Jihova, . . . i he heeki ai fakatubu ae gaahi mouga, bea teeki ai te ke gaohi ae fonua mo mamani, io, talu mei mua o aʻu o taegata, ko koe be koe Otua.” (Saame 90:1, 2, PM) Tatau pē mo e lea ʻa e palōfita ko ʻAiseá: “ʻIkai kuo ke ʻilo? kehe, ʻikai kuo ke fanongo? ko e ʻOtua taʻengata ʻa Sihova, ʻa e Fakatupu ʻo e ngaahi ngataʻanga ʻo mamani”! (ʻAisea 40:28) ʻI he tuʻunga meimei tatau, ko e tohi ʻa Suté ʻoku fakahaaʻi ai ʻa e ʻi ai ʻa e ʻOtuá “mei he kotoa ʻo ʻitānití.”—Sute 25.

ʻOku fakahaaʻi mai ʻe he ngaahi konga Tohi Tapú kiate kitautolu ko e ʻOtuá ko e “Tuʻi ʻo ʻitānití,” ʻo hangē ko ia naʻe fakamatalaʻi ʻe he ʻapositolo ko Paulá. (1 Tīmote 1:17) ʻOku ʻuhinga eni ko e ʻOtuá ʻoku ʻi ai maʻu ai pē, ʻo tatau ai pē pe ko e hā ʻa e mamaʻo ʻo ʻetau vakai atu ki he kuohilí. Pea te ne ʻi ai maʻu pē ʻi he kahaʻú. (Fakahā 1:8) Ko ia, ko ʻene ʻi ai taʻengatá ko e fakakaukau tefito ia ki he Māfimafi-Aoniú.

Ko e hā ʻoku faingataʻa ai ke tau mahinoʻi ʻa e fakakaukau ko iá? Koeʻuhi ko e fakangatangata ʻo e lōloa ʻo ʻetau moʻuí ʻoku kehe ʻaupito ai ʻetau fakakaukau ki he taimí meia Sihova. Koeʻuhí ʻoku taʻengata ʻa e ʻOtuá, kiate ia ko e taʻu ʻe taha-afé ʻoku tatau ia mo e ʻaho ʻe taha. (2 Pita 3:8) Ke fakatātaaʻi: ʻOku lava ha heʻe lahi ʻoku moʻui ʻi ha ʻaho ʻe 50 ʻo mahinoʻi ʻa e lōloa ʻetau moʻuí ʻa ia ʻoku taʻu ʻe 70 pe 80? ʻIkai! ʻI hono kehé, ʻoku fakamatala ʻa e Tohi Tapú ko kitautolu ʻoku tau hangē ko ha fanga heʻé ʻi hono fakahoa atu ki hotau Tokotaha-Fakatupú. Naʻa mo ʻetau malava ko ia ke fakaʻuhingá ʻoku fakangatangata ʻi hono fakahoa atu kiate iá. (ʻAisea 40:22; 55:8, 9) Ko ia, ʻoku ʻikai ha ofo ko e ngaahi tafaʻaki ʻi he natula ʻo Sihová ʻoku ʻikai malava ke mahinoʻi kakato ia ʻe he tangatá.

Neongo ʻoku faingataʻa nai ke tau mahinoʻi ʻa e foʻi fakakaukau ʻoku taʻengata ʻa e ʻOtuá, ka ʻoku lava ke tau ʻiloʻi ʻoku ʻuhinga mālie ia. Kapau naʻe ʻi ai ha tokotaha kehe naʻá ne fakatupu ʻa e ʻOtuá, ko e taha ko iá ko e Tokotaha–Fakatupú ia. ʻI hono kehé, ʻoku fakamatala ʻa e Tohi Tapú, ko Sihova naʻá ne “fakatupu ʻa e ngaahi meʻa kotoa pē.” (Fakahā 4:11) ʻIkai ko ia pē, ʻoku tau ʻiloʻi naʻe ʻi ai ha taimi naʻe ʻikai ke ʻi ai ha ʻuniveesi. (Sēnesi 1:1, 2) Naʻe tupu ia mei fē? Ko hono Tokotaha-Fakatupú naʻe ʻuluaki ʻi ai ia. Naʻá ne ʻuluaki ʻi ai ia ki muʻa ʻi he ngaahi meʻa moʻui ʻatamaiʻiá, ʻo hangē ko hono ʻAlo tofu-pē-taha-ne-fakatupú pea mo e kau ʻāngeló. (Siope 38:4, 7; Kolose 1:15) ʻOku hā mahino leva, naʻá ne ʻuluaki ʻi ai tokotaha pē. Naʻe ʻikai ʻaupito ke fakatupu ia; pea naʻe hala mo ha meʻa naʻe ʻi ai ke ne fakatupu ia.

Ko ʻetau ʻi aí mo e ʻunivēsí fakakātoa ʻoku fakamoʻoniʻi ai ʻoku ʻi ai ʻa e ʻOtua taʻengata. Ko e Tokotaha naʻá ne fokotuʻu hotau ʻuniveesi kāfakafá ki hono tuʻuʻangá, ko e Tokotaha naʻá ne fokotuʻu ʻa e ngaahi lao ke puleʻi ʻaki iá, kuo pau pe ke ne ʻi ai maʻu ai pē. Ko ia tokotaha pē ʻoku lava ke ne foaki atu ʻa e mānava moʻuí ki he meʻa kotoa pē.—Siope 33:4.