KO E hā ʻoku haʻu ki hoʻo fakakaukaú ʻi he taimi ʻokú ke fakakaukau ai ki ha tuʻunga veve? Mahalo te ke fakakaukau nai ki he ngaahi meʻa kuo liʻaki mo namu taʻefeʻunga. Ko ia ai ʻe faingataʻa ke ke ʻamanekina te ke maʻu ha meʻa mahuʻinga ʻi ai, kae huanoa ai ha koloa mahuʻinga ʻaupito.

Kae kehe, ʻi he senituli ki muʻa atú, naʻe maʻu ha koloa peheni ʻi ha feituʻu pehē—ʻi he vevé. Ko e koloa ko ení naʻe ʻikai ko ha koloa moʻoni ka ko ha meʻa kehe ia ʻoku mahuʻinga lahi. Ko e hā ʻa e faʻahinga koloa naʻe maʻú? Ko e hā hono mahuʻinga kiate kitautolu ʻi he ʻahó ni ʻa e koloa ko eni naʻe ʻiló?

ʻI he kamataʻanga ʻo e senituli hono 20, naʻe ʻaʻahi ki ʻIsipite ha ongo mataotao mei he ʻUnivēsiti Oxford ko Bernard P. Grenfell mo Arthur S. Hunt. ʻI he lingiʻanga veve naʻe ofi ki he Teleʻa ʻo Nailá, naʻa nau maʻu ai ʻa e ngaahi kongokonga pepailo. Ki mui ʻi he 1920, ʻi he lolotonga ʻena fakafaʻahinga ʻa e ngaahi meʻa naʻá na tātānakí, naʻe toe maʻu mai ʻe Grenfell ha toe ngaahi kongokonga naʻe keli hake ʻi ʻIsipite. Naʻá ne maʻu ʻa e ngaahi meʻa ko ení ʻi he Laipeli John Rylands ʻi Manchester, ʻIngilani. Kae kehe, naʻe mate ʻa e ongo tangatá ni ki muʻa ke ʻosi ʻena fakakatiloká.

Naʻe fakakakato ʻe Colin H. Roberts ʻa e fakakatiloká ʻa ia ko ha mataotao ia ʻe taha mei he ʻUnivēsiti Oxford. ʻI he lolotonga ʻene fakafaʻahinga ʻa e ngaahi kongokongá, naʻá ne fakatokangaʻi ha konga pepailo naʻe ʻinisi ʻe 3.5 hono lōloá pea ʻinisi ʻe 2.4 hono fālahí (senitimita ʻe 9 x 6). Naʻá ne ʻohovale, ʻi heʻene ʻiloʻi ʻa e ngaahi foʻi lea ʻi he tohinima faka-Kalisi ko iá. ʻI he tafaʻaki ʻe tahá naʻe hiki ai ʻa e ngaahi lea ko e toʻo mei he Sione 18:31-33. Ko e tafaʻaki leva ʻe tahá naʻe hiki ai ʻa e ngaahi konga ʻo e veesi 37 mo e 38. Naʻe fakatokangaʻi ʻe Robert kuó ne ʻiloʻi ha koloa mahuʻinga taʻefakatataua.

Naʻe fakamahalo ʻa Roberts naʻe fuʻu motuʻa ʻa e konga pepailó. Ka ko e hā hono motuʻá? Ke ʻiloʻi ení, naʻá ne fakahoa ʻa e tohinima ʻi aí pea mo e ngaahi maniusikilipi ʻo e kuonga muʻá—ʻa ia ko ha ako naʻe ui ko e paleokalafi. * ʻI hono ngāueʻaki ʻa e founga ko ení, naʻá ne malava ai ke ne fakafuofuaʻi hono motuʻá. Ka naʻá ne loto ke fakapapauʻi. Ko ia naʻá ne faitaaʻi ʻa e ngaahi kongokongá pea ʻave ʻa e ngaahi tataú ki he kau paleokalafi ʻe toko tolu pea kole ange ke nau fakapapauʻi hono motuʻá. Ko e hā naʻe fakaʻosiʻaki ʻe he kau mataotaó ni?

ʻI hono ako ʻa e sīpinga ʻo e tohinimá mo e ngaahi kohí naʻe loto-tatau ai ʻa e kau mataotao ʻe toko tolú, naʻe tohi ʻa e ngaahi kongokongá ʻi he ʻuluaki konga ʻo e senituli hono ua T.S.—ko ha ngaahi hongofuluʻi taʻu siʻi pē hili ʻa e mate ʻa e ʻapositolo ko Sioné! Kae kehe, ko e paleokalafí ʻoku ʻikai ko e founga pau ia ke fakapapauʻi ʻa e motuʻa ʻo ha maniusikilipi pea ʻoku tui ha mataotao ʻe taha naʻe tohi nai ʻa e fakamatalá ʻi ha taimi pē lolotonga ʻo e senituli hono uá. Kae kehe, ko e kiʻi konga pepailo ko ení naʻe hoko—pea ʻoku kei hoko pē ko e maniusikilipi motuʻa taha ia ʻo e Ngaahi Konga Tohi Tapu Faka-Kalisi Kalisitiane kuo maʻú.

Ko e hā ʻoku mātuʻaki mahuʻinga ai ʻa e kongokonga ʻo e Kōsipeli ʻa Sioné ki he kau ʻofa ʻi he Tohi Tapú ʻi he ʻaho ní? Ko ha ʻuhinga ʻe ua. ʻUluakí, ko e faʻunga ʻo e kongokongá ʻokú ne ʻomai ai ha mahino ki he anga hono fakamahuʻingaʻi ʻe he muʻaki kau Kalisitiané ʻa e Folofolá.

ʻI he senituli hono ua T.S., naʻe maʻu ʻa e ngaahi fakamatalá ʻi ha faʻunga ʻe ua—ko e takainga tohi mo e codex. Ko e ngaahi takainga tohí ko e kongokonga pepailo pe kiliʻimanu naʻe fakapipiki pe tuitui fakataha ke maʻu ha lauʻi peesi lōloa. Ko e lauʻipepa  ko ení ʻoku lava ke takatakai pea tukuange ʻi he taimi pē ʻoku fiemaʻu aí. ʻI he ngaahi tuʻunga lahi, ko e tafaʻaki pē ʻe taha naʻe fai ai ʻa e tohí.

Kae kehe, ko e kiʻi konga naʻe maʻu ʻe Roberts naʻe fakatou tohi hono ongo tafaʻakí. ʻOku hā hení naʻe maʻu ia mei ha codex kae ʻikai ko ha takainga tohi. Ko e codex naʻe ngaohi ia mei he ngaahi lauʻi kiliʻimanu pe pepailo naʻe tuitui fakataha pea pelu ʻi ha faʻunga ko ha tohi.

Ko e hā naʻe lelei ange ai ʻa e codex ʻi he takainga tohí? Ko e moʻoni, ko e muʻaki kau Kalisitiané ko e kau ʻevangeliō. (Mātiu 24:14; 28:19, 20) Naʻa nau fakamafola ʻa e pōpoaki ʻo e Tohi Tapú ʻi ha feituʻu pē naʻe lava ke nau maʻu ai ʻa e kakaí—ʻi honau ʻapí, ʻi he feituʻu faiʻanga fakataú pea ʻi he halá. (Ngāue 5:42; 17:17; 20:20) Ko ia ko hono maʻu ʻa e Folofolá ʻi he founga ko ení naʻe faingofua ange ia.

Naʻe toe ʻai ʻe he codex ke toe faingofua ange ki he ngaahi fakatahaʻangá mo e faʻahinga tāutahá ke nau maʻu ʻenau ngaahi tatau taki taha ʻo e Folofolá. Ko ia, naʻe toutou hiki ʻa e Kōsipelí, pea ʻoku ʻikai ha veiveiua naʻe kaunga eni ki he tupu fakautuutu ʻo e lotu faka-Kalisitiané.

Ko e ʻuhinga hono ua ʻoku mahuʻinga ai ʻa e kongokonga Rylands kiate kitautolú he ʻoku fakaeʻa ai ʻa e alafalalaʻanga ʻa e tukuʻau mai ʻa e muʻaki hiki ʻo e Tohi Tapú. Neongo ko e ngaahi veesi siʻi pē mei he Kōsipeli ʻa Sioné ʻoku maʻu ʻi he kongokongá, ko e ngaahi meʻa ʻi lotó naʻe meimei tatau tofu pē mo e meʻa ʻoku tau lau ʻi heʻetau ngaahi tatau ʻo e Tohi Tapú ʻi he ʻaho ní. Ko e kongokonga Rylands ʻoku fakahaaʻi ai kuo ʻikai liliu ʻa e Tohi Tapú neongo hono toutou hiki ʻi he faai mai ʻa e taimí.

Ko e moʻoni, ko e kongokonga Rylands ʻo e Kōsipeli ʻa Sioné ko e taha ia ʻi he ngaahi konga ʻe laui afe ʻo e ngaahi kongokonga mo e maniusikilipi ʻoku fakapapauʻi ai ʻa e falalaʻanga ʻa e tukuʻau mai ʻa e muʻaki tohi ʻo e Tohi Tapú. ʻI he tohi ʻa Werner Keller ko e The Bible as History, naʻá ne fakamulitukuʻaki: “Ko e [ngaahi maniusikilipi] motuʻa ko ení ʻa e tali papau ki he kotoa ʻo e ngaahi veiveiua fekauʻaki mo e moʻoni mo e falalaʻanga ʻo e ngaahi fakamatala ʻoku tau maʻu ʻi heʻetau Tohi Tapú ʻi he ʻaho ní.”

Ko e moʻoni, ʻoku ʻikai fakatuʻunga ʻe he kau Kalisitiané ʻenau tuí ʻi he ngaahi keli fakatotoló. ʻOku nau tui “ko e potu Folofola kotoa pē kuo fakamānavaʻi ia ʻe he ʻOtuá.” (2 Tīmote 3:16) ʻIkai ko ia pē, he tuipau ē ko kitautolu ʻi hono fakapapauʻi ʻe he ngaahi koloa mahuʻinga taʻefakatataua mei he kuohilí ʻa e meʻa kuo leaʻaki maʻu pē ʻe he Tohi Tapú: “Ko e folofola ia ʻa Sihová ʻoku tolonga ʻo taʻengata”!—1 Pita 1:25.