Mahalo ʻoku ʻikai ha toe meʻa te ne ʻai kimautolu ke mau makehe atu ka ko ʻemau ngāue fakamalanga lahí—mei he fale ki he fale, ʻi he feituʻu kakaí mo ha feituʻu pē ʻoku ʻi ai ʻa e kakaí. Ko e hā ʻoku mau fai ai iá?

ʻOku malanga ʻa e Kau Fakamoʻoni ʻa Sihová ke fakalāngilangiʻi ʻa e ʻOtuá mo ʻai ke ʻiloa hono huafá. (Hepelū 13:15) ʻOku mau loto foki ke talangofua kia Kalaisi Sīsū, ʻa ia naʻá ne fekau mai: “Ko ia ai, mou ō ʻo ngaohi ko e kau ākonga ʻa e kakai ʻo e ngaahi puleʻanga kotoa pē, . . . pea akoʻi kinautolu ke nau tauhi ʻa e ngaahi meʻa kotoa pē kuó u fekau atu kiate kimoutolú.”—Mātiu 28:19, 20.

ʻIkai ko ia pē, ʻoku mau ʻofa ki homau kaungāʻapí. (Mātiu 22:39) Ko e moʻoni, ʻoku mau ʻiloʻi ko e tokolahi taha ʻo e kakaí ʻoku ʻi ai pē ʻenau tui fakalotu pea ʻoku ʻikai mahuʻingaʻia ʻa e tokotaha kotoa ʻi heʻemau pōpoakí. Neongo ia, ʻoku mau ʻiloʻi ko e ngaahi akonaki Fakatohitapú ʻoku hoko ia ko ha fakahaofi moʻui. Ko e ʻuhinga ia ʻoku mau hokohoko atu ai “ʻo ʻikai tuku ʻa e faiako mo hono talaki ʻa e ongoongo lelei fekauʻaki mo e Kalaisí,” ʻo hangē ko ia ko e kau Kalisitiane ʻi he ʻuluaki senitulí.—Ngāue 5:41, 42.

Ko e tokolahi taha ʻo ʻemau kau lautohí ʻoku ʻikai ko ha Kau Fakamoʻoni ʻa Sihova. Pea ko e laui miliona ʻoku nau ako Tohi Tapu mo kimautolú ʻoku nau kau ki ha ngaahi lotu kehe. Ka ʻoku nau houngaʻia ʻi he ʻaʻahi ange kiate kinautolu ʻa e Kau Fakamoʻoni ʻa Sihová.

Ko e moʻoni, ʻoku ʻi ai nai haʻo ngaahi fehuʻi kehe fekauʻaki mo e Kau Fakamoʻoni ʻa Sihová. ʻOku mau fakaafeʻi atu koe ke kumi ki he talí ʻaki ʻa e

• ʻEke ki ha taha ʻo e Kau Fakamoʻoni ʻa Sihová.

• ʻAʻahi ki heʻemau uepisaiti, www.mt1130.com.

• Maʻu ʻemau ngaahi fakatahá, ʻoku taʻetotongi mo ʻatā ki he tokotaha kotoa.