ʻAisea 42:1-25
42 Vakai! Ko ʻeku sevānití eni,+ ʻa ia ʻoku ou tokoniʻí!
Ko ʻeku tokotaha kuó u fili,+ ʻa ia ʻoku ou hōifua ai!+
Kuó u ʻai hoku laumālié kiate ia;+Te ne fakahoko ʻa e fakamaau totonú ki he ngaahi puleʻangá.+
2 Heʻikai te ne kalanga pe hiki hake hono leʻó,Pea heʻikai te ne ʻai hono leʻó ke ongona ʻi he halá.+
3 Heʻikai te ne maumauʻi ha kaho kuo laiki,Pea heʻikai te ne tāmateʻi ha vavae maama ʻoku tamatemate.+
Te ne fakahoko ʻa e fakamaau totonú ʻi he faitōnunga.+
4 Heʻikai te ne tamatemate hifo pea ʻe ʻikai ke laiki ia kae ʻoua kuó ne fokotuʻu ʻa e fakamaau totonú ʻi he māmaní;+Pea ʻoku hanganaki tatali ʻa e ngaahi motú ki heʻene laó.*
5 Ko e meʻa eni ʻoku folofolaʻaki ʻe he ʻOtua moʻoní, ʻe Sihova,Ko e Tokotaha-Fakatupu ʻo e ngaahi langí pea ko e Tokotaha Maʻongoʻonga ia naʻá ne falō atu iá,+ʻA e Tokotaha kuó ne folahi atu ʻa e māmaní mo e meʻa ʻoku tupu ʻi aí,+ʻA e Tokotaha ʻokú ne foaki ʻa e mānava ki he kakai ʻoku ʻi aí+Mo e laumālie ki he faʻahinga ʻoku ʻaʻeva aí:+
6 “Ko au Sihova, kuó u ui mai koe ʻi he māʻoniʻoni;Kuó u puke ho nimá.
Te u maluʻi koe pea te u tuku atu koe ko ha fuakava ki he kakaí+Pea ko ha maama ki he ngaahi puleʻangá,+
7 Ke ke fakaʻā ʻa e mata ʻoku kuí,+Ke fakahū ki tuʻa ʻa e pōpulá mei he pilīsone ʻi lolofonuáMo e faʻahinga ʻoku nofo ʻi he fakapoʻulí ke nau hū ki tuʻa mei he pilīsoné.+
8 Ko au Sihova. Ko hoku hingoá ia;ʻOku ʻikai te u ʻoange ʻa hoku lāngilangí ki ha toe taha kehe,*Pe ko hoku fakahīkihikí ki ha ngaahi ʻīmisi kuo tongi.+
9 Vakai, ko e ʻuluaki ngaahi meʻá kuo hoko ia;ʻOku ou fanongonongo he taimí ni ha ngaahi meʻa foʻou.
Ki muʻa ke nau fisiki haké, te u fakahā atu kinautolu.”+
10 Hivaʻi kia Sihova ha hiva foʻou,+ʻA hono fakahīkihikí mei he ngataʻanga ʻo māmaní,+ʻA kimoutolu ʻoku ʻalu hifo ki he tahí mo e meʻa kotoa ʻoku fonu aí,ʻA kimoutolu ngaahi motú mo honau kakaí.+
11 Tuku ke hiki hake ʻe he toafá mo hono ngaahi koló ʻa honau leʻó,+ʻA e ngaahi nofoʻanga ʻoku nofo ai ʻa Ketá.+
Tuku ke kalanga fiefia ʻa e kau nofo ʻi he makatuʻú;Tuku ke nau kaila mei he tumutumu ʻo e ngaahi moʻungá.
12 Tuku ke nau ʻoatu ʻa e fakalāngilangi kia SihovaMo talaki ʻa hono fakahīkihikí ʻi he ngaahi motú.+
13 ʻE ʻalu atu ʻa Sihova ʻo hangē ha tangata toʻá.+
ʻOkú ne vēkeveke ke fai ha meʻa ʻo hangē ha tokotaha pāteʻi taú.+
Te ne kaila, ʻio, te ne fai ha kaila ʻo e tau;Te ne fakahaaʻi ʻokú ne toʻa ange ʻi hono ngaahi filí.+
14 “Kuó u hanganaki fakalongolongo ʻi ha taimi fuoloa.
Naʻá ku nofo fakalongo ai pē mo taʻotaʻofi au.
ʻI he hangē ha fefine ʻoku teu ke fāʻelé,Te u toʻe, mo hōhō mo fakatau ʻeku mānavá ʻi he taimi pē taha.
15 Te u fakaʻauha ʻa e ngaahi moʻungá mo e ngaahi foʻi māʻolungáPea ʻai ke mae ʻa e kotoa honau ʻuluʻakaú.
Te u liliu ʻa e ngaahi vaitafé ke hoko ko e fonua mōmoa*Pea ʻai ke pakupaku ʻa e ngaahi vai kahoʻiá.+
16 Te u taki ʻa e kuí ʻi ha hala ʻoku ʻikai te nau ʻilo ki ai+Pea ʻai kinautolu ke nau ʻalu ʻi ha ngaahi halanga ʻoku ʻikai ke nau maheni mo ia.+
Te u ʻai ʻa e fakapoʻuli ʻi honau ʻaó ke hoko ʻo maama+Pea ʻai ʻa e fonua tokakoví ke hoko ko e fonua tokalelei.+
Ko e meʻa eni te u fai maʻanautolú, pea heʻikai te u liʻaki kinautolu.”
17 Te nau holomui pea ʻe ʻai kinautolu ke nau mā,ʻA e faʻahinga ʻoku nau falala ki he ngaahi ʻīmisi kuo tongí,ʻA e faʻahinga ʻoku nau pehē ki he ngaahi ʻīmisi mētalé:* “Ko kimoutolu ʻa homau ngaahi ʻotuá.”+
18 Fanongo, ʻa kimoutolu ʻoku tulí;Sio mo tokanga, ʻa kimoutolu ʻoku kuí.+
19 Ko hai ia ʻoku kuí tuku kehe ʻa ʻeku sevānití,Pea mātuʻaki tuli ʻo hangē ko e tokotaha talafekau ʻoku ou fekauʻi atú?
Ko hai ʻoku mātuʻaki kui ʻo hangē ko e tokotaha kuó u fakapaleʻí,Pea mātuʻaki kui ʻo hangē ko e sevāniti ʻa Sihová?+
20 ʻOkú ke sio ki he ngaahi meʻa lahi, ka ʻoku ʻikai te ke hanganaki tokanga.
ʻOkú ke fakaava ho telingá, ka ʻoku ʻikai te ke fanongo.+
21 Koeʻuhí ko ʻene māʻoniʻoní,Kuo fiefia ai ʻa Sihova ʻi hono hakeakiʻi mo hono ʻai ke lāngilangiʻia ʻa e laó.*
22 Ka ko ha kakai eni ne ʻave fakamālohi mo kaihaʻasia ʻenau koloá;+Ko kinautolu kotoa ʻoku nau fihia ʻi he ngaahi luo mo fufū ʻi he ngaahi pilīsone.+
Kuo ʻave fakamālohi kinautolu ʻo ʻikai ha taha ke ne fakahaofi kinautolu,+Pea kaihaʻasia ʻo ʻikai ha taha ke ne pehē atu: “Fakafoki mai kinautolu!”
23 Ko hai ʻiate kimoutolu te ne fanongo ki he meʻá ni?
Ko hai ʻe tokanga mo fanongo ʻi he fekauʻaki mo e kahaʻú?
24 Ko hai kuó ne tuku atu ʻa Sēkope ke kaihaʻasiáMo ʻIsileli ki he kau ʻave fakamālohi ʻo ʻenau koloá?
ʻIkai ko Sihova ia, ʻa e Tokotaha ko ia naʻa tau faiangahala ki aí?
Naʻa nau fakafisi ke ʻaʻeva ʻi Hono ngaahi halá,Pea naʻe ʻikai te nau talangofua ki Heʻene laó.*+
25 Ko ia naʻá Ne hanganaki huaʻi kiate ia ʻa ʻene houhaú,ʻA ʻene tuputāmakí mo e kakaha ʻo e taú.+
Naʻe keina ai ʻa e meʻa kotoa pē naʻe takatakai kiate iá, ka naʻe ʻikai te ne tokanga ki ai.+
Naʻe kakaha ia kiate ia, ka naʻe ʻikai tokanga ki ai ʻa hono lotó.+
Fakamatala ‘i Lalo
^ Pe “fakahinohinó.”
^ Pe “ʻOku ʻikai te u vahevahe hoku lāngilangí mo ha toe taha kehe.”
^ Fakafoʻilea, “ngaahi motu.”
^ Pe “ngaahi ʻīmisi mētale kuo haká.”
^ Pe “fakahinohinó.”
^ Pe “fakahinohinó.”
