ʻAisea 65:1-25
65 “Kuó u tuku ke kumi kiate au ʻa e faʻahinga naʻe ʻikai te nau ʻeke aú;Kuó u tuku ke maʻu au ʻe he faʻahinga naʻe ʻikai te nau kumi kiate aú.+
Naʻá ku pehē, ‘Ko au eni, ko au eni,’ ki ha puleʻanga naʻe ʻikai te nau ui ki hoku hingoá.+
2 Kuó u folahi atu hoku nimá mo kōlenga ʻi he ʻahó kotoa ki ha kakai loto-fefeka,+Ki he faʻahinga ʻoku nau ʻaʻeva ʻi he hala ʻoku ʻikai leleí,+ʻO nau muimui ʻi heʻenau ngaahi fakakaukau ʻanautolú;+
3 Ko ha kakai ʻoku nau fakamamahiʻi maʻu pē au ʻi hoku fofongá,+ʻO nau faifeilaulau ʻi he ngaahi ngoue+ mo ʻoatu ha ngaahi feilaulau fakakohu ʻi he ngaahi funga piliki.
4 ʻOku nau tangutu ʻi he ngaahi faʻitoká,+Pea ʻoku nau mohe ʻi he ngaahi feituʻu fakapulipuli,*ʻO kai ʻa e kakano ʻo e fanga puaká,+Pea ko e huhuʻa ʻo e ngaahi meʻa ʻoku koví* ʻoku ʻi heʻenau ngaahi ʻaiʻanga meʻá.+
5 ʻOku nau pehē, ‘Fakamamaʻo; ʻoua te ke fakaofiofi mai kiate au,He ʻoku ou māʻoniʻoni ange au ʻiate koe.’*
Ko e meʻá ni ko ha kohu ia ʻi hoku ihú, ko ha afi ʻoku ulo ʻi he ʻahó kotoa.
6 Vakai! Kuo hiki ia ʻi hoku ʻaó;ʻE ʻikai te u kei tuʻu ai pē,Ka te u fai ha totongi kiate kinautolu,+Te u totongi kakato kiate kinautolu*
7 Koeʻuhi ko ʻenau faihalá pea pehē ki he faihala ʻa ʻenau fanga kuí,”+ ko e folofola ia ʻa Sihová.
“Koeʻuhi ko ʻenau fai ʻa e feilaulau fakakohu ʻi he ngaahi moʻungáPea nau fakamaaʻi au ʻi he ngaahi foʻi māʻolungá,+Te u ʻuluaki ʻoatu kakato* ʻa ʻenau totongí.”
8 Ko e folofola eni ʻa Sihová:
“Hangē pē ko hono maʻu ha uaine foʻou ʻi ha fuhinga kālepíPea pehē atu ʻe ha taha, ‘ʻOua ʻe fakaʻauha ia, he ʻoku ʻi ai ha meʻa ʻoku lelei,’*
ʻE pehē ʻa ʻeku fai ki heʻeku kau sevānití;ʻE ʻikai te u fakaʻauha kotoa kinautolu.+
9 Te u ʻomi meia Sēkope ha hakoPea meia Siuta ʻa e tokotaha te ne maʻu ʻa hoku ngaahi moʻungá;+ʻE maʻu ia ʻe he faʻahinga kuó u filí,Pea ʻe nofo ai ʻa ʻeku kau sevānití.+
10 ʻE hoko ʻa Sāloni+ ko ha kaikaiʻanga ʻo e fanga sipíPea mo e Teleʻa* ko ʻĀkolí+ ko ha mālōlōʻanga ʻo e fanga pulú,Maʻa hoku kakai ʻoku nau kumi kiate aú.
11 Ka ʻoku mou kau ʻi he lotolotonga ʻo e faʻahinga ʻoku nau liʻaki ʻa Sihová,+ʻA e faʻahinga ʻoku ngalo ʻiate kinautolu ʻa hoku moʻunga tapú,+ʻA e faʻahinga ʻoku nau teuteu ha tēpile maʻá e ʻotua ʻo e Monuú,Pea mo e faʻahinga ʻoku nau fakafonu ha ngaahi ipu uaine kuo huʻi maʻá e ʻotua ʻo e Tufakangá.
12 Ko ia te u tuku atu kimoutolu ki he heletaá ko homou tufakanga,+Pea ko kimoutolu kotoa te mou punou ke tāmateʻi,+Koeʻuhí naʻá ku ui, ka naʻe ʻikai te mou fai mai ha tali,Naʻá ku lea, ka naʻe ʻikai te mou fanongo;+Naʻa mou hanganaki fai ʻa e meʻa naʻe kovi ʻi heʻeku vakaí,Pea naʻa mou fili ʻa e meʻa naʻe ʻikai te u leleiʻia aí.”+
13 Ko ia ko e folofola eni ʻa e ʻEiki Hau ko Sihová:
“Vakai! Ko ʻeku kau sevānití te nau kai, ka ko kimoutolú te mou fiekaia.+
Vakai! Ko ʻeku kau sevānití te nau inu,+ ka ko kimoutolú te mou fieinua.
Vakai! Ko ʻeku kau sevānití te nau fiefia,+ ka ko kimoutolú te mou mā.+
14 Vakai! Ko ʻeku kau sevānití te nau kaila fiefia koeʻuhi ko e tuʻunga lelei ʻo honau lotó,Ka te mou tangi koeʻuhí ko e mamahi ʻa homou lotóPea te mou tangilāulau koeʻuhí ko ha laumālie mafesi.
15 Te mou tuku mai ha hingoa ʻa ia ʻe ngāueʻaki ʻe he faʻahinga kuó u filí ʻi ha talatuki,Pea ʻe tāmateʻi ʻe he ʻEiki Hau ko Sihová ʻa e tokotaha taki taha ʻo kimoutolu,Ka ko ʻene kau sevānití te ne uiʻaki kinautolu ha hingoa ʻe taha;+
16 Koeʻuhí ke ʻilonga ha taha te ne kumi ki ha tāpuaki maʻana ʻi he māmaníʻE faitāpuekina ia ʻe he ʻOtua ʻo e moʻoní.*
Pea ʻilonga ha taha te ne fai ha fuakava ʻi he māmaníTe ne fuakava ʻi he ʻOtua ʻo e moʻoní.*+
He ʻe ngalo ʻa e ngaahi mamahi* ki muʻá;ʻE fufū ia mei hoku ʻaó.+
17 He vakai, ʻoku ou fakatupu ha ngaahi langi foʻou mo ha māmani foʻou;+Pea ʻe ʻikai toe manatua ʻa e ngaahi meʻa muʻá,Pea ʻe ʻikai ke ʻalu hake ia ʻi he lotó.+
18 Ko ia mou mavava pea fiefia ʻo taʻengata ʻi he meʻa ʻoku ou fakatupú.
He vakai, ʻoku ou fakatupu ʻa Selusalema ko e tupuʻanga ʻo ha fiefiaPea mo hono kakaí ko e tupuʻanga ʻo e mavava.+
19 Pea te u fiefia ʻi Selusalema pea mavava ʻi hoku kakaí;+ʻE ʻikai ke toe ongona ʻiate ia ha leʻo ʻo e tangi pe ko ha tangi ʻi he mamahi.”+
20 “ʻE ʻikai toe ʻi ai ha valevale ʻi he feituʻu ko iá ʻe siʻi ʻa e ngaahi ʻaho ʻo ʻene moʻuí,Pea ko e tangata taʻumotuʻá ʻe moʻui aʻuaʻu.
He ʻilonga ha taha ʻe mate ʻi hono taʻu teaú ʻe lau ia ko ha tamasiʻi pē,Pea ko e tokotaha angahalá neongo ʻa ʻene taʻu teaú te ne mate ʻi ha mala.*
21 Te nau langa fale pea nofo ai,+Pea te nau tō ngoue kālepi pea kai ʻa hono fuá.+
22 ʻE ʻikai te nau langa ke nofo ai ha tokotaha kehe,Pea ʻe ʻikai te nau tō ke kai ʻe ha niʻihi kehe.
He ko e ngaahi ʻaho ʻo hoku kakaí ʻe hangē ko e ngaahi ʻaho ʻo ha fuʻu ʻakau,+Pea ko e ngāue ʻa honau nimá ʻe fiefia kakato ai ʻa e faʻahinga kuó u filí.
23 ʻE ʻikai taʻeʻaonga* ʻa ʻenau fakaongosiá,*+Pea ʻe ʻikai te nau fanauʻi ha fānau ki he mamahi,Koeʻuhí ko e fānau* kinautolu kuo faʻuʻaki ʻa e faʻahinga kuo faitāpuekina ʻe Sihova,+Pea fakataha mo kinautolu ʻa honau hakó.+
24 Naʻa mo e ki muʻa ke nau uí, te u fai ha tali;Lolotonga ʻenau kei leá, te u ongoʻi.
25 Ko e ulofí mo e lamí te na kai fakataha,Ko e laioné te ne kai kauʻi uite ʻo hangē pē ko e pulú,+Pea ʻe hoko ʻa e efú ko e meʻakai ʻa e ngatá.
ʻE ʻikai te nau fai ha kovi pe ha maumau ʻi he kotoa ʻo hoku moʻunga tapú,”+ ko e folofola ia ʻa Sihová.
Fakamatala ‘i Lalo
^ Pe ngalingali, “ʻi he fanga kiʻi fale leʻó.”
^ Pe “taʻemaʻá.”
^ Pe ngalingali, “He te u tuku atu ʻa ʻeku māʻoniʻoní kiate koe.”
^ Fakafoʻilea, “totongi atu ki honau fatafatá.”
^ Fakafoʻilea, “ki honau fatafatá.”
^ Fakafoʻilea, “ha tāpuaki.”
^ Pe “Talalo.”
^ Pe “falalaʻangá.” Fakafoʻilea, “ʻĒmeni.”
^ Pe “falalaʻangá.” Fakafoʻilea, “ʻĒmeni.”
^ Pe “ngaahi faingataʻa.”
^ Pe ngalingali, “Pea ko e tokotaha ʻoku ʻikai aʻu ʻo taʻu teaú ʻe lau ia ko e malaʻia.”
^ Pe “kulanoa.”
^ Pe “ngāue mālohí.”
^ Fakafoʻilea, “hako.”
