ʻUluaki Kolinitō 11:1-34
11 Mou hoko ko e kau faʻifaʻitaki kiate au, ʻo hangē tofu pē ko ʻeku faʻifaʻitaki kia Kalaisí.+
2 ʻOku ou fakaongoongoleleiʻi kimoutolu koeʻuhi ʻoku mou manatuʻi au ʻi he ngaahi meʻa kotoa pē pea ʻoku mou piki maʻu ki he ngaahi akonakí ʻo hangē tofu pē ko ʻeku tuku atu ia kiate kimoutolú.
3 Ka ʻoku ou loto ke mou ʻilo ko e ʻulu ʻo e tangata kotoa pē ko e Kalaisí;+ ko e ʻulu leva ʻo ha fefine ko e tangatá;+ ko e ʻulu leva ʻo e Kalaisí ko e ʻOtuá.+
4 Ko e tangata kotoa pē ʻokú ne fai ha lotu pe kikite pea ʻoku pūlou hono ʻulú ʻokú ne fakamaaʻi ʻa hono ʻulú;
5 ka ko e fefine kotoa pē ʻokú ne fai ha lotu pe kikite+ mo ʻikai pūlou hono ʻulú ʻokú ne fakamaaʻi ʻa hono ʻulú, he ʻoku hangē ia ko ha fefine kuo tele hono ʻulú.
6 He kapau ʻoku ʻikai ke pūlou ha fefine, ʻoku totonu ke kosi hono ʻulú; ka ʻo kapau ko e meʻa fakamā ki ha fefine ke kosi hono ʻulú pe tele, ʻoku totonu ke ne ʻai ha pūlou.
7 He ʻoku ʻikai totonu ki ha tangata ke pūlou hono ʻulú, he ko e ʻīmisi+ ia mo e lāngilangi ʻo e ʻOtuá, ka ko e fefiné ko e lāngilangi ia ʻo e tangatá.
8 He naʻe ʻikai tupu ʻa e tangatá mei he fefiné, ka naʻe tupu ʻa e fefiné mei he tangatá.+
9 Pea ʻikai ko ia pē, naʻe ʻikai fakatupu ʻa e tangatá koeʻuhi ko e fefiné, ka ko e fefiné koeʻuhi ko e tangatá.+
10 Ko e ʻuhinga ia ʻoku totonu ai ki he fefiné ke ne ʻai ha pūlou ki hono ʻulú ko ha fakaʻilonga ʻo ʻene anganofo ki hono husepānití, koeʻuhi ko e kau ʻāngeló.+
11 Neongo ia, ʻi he felāveʻi mo e ʻEikí ʻoku ʻikai māvahevahe ʻa e fefiné mo e tangatá pe māvahevahe ʻa e tangatá mo e fefiné.
12 He hangē tofu pē ko e haʻu ʻa e fefiné mei he tangatá,+ ʻoku pehē foki ʻa e fou mai ʻa e tangatá ʻi he fefiné; ka ko e ngaahi meʻa kotoa pē ʻoku mei he ʻOtuá.+
13 Fai haʻamou fakamaau: ʻOku taau ki ha fefine ke ne fai ha lotu ki he ʻOtuá ʻo ʻikai pūlou hono ʻulú?
14 ʻIkai ʻoku fakanatula pē hoʻomou ʻilo ko e ʻulu loloá ʻoku mole ai ʻa e lāngilangi ʻo ha tangata,
15 ka ʻo kapau ʻoku ʻulu loloa ha fefine, ko ha lāngilangi ia kiate ia? He ʻoku ʻoange kiate ia ʻa hono louʻulú ko hano pūlou.
16 Kae kehe, kapau ʻoku fie fakakikihiʻi ʻe ha taha ia ke muimui ʻi ha faʻahinga tōʻonga fakafonua, kuo pau ke ke tala kiate ia ʻoku ʻikai te tau maʻu ha toe tōʻonga fakafonua kehe, pehē foki ki he ngaahi fakatahaʻanga ʻa e ʻOtuá.
17 Kae lolotonga ʻeku ʻoatu ʻa e ngaahi fakahinohino ko ení, ʻoku ʻikai te u fakaongoongoleleiʻi kimoutolu koeʻuhi he ʻoku ʻikai ke iku ki he lelei ange, ka ki he kovi ange ʻa hoʻomou fakatahatahá.
18 He ko e ʻuluaki meʻá, ʻoku ou fanongo ʻi hoʻomou fakatahataha ʻi ha fakatahaʻanga, ʻoku ʻi ai ha ngaahi māvahevahe ʻi homou lotolotongá; pea ʻoku aʻu ki ha tuʻunga ʻoku ou tui ki ai.
19 He ʻe ʻi ai moʻoni foki ha ngaahi fakafaʻafaʻahi ʻi homou lotolotongá,+ koeʻuhi ke hoko ʻo hā mahino ʻa e faʻahinga ʻo kimoutolu ʻoku fakahōifuá.
20 ʻI he taimi ʻoku mou fakatahataha ai ʻi ha feituʻu ʻe taha, ʻoku ʻikai te mou ʻi ha tuʻunga totonu ke kai ʻa e Kai Efiafi ʻa e ʻEikí.+
21 He ʻi he taimi ʻoku mou kai ai iá, kuo ʻosi tomuʻa maʻu ʻe he tokotaha taki taha ia ʻene kai efiafi ʻaʻana, ko ia ʻoku fiekaia ai ʻa e taha kae konā ʻa e taha.
22 ʻIkai ʻoku ʻi ai homou ngaahi fale ke fai ai ʻa e kaí mo e inú? Pe ʻoku mou taʻetokaʻi ʻe kimoutolu ʻa e fakatahaʻanga ʻa e ʻOtuá pea ʻai ʻa e faʻahinga ʻoku ʻikai te nau maʻu ha meʻá ke nau ongoʻi mā? Ko e hā haʻaku lea ʻe fai kiate kimoutolu? Te u fakaongoongoleleiʻi kimoutolu? ʻOku ʻikai te u fakaongoongoleleiʻi kimoutolu ʻi he meʻá ni.
23 He naʻá ku maʻu mei he ʻEikí ʻa e meʻa naʻá ku tuku atu foki kiate kimoutolú, ʻa ia, ko e ʻEiki ko Sīsuú, ʻi he pō+ ko ia naʻe teu ai ke lavakiʻi iá, naʻá ne toʻo ha mā,
24 pea ʻi he hili hono fai ha fakafetaʻí, naʻá ne pakipaki ia peá ne pehē: “ʻOku ʻuhinga eni ki hoku sinó+ ʻa ia ʻoku foaki koeʻuhi ko kimoutolu. Hanganaki fai eni ko hoku fakamanatu.”+
25 Naʻá ne fai foki ʻa e meʻa tatau ki he ipú,+ hili ʻenau fai ʻa e kai efiafí, ʻo ne pehē: “Ko e ipú ni ʻoku ʻuhinga ia ki he fuakava foʻou+ ʻoku faiʻaki hoku totó.+ Hanganaki fai eni, ʻi ha taimi pē ʻoku mou inu ai iá, ko hoku fakamanatu.”+
26 He ʻi ha taimi pē ʻoku mou kai ai ʻa e maá ni mo inu ʻa e ipú ni, ʻoku mou hanganaki fanongonongo ai ʻa e pekia ʻa e ʻEikí, kae ʻoua ke ne haʻu.
27 Ko ia ai, ʻilonga ʻa ia ʻokú ne kai ʻa e maá pe inu ʻa e ipu ʻa e ʻEikí lolotonga ia ʻoku ʻikai te ne taau ki aí ʻe halaia ia ʻi he fekauʻaki mo e sino pea mo e taʻataʻa ʻo e ʻEikí.
28 ʻUluaki tuku ki ha tangata ke ne fakamoʻoniʻi ʻene tāú ʻi he hili haʻane sivisiviʻi ia,+ pea ko e toki taimi leva ia ke tuku kiate ia ke ne kai ʻa e maá mo inu ʻi he ipú.
29 Kapau ko e tokotaha ʻoku kai mo inú ʻoku ʻikai te ne lāuʻilo ko e meʻa ʻokú ne kai mo inú ʻokú ne fakafofongaʻi ʻa e sino ʻo e ʻEikí, ʻokú ne fakahalaiaʻi ʻa ia tonu.
30 Ko e ʻuhinga ia ʻoku vaivai ai mo puke ʻa e tokolahi ʻi homou lotolotongá, pea tokotokolahi ʻa e faʻahinga ʻoku nau mohe ʻi he maté.*+
31 Ka ʻo kapau te tau lāuʻilo ki he tuʻunga moʻoni ʻoku tau ʻi aí, ʻe ʻikai ke fakamāuʻi kitautolu.
32 Kae kehe, ʻi he taimi ʻoku fakamāuʻi ai kitautolú, ʻoku akonekina ai kitautolu ʻe Sihova,*+ koeʻuhi ke ʻoua naʻa tau hoko ʻo fakahalaiaʻi fakataha mo e māmaní.+
33 Ko ia ai, ʻe hoku fanga tokoua, ʻi hoʻomou fakatahataha mai ke kai iá, mou fetataliʻaki.
34 Kapau ʻoku ʻi ai ha taha ʻoku fiekaia, tuku ke ne kai ʻi ʻapi, koeʻuhi ʻi he taimi te mou fakatahataha mai aí, ʻoku ʻikai ko e fakatahataha maí ki he fakamaau.+ Ka ko e ngaahi meʻa ʻoku toé, te u toki fakatonutonu ia ʻi heʻeku aʻu atu ki hená.
Fakamatala ‘i Lalo
^ ʻOku hā mahino ko e ʻuhingá ki he mate fakalaumālie.
^ Sio ki he Fakamatala Fakalahi A5.
