Ua Kolinitō 9:1-15
9 ʻI he fekauʻaki ko eni mo e ngāue ʻoku fai maʻá e kakai tapú,+ ʻoku ʻikai fiemaʻu moʻoni ia kiate au ke u tohi atu kiate kimoutolu,
2 he ʻoku ou ʻiloʻi ʻoku mou loto-lelei ke tokoni. ʻOku ou pōlepole fekauʻaki mo kimoutolu ki he kau Masitōniá. Naʻá ku tala kiate kinautolu kuo taʻu taha eni ʻa e mateuteu ʻa kimoutolu ʻi ʻĀkeiá ke fai ha tokoni. Koeʻuhi ko hoʻomou mātuʻaki loto-leleí, ʻoku loto-lelei foki ai mo e tokolahi ʻo kinautolu.
3 Ka ʻoku ou fekauʻi atu ʻa e fanga tokouá, koeʻuhi ke ʻoua naʻa hoko ʻa ʻemau pōlepoleʻaki kimoutolu ʻi he meʻá ni ʻo taʻeʻaonga pea ke malava moʻoni ke mou hoko ʻo mateuteu, ʻo hangē tofu pē ko ʻeku tala ko ia te mou mateuteú.
4 He ka ʻikai, kapau te u ʻalu atu fakataha mo e kau Masitōniá ʻo ʻiloʻi ʻoku ʻikai te mou mateuteu, te mau hoko ai kimautolu—pehē foki mo kimoutolu—ʻo mā ko e meʻa ʻi heʻemau falala atu kiate kimoutolú.
5 Ko ia naʻá ku fakakaukau ʻoku fiemaʻu ke fakalototoʻaʻi ʻa e fanga tokouá ke nau ʻalu atu tōmuʻa kiate kimoutolu pea ke ʻai ke maau ki muʻa ʻa hoʻomou meʻaʻofa lahi fau kuo mou palōmesiʻakí, koeʻuhi ke hoko ai ʻo maau ʻa e meʻá ni ko ha meʻaʻofa nima-homo, ʻo ʻikai ko ha meʻa kuo fakamālohiʻi.
6 Ka ʻi he fekauʻaki mo e meʻá ni, ʻilonga ʻa ia ʻokú ne mamaeʻi ʻene tūtūʻí ʻe siʻisiʻi ʻa e meʻa te ne utu maí, pea ʻilonga ʻa ia ʻoku lahi fau ʻene tūtūʻí ʻe lahi fau foki ʻa e meʻa te ne utu maí.+
7 Tuku ki he tokotaha taki taha ke ne fai ʻa e meʻa tofu pē ko ia kuó ne fakapapauʻi ʻi hono lotó, ʻo ʻikai ʻi he taʻefiefoaki* pe ʻi hono kounaʻi,+ he ʻoku ʻofa ʻa e ʻOtuá ʻi ha tokotaha foaki fiefia.+
8 ʻIkai ko ia pē, ʻoku malava ʻe he ʻOtuá ke ne fakatupunga ʻa e kotoa ʻo ʻene ʻofa maʻataʻataá ke hulu fau atu kiate kimoutolu, koeʻuhi ke mou mātuʻaki feʻungaʻānoa maʻu pē ʻi he meʻa kotoa pē, pea pehē ki hono maʻu ʻo lahi ʻa e meʻa ke fai ʻaki ʻa e ngāue lelei kotoa pē.+
9 (Hangē tofu pē ko ia kuo tohí: “Kuó ne tufa ʻo lahi ʻaupito;* kuó ne foaki ki he masivá. Ko ʻene māʻoniʻoní ʻoku hokohoko atu ia ʻo taʻengata.”+
10 Pea ko e Tokotaha ʻokú ne tokonaki ʻo lahi fau ʻa e tengaʻi ʻakau ki he tokotaha tūtūʻí mo e mā ki he kaí te ne tokonaki mo fakalahi ʻa e tengaʻi ʻakaú kiate kimoutolu ke mou tūtuuʻi pea te ne fakalahi ʻa e utu-taʻu ʻo hoʻomou māʻoniʻoní.)
11 ʻI he meʻa kotoa pē kuo fakakoloa kimoutolu ke mou nima-homo ʻi he tafaʻaki kotoa pē, pea ʻe fakamālō ai ʻa e kakaí ki he ʻOtuá koeʻuhi ko hoʻomou meʻaʻofa ko ia te mau foaki ki he niʻihi kehé;
12 koeʻuhi ko hono fakahoko ʻo e ngāue ko eni maʻá e kakaí ʻoku ʻikai ko e fai pē ke tokonaki lelei ai maʻá e ngaahi fiemaʻu ʻa e kakai tapú,+ ka ke hoko foki ʻo hulu fau ʻi he fakahaaʻi ʻo e fakafetaʻi lahi ki he ʻOtuá.
13 Fakafou ʻi he fakamoʻoni ʻoku ʻoatu ʻi he ngāue tokoni ko ení, ʻoku nau fakalāngilangiʻi ai ʻa e ʻOtuá koeʻuhí he ʻoku mou fakamoʻulaloa ki he ongoongo lelei ʻo fekauʻaki mo e Kalaisí, hangē ko ia ʻoku mou talaki fakahāhaá, pea koeʻuhí he ʻoku mou nima-homo ʻi hoʻomou fai ʻa e tokoni kiate kinautolu pea ki he tokotaha kotoa pē.+
14 Pea ʻi he hū tōtōaki maʻamoutolú, ʻoku nau fakahaaʻi ai ʻenau ʻofa kiate kimoutolú koeʻuhi ko e lahi fau ʻa e ʻofa maʻataʻatā ʻa e ʻOtuá kiate kimoutolú.
15 Fakafetaʻi ki he ʻOtuá koeʻuhi ko ʻene meʻaʻofa taʻetotongi taʻealafakamatalaʻí.
