Ngāue ʻa e Kau ʻApositolo 22:1-30
22 “Kau tangata, fanga tokoua mo e ngaahi tamai, fanongo mai ki heʻeku taukapo ʻoku fai atu ko eni kiate kimoutolú.”+
2 Ko ia ʻi heʻenau fanongo ʻokú ne lea ange kiate kinautolu ʻi he lea faka-Hepeluú, naʻe ʻāsili ai pē ʻenau fakalongolongó, peá ne pehē:
3 “Ko ha Siu au,+ naʻe fāʻeleʻi ʻi Tāsusi ʻo Silisiá,+ ka naʻá ku ako ʻi he kolo ko ení ʻi he veʻe vaʻe ʻo Kāmelielí,+ ʻo fakahinohinoʻi ʻo fakatatau ki hono tauhi pau ʻa e Lao tukufakaholó,+ peá u faivelenga maʻá e ʻOtuá ʻo hangē pē ko e kotoa ʻo kimoutolu ʻi he ʻaho ní.+
4 Naʻá ku fakatangaʻi ʻa e ʻAlunga ʻo e ʻEikí ʻo aʻu ki he tuʻunga ke mate ai honau niʻihi, ʻo haʻi mo fakahū ki he ngaahi pilīsoné fakatouʻosi ʻa e kakai tangata mo e kakai fefine,+
5 ʻo hangē ko ia ʻoku lava ke fakamoʻoni ki ai ʻa e taulaʻeiki lahí mo e kotoa ʻo e fakataha ʻa e kau mātuʻá. Naʻá ku toe maʻu foki mo e ngaahi tohi meiate kinautolu ki he fanga tokoua ʻi Tāmasikusí, pea naʻá ku ʻalu atu ke haʻi ʻo ʻomi ʻa e faʻahinga naʻe ʻi aí ki Selusalema ke tauteaʻi.
6 “Ka ʻi he lolotonga ko ia ʻeku fonongá peá u fakaofiofi atu ki Tāmasikusí, ʻi he hoʻatā mālié nai, fakafokifā pē naʻe tapa hifo ha fuʻu maama mei he langí ʻo ne huhulu takatakai kotoa ʻiate au,+
7 pea naʻá ku tō hifo ki he kelekelé peá u fanongo ki he leʻo ʻoku pehē mai kiate au: ‘ʻE Saula, ʻe Saula, ko e hā ʻokú ke fakatangaʻi ai aú?’
8 Naʻá ku tali ange: ‘Ko hai koe, Tangataʻeiki?’ Peá ne pehē mai kiate au, ‘Ko Sīsū au ko e Nāsaletí, ʻa ia ʻokú ke fakatangaʻí.’
9 Pea ko e kau tangata naʻe ʻi ai fakataha mo aú naʻa nau sio ki he māmá, ka naʻe ʻikai te nau fanongo ki he leʻo ʻo e tokotaha naʻe lea mai kiate aú.
10 ʻI he meʻa ko iá naʻá ku pehē ange: ‘Ko e hā te u faí, ʻEiki?’ Naʻe pehē mai ʻe he ʻEikí kiate au: ‘Tuʻu, ʻalu ki Tāmasikusi, pea ʻe tala atu ai kiate koe ʻa e meʻa kotoa pē kuo ʻosi fakapapauʻi kiate koe ke ke faí.’+
11 Ka koeʻuhi naʻe ʻikai lava ke u sio ki ha meʻa tupu mei he ngingila ʻa e maama ko iá, naʻá ku aʻu ki Tāmasikusi ʻi hono tataki au ʻe he nima ʻo e faʻahinga naʻa mau fononga fakatahá.
12 “Pea ko ha tangata ko hono hingoá ko ʻAnanaia, ko ha tangata mamahiʻi-lotu ʻo fakatatau ki he Laó, ʻa ia naʻe talanoaʻi ʻa e lelei ʻa hono ongoongó ʻe he kau Siu kotoa naʻe nofo aí,
13 naʻá ne haʻu kiate au. Naʻá ne tuʻu ʻi hoku tafaʻakí peá ne pehē mai: ‘Saula, tokoua, ke ke lava ā ʻo sio!’ Pea ʻi he mōmeniti tofu pē ko iá naʻá ku hanga hake ʻo sio kiate ia.+
14 Naʻá ne pehē: ‘Ko e ʻOtua ʻo ʻetau fanga kuí kuó ne fili koe ke ke hoko ʻo ʻilo ki hono finangaló pea ke ke sio ki he tokotaha māʻoniʻoní+ pea ke ke fanongo ki he leʻo ʻoku haʻu mei hono ngutú,
15 koeʻuhí te ke hoko ko ha fakamoʻoni maʻana ki he tangata kotoa pē ʻo fekauʻaki mo e ngaahi meʻa kuó ke mātā mo fanongoá.+
16 Pea ko e hā koā ʻokú ke kei tautoloi aí? Tuʻu, papitaiso, pea fakamaʻa hoʻo ngaahi angahalá+ ʻaki hoʻo ui ki hono huafá.’+
17 “Ka ʻi he hili ʻeku foki ki Selusalemá+ pea fai ʻeku lotu ʻi he temipalé, naʻá ku mamata ki ha vīsone
18 peá u sio ai ki he ʻEikí ʻokú ne pehē mai kiate au: ‘Fakatoʻotoʻo peá ke mavahe leva mei Selusalema, koeʻuhí ʻe ʻikai te nau tali ʻa hoʻo fakamoʻoni fekauʻaki mo aú.’+
19 Pea naʻá ku pehē ange: ‘ʻEiki, ko kinautolu tonu ʻoku nau ʻiloʻi lelei naʻá ku faʻa fakahū pilīsone mo haha ʻi he sinakoke ki he sinakoke ʻa e faʻahinga ko ia naʻe tui kiate koé;+
20 pea ʻi he taimi naʻe lilingi ai ʻa e toto ʻa hoʻo fakamoʻoni ko Sitīvení, naʻá ku tuʻu ai pea naʻá ku loto-lelei ki ai mo leʻo ʻa e ngaahi kofu tuʻa ʻo e faʻahinga naʻa nau tāmateʻi iá.’+
21 Pea neongo ia naʻá ne pehē mai kiate au: ‘ʻAlu pē, koeʻuhí te u fekauʻi atu koe ki ha ngaahi puleʻanga mamaʻo atu.’”+
22 Pea naʻa nau kei fakafanongo pē kiate ia ʻo aʻu ki he leá ni. Naʻa nau hiki hake leva honau leʻó, ʻo pehē: “Toʻo atu ʻa e faʻahinga tangata ko ʻení mei he māmaní, he ʻoku ʻikai tuha ia ke moʻui!”
23 Koeʻuhí ko ʻenau kaikailá, mo ʻenau tolo takai holo honau ngaahi kofu tuʻá, mo hono laku ʻa e efú ki he ʻataá,+
24 naʻe tuʻutuʻuni ai ʻa e ʻeikitaú ke ʻomi ʻa Paula ki he ʻapitanga ʻo e kau sōtiá peá ne pehē ʻoku totonu ke fakaʻeke ia ʻaki hano haha, koeʻuhi ke ne ʻiloʻi tonu ai ʻa e ʻuhinga naʻa nau kaikaila peheni ai kia Paulá.
25 Ka ʻi heʻenau haʻi ia koeʻuhi ke haha ʻaki ʻa e uipí, naʻe pehē ʻe Paula ki he ʻōfisa fakakautau naʻe tuʻu aí: “ʻOku ngofua koā kiate kimoutolu kau tangata ke mou haha ha Loma* ʻa ia kuo teʻeki ke fakahalaiaʻi?”*+
26 Ko ia ʻi he fanongo ʻa e ʻōfisa fakakautaú ki he meʻá ni, naʻá ne ʻalu ki he ʻeikitaú ʻo ne līpooti, ʻo pehē: “Ko e hā ʻoku teu ke ke faí? He ko e tangatá ni ko ha Loma ia.”
27 Ko ia naʻe fakaofi mai ʻa e ʻeikitaú ʻo ne pehē kiate ia: “Tala mai angé, ko ha Loma koe?” Naʻá ne pehē ange: “ʻIo.”
28 Naʻe tali ange ʻa e ʻeikitaú: “Naʻá ku fakatau mai ʻa e ngaahi totonu ko ʻeni ke hoko ko ha tangataʻifonuá ʻaki ha paʻanga lahi.” Naʻe pehē ange ʻe Paula: “Ka naʻe fanauʻi mai au ia mo e ngaahi meʻa ko iá.”+
29 Ko ia ai, ʻi he taimi pē ko iá, ko e kau tangata ko ia naʻe teu ke nau fakaʻeke ia ʻaki hono fakamamahiʻí naʻa nau mavahe meiate ia; pea naʻe ilifia ʻa e ʻeikitaú ʻi heʻene ʻiloʻi hake ko ha Loma iá pea koeʻuhi kuó ne haʻi sēini iá.+
30 Ko ia ʻi he ʻaho hono hokó, ʻi heʻene loto ke ʻiloʻi fakapapau ʻa e ʻuhinga tofu pē ko ia naʻe tukuakiʻi ai ia ʻe he kau Siú, naʻá ne tuku ange ia peá ne fekau ki he houʻeiki taulaʻeikí pea mo e kotoa ʻo e Sanetalimí* ke nau fakataha mai. Naʻá ne ʻohifo leva ʻa Paula ʻo ne ʻai ia ke ne tuʻu ʻi honau lotolotongá.+
